"ބޯހިޔާވަހިކަމަކީ މުއްސަނދިކަން އިތުރުކުރަން އޮތް ވަސީލަތެއް ނޫން"

ބޯހިޔާވަހިކަމަކީ މިލްކިއްޔާތެއްގެ ގޮތުގައި ހޯދައިގެން މުއްސަނދިކަން އިތުރުކުރަން އޮތް ވަސީލަތެއް ނޫންކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. އަބްދުﷲ މުއްޠަލިބް ވިދާޅުވެއްޖެއެވެ.

ވަޒީރު މިހެން ވިދާޅުވީ، ސަރުކާރުގެ ބޯހިޔާވަހިކަމުގެ ސިޔާސަތާއި ގުޅޭގޮތުން ބައެއް ފަރާތްތަކުން ފާޅުކުރާ ކަންބޮޑުވުންތަކާއި ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ.

"ލިންކްޑްއިން"ގައި ކުރެއްވި ޕޯސްޓެއްގައި އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. އަބްދުﷲ މުއްޠަލިބް ވިދާޅުވީ، ސަރުކާރުގެ ބޯހިޔާވަހިކަމުގެ ސިޔާސަތުތައް ބައްޓަންކޮށްފައިވަނީ އެއްވެސް ބޯހިޔާވަހިކަމެއް ނެތް އާއިލާތަކަށް އިސްކަންދޭ ގޮތަށް ކަމަށާއި، މިއީ މުޖުތަމައުގެ ހަމަޖެހުމާއި ކަރާމާތް ރައްކާތެރިކުރުމަށް އަޅާ މުހިންމު ފިޔަވަޅެއް ކަމަށެވެ.

ވަޒީރު ވިދާޅުވީ، ބޯހިޔާވަހިކަމަކީ ހަމައެކަނި މިލްކިއްޔާތެއް ނުވަތަ މުއްސަނދިކަން އިތުރުކުރަން އޮތް ވަސީލަތެއް ނޫން ކަމަށެވެ. އެއީ ތައުލީމާއި، ސިއްހަތާއި، ވަޒީފާ އަދި އިޖުތިމާއީ ބަދަހިކަމުގެ ބިންގާކަން ވަޒީރު ފާހަގަކުރެއްވިއެވެ.

"އާއިލީ ބޯހިޔާވަހިކަން" ޕްރޮގްރާމަށް އަލިއަޅުއްވާލައްވަމުން ވަޒީރު ވިދާޅުވީ، މި ޕްރޮގްރާމުގެ ދަށުން އެއްވެސް ބޯހިޔާވަހިކަމެއް ނެތް މީހުންނަށް އިސްކަންދެނީ ވަރަށް ސާދާ އުސޫލަކުން ކަމަށެވެ. އަދި ބިމެއް ނުވަތަ ގެއެއް ނެތް އާއިލާތަކަކީ ގިނަ ފަހަރަށް އެބައެއްގެ މުދަލާއި ތަކެތީގެ ރައްކާތެރިކަން ލިބިފައިނުވާ ބައެއްކަން ވަޒީރު ފާހަގަކުރެއްވިއެވެ. ކިތަންމެ ކުޑަ ނަމަވެސް ބޯހިޔާވަހިކަމުގެ ފުރުސަތެއް އޮތް އާއިލާއެއްގެ ހާލަތު، އެއްވެސް ވަސީލަތެއް ނެތް އާއިލާއަކާ އަޅާބަލާއިރު ތަފާތުވާނެ ކަމަށް ވަޒީރު ވިދާޅުވިއެވެ.

ބޯހިޔާވަހިކަމުގެ ބޭނުންތެރިކަން ވަޒަންކުރަނީ ވަކިވަކި ފަރުދުންގެ ގޮތުގައި ނޫން ކަމަށާއި، އެއީ އާއިލާތަކުގެ ނިސްބަތުން ކަމަށް ވަޒީރު ވިދާޅުވިއެވެ. އާއިލާއެއްގެ ކޮންމެވެސް އެއް މެންބަރެއްގެ ނަމުގައި ބޯހިޔާވަހިކަމެއް އޮތްނަމަ، އެ އާއިލާއަށް އިތުރު ޔުނިޓެއް ދިނުމުގެ ކުރިން އެއްވެސް އެއްޗެއް ނެތް އާއިލާއަކަށް ފުރުސަތު ދިނުމަކީ ފަރަގު ކުޑަކުރުމަށް ކުރަންޖެހޭ ކަމެއް ކަމަށް އޭނާ ވިދާޅުވިއެވެ.

