އިންތިޚާބީ ރައީސަށް މަރުޙަބާ ވިދާޅުވެ، އުރުދުޣާން ދެއްކެވީ ފަލަސްތީނަށް އެހީވުމުގެ ވާހަކަ

ފަލަސްތީނުގެ ރައްޔިތުުންނަށް ބޭނުންވާ އިންސާނީ އެހީ ފޯރުކޮށްދިނުމަށް ތުރުކީވިލާތުން ކުރެވެންހުރި ހުރިހާ މަސައްކަތެއް ކުރަމުންދާކަމަށް އެ ޤައުމުގެ ރައީސް ރަޖަބް ޠައްޔިބު އުރުދުޣާން ވިދާޅުވެއްޖެއެވެ.

އުރުދުޣާން މިހެން ވިދާޅުވެފައިވަނީ އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ފޯނުން ގުޅުއްވާ ދެއްކެވި ވާހަކަފުޅުގައެވެ.

އުރުދުޣާންގެ މި ފޯނު ކޯލުގައި މިދިޔަ ސެޕްޓެމްބަރުމަހު ރާއްޖޭގައި ބޭއްވި ރިޔާސީ އިންތިޚާބު ޑރ. މުޙައްމަދު މުޢިއްޒު ކާމިޔާބުކުރެއްވުމާއި ގުޅިގެން އެމަނިކުފާނަށް މަރުޙަބާ ދެންނެވިއެވެ.

ދެ ބޭފުޅުންގެ މި ފޯނު ކޯލުގައި ހައްދުފަހަނައަޅާފައިވާ އިސްރާއީލުގެ ޔަހޫދީ ސިފައިން ފަލަސްތީނުގެ ރައްޔިތުންނަށް ހުއްޓުމެއްނެތި ދެމުންދާ ޙަމަލާތަކާއެކު މެދުއިރުމަތީގައި އުފެދިފައިވާ ނުތަނަވަސްކަމާއި، އިންސާނީ އެހީ ފޯރުކޮށްދިނުމުގައި ހުރި ގޮންޖެހުންތަކާގުޅޭގޮތުން ވަނީ ވާހަކަފުޅުދައްކަވާފައެވެ.

President Recep Tayyip Erdoğan spoke by phone with President-elect Mohamed Muizzu of the Maldives.

The call addressed the latest developments within the framework of the Israel-Palestine conflict and humanitarian issues.

Stating that Türkiye is making every effort for the…

— Republic of Türkiye Directorate of Communications (@Communications) October 21, 2023

މި ފޯނު ކޯލުގައި ތުރުކީގެ ރައީސް އުރުދުޣާން ވަނީ މެދުއިރުމަތީގައި ސުލްޙައާއި ހަމަޖެހުން ޤާއިމުކޮށް، އިންސާނީ އެހީ ފޯރުކޮށްދިނުމަށް ތުރުކީވިލާތަށް ކުރެވެން ހުރި ހުރިހާ މަސައްކަތެއް ކުރައްވަމުން ގެންދަވާކަން ފާހަގަކުރައްވާފައެވެ. އަދި މިކަމުގައި އެޅެންހުރި ފިޔަވަޅުތައް އަޅުއްވަމުންގެންދަވާކަމަށްވެސް ތުރުކީގެ ރައީސް ވިދާޅުވިއެވެ.

ހައްދުފަހަނައަޅާފައިވާ އިސްރާއީލުގެ ސިފައިން ފަލަސްތީނުގެ ނިކަމެތި ރައްޔިތުންނާއި ދެކޮޅަށް ހިންގަމުންދާ ލާއިންސާނީ ޖަރީމާތައް ކުށްވެރިކޮށް މުޅި ދުނިޔޭގެ އެކި ކަންކޮޅުތަކުގައި މުސްލިމުން އަޑުއުފުލަމުންދާއިރު، ދިވެހިންވެސް އަންނަނީ މި އަނިޔާވެރި ޢަމަލުތައް ހަރުކަށި އިބާރާތުން ކުށްވެރިކޮށް ފަލަސްތީނުގެ މިނިވަންކަމަށް ގޮވާލަމުންނެވެ. އަދި އިންސާނީ އެހީތެރިކަން ފޯރުކޮށްދިނުމަށްޓަކާ ފައިސާ އެއްކުރުމަށް ތަފާތު ހަރަކާތްތައް ހިންގަމުންނެވެ.