އައިލެންޑް އޭވިއޭޝަންގެ ހެޑްއޮފީސް ފަޅާލައި، ފަސް ލައްކައަށް ވުރެ ގިނަ ރުފިޔާ ވަގަށް ނަގައިފިއެވެ. ޕީ.އެސް.އެމްއަށް މައުލޫމާތު ދެއްވަމުން ފުލުހުންގެ މީޑިޔާ އޮފިޝަލް ވިދާޅުވީ، އައިލެންޑް އޭވިއޭޝަންގެ އޮފީހުން ވައްކަންކޮށްފައިވާކަމަށް ފުލުހުންނަށް ރިޕޯޓްކޮށްފައި ވަނީ މިއަދު ފަތިހު 05:10 އެހާއިރުކަމަށެވެ. ފުލުހުން ބުނީ އައިލެންޑް އޭވިއޭޝަންގެ އޮފީހުން ވައްކަންކޮށްފައި ވަނީ މޫނު ނިވާކޮށްގެން ތިބި ބަޔަކު އެތަނުގައި ސެކިއުރިޓީ ބަލަހައްޓަންހުރި މީހާގެ އަތުގައި ކްލިޕްއަޅުވާ އޭނާ ބަނުމަށްފަހު ކަމަށެވެ. އަދި އެ އޮފީހުގެ 3 ތިޖޫރިއަކުން ފަސް ލައްކައަށްވުރެ ގިނަ ރުފިޔާ ވަގަށް ނަގާފައިވާކަމަށް ފުލުހުންނަށް ރިޕޯޓްކޮށްފައިވާކަމަށްވެސް ފުލުހުން މައުލޫމާތުދެއެވެ.މި މައްސަލައިގައި މިހާތަނަށް އެއްވެސް މީހަކު ފުލުހުންގެ ބެލުމުގެ ދަށަށް ގެނެސްފައެއް ނުވެއެވެ. ފުލުހުން ދަނީ މި މައްސަލަ އިތުރަށް ތަޙުޤީޤުކުރަމުންނެވެ.