ކޮމަންޑުއާއި މަތިކޮމަންޑޫ ގުޅާލުމުގެ %70 މަސައްކަތް ނިމިއްޖެ

ށ.ކޮމަންޑުއާއި މަތި ކޮމަންޑޫ ގުޅާލުމުގެ %70 މަސައްކަތް ނިމިފައިވާ ކަމަށް މަސައްކަތުގެ ކޮންޓްރެކްޓަރ، އެމްޓީސީސީން ވިދާޅުވެއްޖެއެވެ.

ށ.ކޮމަންޑޫއަކީ، 9 ހެކްޓަރުގެ ރަށެކެވެ. ކޮމަންޑޫގެ ރެޖިސްޓަރޑް އާބާދީ 1900 އިން މަތީގައި ހުރި ނަމަވެސް، ރަށުގައި ދިރިއުޅޭ އާބާދީއަކީ، 600 އެވެ. ރަށުގެ ގިނަ ރައްޔިތުންތަކެއް އެހެން ރަށްތަކަށް ހިޖުރަކުރަން ޖެހުނު އެންމެ ބޮޑު ސަބަބަކީވެސް ބިމުގެ ޖާގައިގެ ދަތިކަމެވެ.

އެރަށުގެ ތަރައްޤީއަށް އިތުރަށް ބިން ހަމަޖެއްސުމަށް، ރަށާއި އިންވެގެން އޮންނަ މަތި ކޮމަންޑޫއިން 16.7 ހެކްޓަރުގެ ބިން ހިއްކުމުގެ މަސައްކަތް 2023ވަނަ އަހަރު ވަނީ، ކުރިއަށް ގެންގޮސްފައެވެ. ކޮންމަންޑުއާއި މަތި ކޮމަންޑޫ ގުޅާލަނީ، ކޯޒުވޭއަކުންނެވެ.

2 ރަށް ގުޅާލުމަށް 200 މީޓަރުގެ ކޯޒުވޭއެއް ތަރައްޤީ ކުރުމުގެ މަސައްކަތް ދަނީ، ކުރަމުންނެވެ. މަސައްކަތުގެ ކޮންޓްރެކްޓަރ އެމްޓީސީސީން ވިދާޅުވީ، ކޯޒުވޭގެ ކޮންކްރީޓް މަސައްކަތްތަކުގެ ބޮޑުބައި ނިމިފައިވާއިރު، މުޅި މަސައްކަތުގެ %70 ނިމިފައިވާ ކަމަށެވެ. މި މަސައްކަތުގެ ތެރޭގައި ހިއްކި ސަރަޙައްދު ޙިމާޔަތް ކުރުމާއި ގުޅޭ ބައެއް މަސައްކަތްތައްވެސް ހިމެނެއެވެ.

މި މަޝްރޫޢުގައި ދެން ހިމެނެނީ، ކޮމަންޑޫގައި 1690 މީޓަރުގެ ޝޯރ ޕްރޮޓެކްޝަން ރެކްޓިފިކޭޝަން މަސައްކަތެވެ. އަދި 1520 މީޓަރުގެ ބޮޑު ހިލައިގެ ތޮށިލުމާއި، ޖުމުލަ 353 މީޓަރުގެ ބޮޑުހިލައިގެ ފައިކަށި އަދި މަތިކޮމަންޑޫގައި 112 މީޓަރުގެ ޖީއޯބޭގު ތޮށި ޤާއިމްކުރުމުގެ މަސައްކަތެވެ.

މި މަޝްރޫޢުއަށް ދައުލަތުގެ ބަޖެޓުން 249 މިލިޔަނަށްވުރެ ގިނަ ރުފިޔާ ޚަރަދު ކުރާނެއެވެ. މި މަސައްކަތް ޙަވާލުކޮށްފައިވަނީ، ދެ އަހަރުގެ ތެރޭގައި ނިންމާ ގޮތަށެވެ.

ށ.ކޮމަންޑޫގައި އެއަރޕޯޓެއް ތަރައްޤީ ކުރުމަށް ސަރުކާރުން ވަނީ، ނިންމަވާފައެވެ. ރައީސުލްޖުމްހޫރިއްޔާ ވިދާޅުވެފަވަނީ، އެއަރޕޯޓު މަޝްރޫޢަށް ބޭނުންވާ ބިން ހިއްކުމުގެ މަސައްކަތުގެ ދަށުން 48.8 ހެކްޓަރުގެ ބިން ހިއްކުމަށް ހަމަޖެހިފައިވާ ކަމަށެވެ.