ފުވައްމުލަކާއި އައްޑޫގެ ފެނާއި ނަރުދަމާގެ ޚިދުމަތް އަންނަމަހު އެމްޑަބްލިޔުއެސްސީން ދޭން ފަށަނީ

ފުވައްމުލައް ސިޓީއާއި އައްޑޫ އަތޮޅުގައި ފެނާއި ނަރުދަމާގެ ޚިދުމަތާ އެމްޑަބްލިޔުސްސީން ހަވާލުވާން ނިންމައި އެކަމާ ގުޅޭ ފްރޭމްވޯކް އެއްބަސްވުމުގައި ސޮއިކޮށްފިއެވެ.

މި އެއްބަސްވުމުގައި އެމްޑަބްލިޔުއެސްސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ޙުސައިން ފަހުމީއެވެ. ފެނަކަ ކޯޕަރޭޝަންގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ މުޙައްމަދު އަފީފް ޙުސައިނެވެ.

މި ފްރޭމްވޯކް އެއްބަސްވުމަކީ ފެނާއި ނަރުދަމާގެ ޚިދުމަތްތައް މެދުނުކެނޑި، އިތުބާރު ހުރި ގޮތެއްގައި ފޯރުކޮށްދިނުމަށް އިސްކަންދީގެން، ހަރުދަނާ އަދި ދެފުށް ފެންނަ ނިޒާމެއްގެ ދަށުން ޚިދުމަތްތައް ބަދަލުކުރުމަށްޓަކައި އެކުލަވާލާފައިވާ އެއްބަސްވުމެކެވެ.

މި ބަދަލުގެ ދަށުން، ކަމާގުޅޭ އޮޕަރޭޝަންތަކާއި، އިންފްރާސްޓްރަކްޗަރާއި ވަސީލަތްތަކުގެ އިތުރުން، ހިނގަމުންދާ މަޝްރޫޢުތައް އެމްޑަބްލިއުއެސްސީއާ ހަވާލުކުރުމަށް ވަނީ ނިންމާފައެވެ. އަދި ކަސްޓަމަރުންގެ ރެކޯޑުތަކާއި، އެއްބަސްވުންތަކާއި، އިންވެންޓްރީ އަދި އެހެނިހެން ޒިންމާތައް، ކަނޑައެޅިފައިވާ އުސޫލުތަކުގެ ދަށުން ޔަގީންކުރުމަށްފަހު އެމް.ޑަބްލިޔު.އެސް.ސީއާ ޙަވާލުކުރުމަށްވެސް ވަނީ ނިންމާފައެވެ.

އެމްޑަބްލިޔުއެސްސީން ވިދާޅުވީ މި ބަދަލުގެ މަރުޙަލާގައި، އައްޑޫއާއި ފުވައްމުލަކު ސިޓީގެ ރައްޔިތުންނަށް ފޯރުކޮށްދޭ ފެނާއި ނަރުދަމާގެ ޚިދުމަތުގެ ފެންވަރު ހިފަހައްޓައި، ލިޔެކިޔުންތަކާއެކު ތަރުތީބުކޮށް ޚިދުމަތްތައް ޙަވާލުކުރުމުގެ މަސައްކަތުގައި އެމްޑަބްލިޔުއެސްސީއާއި ފެނަކަ ގުޅިގެން ގާތުން މަސައްކަތް ކުރަމުންދާނެކަމަށެވެ.

އެމްޑަބްލިޔުއެސްސީގެ މެނޭޖިން ޑިރެކްޓަރ ހުސައިން ފަޙުމީ ވިދާޅުވީ އަންނަ މަހުގެ 13ގެ ކުރިން މަސައްކަތްތައް ނިންމައި ފުވައްމުލަކާއި އައްޑޫގައި ފެނާއި ނަރުދަމާގެ ޚިދުމަތް ދޭން އެމްޑަބްލިޔުއެސްސީން ފަށާނެ ކަމަށެވެ.

"މިއީ ފެނަކައިގެ ޚިދުމަތް ދޭ ބައެއް ރަށްރަށުގެ ޚިދުމަތްތައް އެމްޑަބްލިޔުއެސްސީއާއި ސްޓެލްކޯގެ ދަށަށް ބަދަލުކުރަން ރައީސް ޑރ. މުޙައްމަދު މުޢިއްޒު ނިންމަވާފައިވާ ނިންމެވުމުގެ ބައެއް. އެ ޕްރޮސެސް ކުރިއަށް މިދަނީ." ފަހުމީ ވިދާޅުވިއެވެ.

ފެނަކައިގެ މެނޭޖިން ޑިރެކްޓަރ މުޙައްމަދު އަފީފް ޙުސައިން ވިދާޅުވީ ޚިދުމަތްތައް އެމްޑަބްލިޔުއެސްސީގެ ދަށަށް ބަދަލުކުރަން ދެ ކުންފުނިން މަސައްކަތް ކުރަނީ ވަރަށް ބޮޑަށް ގުޅިގެން ކަމަށެވެ. ވިދާޅުވީ ފެނަކައިން ދިން ޚިދުމަތްތަކަށް ވުރެ ރަނގަޅަށް އެމްޑަބްލިޔުއެސްސީން ޚިދުމަތް ދޭނެ ކަމަށް އުންމީދުކުރައްވާކަމަށް އަފީފް ވިދަޅުވިއެވެ.

"މި އެއްބަސްވުމުގެ ދަށުން ދެބައި މީހުން ސައިޓްތަކަށް ޒިޔާރަތް ކުރުމާއި ސައިޓްތައް ބެއްލެވުމާއި ސާވޭ ކުރެއްވުމާއި މިހެން ގޮސް ބައިވަރު ކަންކަން އަދި ހަމަޖެހިގެންދާނެ." އަފީފް ވިދާޅުވިއެވެ.

ރާއްޖޭގެ ރަށްރަށަށް ފެނާއި ނަރުދަމާގެ ޚިދުމަތް ދެމުން އަންނަ ކުންފުނި، ފެނަކަ ކޯޕަރޭޝަން އުވާލައި ސްޓެލްކޯގެ ބެލުމުގެ ދަށަށް ރާއްޖޭގެ ހުރިހާ ރަށެއްގެ ކަރަންޓުގެ ޚިދުމަތް ދިނުން ބަދަލުކުރަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ. އެއާއެކު މުޅި ރާއްޖޭގެ ކަރަންޓުގެ ޚިދުމަތާ ސްޓެލްކޯއިން ހަވާލުވާތީ އަލަށް ހަވާލުވާ ރަށްރަށުގެ ހާލަތު ދެނެގަތުމަށް ސާވޭއެއްގެ މަސައްކަތްވެސް ދާދި ފަހުން ވަނީ ފަށައިފައެވެ.