ދުނިޔޭގެ އެކި ހިސާބުތަކުގައި ހަލުއިކަމާއެކު ފެތުރެމުންދާ ކޮރޯނާ ވައިރަސް ނުވަތަ ކޯވިޑް-19 އާ ގުޅިގެން ހަތް ޤައުމަކަށް ދަތުރުކުރުމުގައި ޚާއްސަ ސަމާލުކަމެއް ދިނުމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން އިލްތިމާސްކޮށްފިއެވެ.
ކޯވިޑް-19 ގެ ހާލަތު އެޗްޕީއޭއިން ގާތުން ބަލަމުންދާ ކަމަށާއި، އެގޮތުން ޗައިނާގެ އިތުރުން ދެކުނު އިރުމަތީ އޭޝިޔާގެ ބައެއް ޤައުމުތަކުގައި ޗައިނާއަށް ދަތުރުކޮށްފައި ނުވާ ފަރާތްތަކުގެ ކިބައިންވެސް މިބަލި ފެނި އެޤައުމުތަކުގައި ބަލި ފެތުރެމުންދާ ކަން ފާހަގަކުރެވިފައިވާ ކަމަށް އެޗްޕީއޭއިން ހާމަކުރެއެވެ.
އެހެންކަމުން ކޯވިޑް-19 އިން ރައްކާތެރިވުމުގެ ގޮތުން އަޅާ ފިޔަވަޅެއްގެ ގޮތުން ޖަޕާން، ސިންގަޕޫރު، ހޮންކޮންގ، ދެކުނު ކޮރެއާ، ތައިލެންޑް، އީރާން އަދި އިޓަލީއަށް ދަތުރުކުރުމުގައި ޚާއްސަ ސަމާލުކަމެއް ދިނުމަށް އެޗްޕީއޭއިންވަނީ އިލްތިމާސްކޮށްފައެވެ.
އަދި ރާއްޖެއިން ބޭރަށް ދަތުރުކުރާ ފަރާތްތަކުން ސަމާލުކަން ދޭންޖެހޭ ކަންތައްތައްވެސް އެޗްޕީއޭއިންވަނީ ފާހަގަކުރައްވާފައެވެ. އެގޮތުން :-
- ދަތުރުކުރާ ޤައުމެއްގައި ބަލި ފެތުރޭ މިންވަރާއި ސަރަހައްދު ދެނެގަތުން
- އެޤައުމެއްގެ ސަރުކާރުން ރައްކާތެރިވުމަށް އަޅަން އަންގާފައިވާ ފިޔަވަޅުތައް ދެނެގަނެ އެކަންކަމަށް އަމަލުކުރުން
- ރޯގާޖެހި ހުން އައިސް ތިބޭ މީހުންނާއި ކައިރީގަ ނޫޅުން
- ސައިބޯނި ލައިގެން ގިނަގިނައިން އަތްދޮވުން، ސައިބޯނި ނެތްނަމަ ހޭންޑް ސެނިޓައިޒަރ ބޭނުންކުރުން
- ދަތުރުކުރުމަށްފަހު އެނބުރި އައިސް ރޯގާޖެހި، ކެއްސާ، ހުންއައުން ފަދަ އަލާމާތެއް ފެނިއްޖެނަމަ ގޭގަ މަޑުކުރުން އަދި އިތުރަށް ގޯސްވާނަމަ ނުވަތަ ރަނގަޅު ނުވެ ގިނަ ދުވަސްވާނަމަ ޑޮކްޓަރެއްގެ ލަފާ ހޯދުން ހިމެނެއެވެ.
މީގެ އިތުރުން މިދުވަސްވަރު ގިނަ މީހުން އެއްވެގެން ހިންގާ ހަރަކާތްތައް ނުބޭއްވުމަށްވެސް އެޗްޕީއޭއިންވަނީ އިލްތިމާސްކޮށްފައެވެ.