"އާންމު ބޯހިޔާވަހިކަމުގެ މަގުސަދަކީ އާއިލާތައް ހަމަޖެއްސުން، މުދާ އެއްކުރުމެއް ނޫން،" ވަޒީރުގެ ޕޯސްޓުގައިވެއެވެ.

ވަޒީރު ވިދާޅުވީ، ސަރުކާރުން ސޯޝަލް ހައުސިން، ގޯތި، އަދި އަތްފޯރާފަށުގެ ބޯހިޔާވަހިކަމުގެ މަޝްރޫއުތައް ކުރިއަށް ގެންދާވަރަކަށް އާންމު ބޯހިޔާވަހިކަމަށް އޮތް ބާރު ކުޑަވާނެ ކަމަށެވެ. އަދި ކޮންމެ އާއިލާއަކަށް މަދުވެގެން އެއް ބޯހިޔާވަހިކަން ކަށަވަރުވުމުން، މިހާރު ގެންގުޅޭ ސިޔާސަތުތަކަށް ބަދަލުތައް އަންނާނެ ކަމަށްވެސް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. އަބްދުﷲ މުއްޠަލިބް ވިދާޅުވިއެވެ.

ސަރުކާރުގެ ބޯހިޔާވަހިކަމުގެ ސިޔާސަތު 'ބޯހިޔާވަހިކަން އެންމެނަށް'، މި ސްކީމުގެ ދަށުން ގްރޭޓަރ މާލެ ސަރަހައްދުންނާއި ރަސްމާލެ ހިމެނޭހެން ދޫކުރުމަށް ހަމަޖެހިފައިވާ 15،000 ގޯތްޗަށް އެދި ހުށަހެޅުމަށް މިހާރު ވަނީ ހުޅުވާލާފައެވެ. އަދި މި ސިޔާސަތުގެ ދަށުން މާލެ ސަރަޙައްދުން 7,900 ފްލެޓް ދޫކުރުމަށްވެސް ސަރުކާރުން މިހާރު ވަނީ ހުޅުވާލާފައެވެ.

މި ޕްރޮގްރާމުގެ ދަށުން ފްލެޓް ދޫކުރުމުގައި މާލޭގެ ރަށްވެހިންނަށް 4,000 ފްލެޓް، މާލޭގައި ދިރިއުޅޭ އެހެން ރަށްރަށުގެ މީހުންނަށް 1,500 ފްލެޓް އަދި ޚާއްޞަ އިސްކަންދޭ ކެޓަގަރީތަކަށް 2,400 ފްލެޓް ދޫކުރުމަށް ވަނީ ހަމަޖެހިފައެވެ. އަދި ގޯތި ދޫކުރުމުގެ ތެރޭގައި މާލޭގެ ރަށްވެހިންނަށް 10,000 ގޯތި، މާލޭގައި ދިރިއުޅޭ އެހެން ރަށްރަށުގެ މީހުންނަށް 3,000 ގޯތި، އަދި މައިމުޅަވެފައިވާ މީހުންނަށް 500 ގޯތި ހިމެނެއެވެ. މީގެ އިތުރުން، މާލޭގެ ހަނި ގޯޅިތަކުގައި ހުރި ގޯތިތަކާއި ލާޖައްސައިގެން ގޯތި ބަދަލުކުރާ ފަރާތްތަކަށް 1,500 ގޯތި ވަނީ ޚާއްޞަކޮށްފައެވެ.

މި ސްކީމްގެ ދަށުން ގޯއްޗަށް އެދި ހުށަހެޅޭނީ އަންނަ މާރިޗު މަހުގެ 4ވަނަ ދުވަހުގެ ނިޔަލަށެވެ. އަދި ފެލްޓަށް އެދި ހުށަހެޅޭނީ އޭޕްރީލް މަހުގެ 17ވަނަ ދުވަހުގެ ނިޔަލަށެވެ.