އާންމު ޚިދުމަތުގެ ޔުނިޓުތައް ނެތް އަތޮޅުތަކުގައި އެ ޔުނިޓުތައް ޤާއިމުކުރުމުގެ މަސައްކަތް ފަށައިފި

އާންމު ޚިދުމަތުގެ ޔުނިޓުތައް ޤާއިމުކޮށްފައި ނެތް އަތޮޅުތަކުގައި އެ ޔުނިޓުތައް ޤާއިމުކުރުމުގެ މަސައްކަތް ފަށާފައިވާކަމަށް ސިޓީތަކާއި އިދާރީ ދާއިރާތަައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

އާންމު ޚިދުމަތުގެ ޔުނިޓުތައް ނުވަތަ ޕަބްލިކް ވަރކްސް ޔުނިޓުތަކަކީ އިމާރާތްކުރުމާއި މަރާމާތުކުރުންފަދަ އާންމު އެކިއެކި މަސައްކަތްކުރުން ހަވާލުކުރެވިފައިވާ ބައެކެވެ.

ރާއްޖޭގެ ހުރިހާ އަތޮޅެއްގައި ޢާންމު ޚިދުމަތްދޭނެ ޔުނިޓުތައް ޤާއިމުކުރުމަަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ.

މީސްމީޑިޔާގައި ހިއްސާކުރެއްވި ޕޯސްޓެއްގައި ސިޓީތަކާއި އިދާރީ ދާއިރާތަައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވީ ރައީސްގެ ނިންމެވުމާ އެއްގޮތަށް މިހާރު އާންމު ޚިދުމަތުގެ ޔުނިޓުތައް ޤާއިމުކޮށްފައި ނުވާ އަތޮޅުތަކުގައި ޔުނިޓު ޤާއިމުކުރާނެ ރަށްރަށް ކަނޑައަޅާފައިވާ ކަމަށެވެ.

އާންމު ޚިދުމަތުގެ ޔުނިޓުތައް ޤާއިމުކުރާ ރަށްރަށް:

* ހއ. ދިއްދޫ
* ށ. ފުނަދޫ
* ނ. މަނަދޫ
* ރ. މާކުރަތު
* ބ. އޭދަފުށި
* ޅ. ނައިފަރު
* ކ. ތުލުސްދޫ
* އއ. ރަސްދޫ
* އދ މަހިބަދޫ
* ވ. ފެލިދޫ
* މ. މުލި
* ފ. ނިލަންދޫ
* ދ. ކުޑަހުވަދޫ
* ތ. ވޭމަންޑޫ
* ގއ. ވިލިނގިލި

ރައްޔިތުންނާ ގާތުން، ރާއްޖޭގެ ހުރިހާ އަތޮޅެއްގައި ޢާންމު ޚިދުމަތް ދޭނެ ޔުނިޓްތައް ޤާއިމު ކުރުމަަށް ރޖ. ޑރ މުޙައްމަދު މުޢިއްޒު @MMuizzu ނިންމަވާފައިވާ ނިންމެވުމުގެ ދަށުން، މިހާރު އެ ޚިދުމަތް ނުދެވޭ އަތޮޅުތަކުގައި އެ ޔުނިޓްތައް ޤާއިމު ކުރާނެ ރަށްތައް ތިރީގައި މިވަނީއެވެ.
ހއ.…

— Adam Shareef Umar (@Adamshareefz) July 14, 2025

ވަޒީރު ވިދާޅުވީ ރަަށްރަށް ކަނޑައެޅުމުގައި މިންގަނޑެއްކަމަށް ބަލާފައިވާނީ އަތޮޅު ކައުންސިލް ހިންގާ ރަށްރަށަށް ކަމަށެވެ. އަދި މި ޔުނިޓުތައް ޤާއިމުކުރުމަށް އިދާރީގޮތުން ނިންމަންޖެހޭ މަސައްކަތްތައް މިހާރު ކުރަމުންދާކަމަށް ވަޒީރު ވިދާޅުވިއެވެ.

ޕަބްލިކް ވަރކްސް ޔުނިޓުތައް 9 ރަށެއްގައި މިހާރުވަނީ ޤާއިމުކޮށްފައެވެ.