ޔުޓިލިޓީ ޚިދުމަތްތަކުގެ ފެންވަރު މަތިކުރުމަށް ވަޒީރު ކުންފުނިތަކާ މަޝްވަރާކުރައްވައިފި

ސަރުކާރުގެ ސިޔާސަތާ އެއްގޮތަށް، ޔުޓިލިޓީ ޚިދުމަތްތަކުގެ ފެންވަރު އިތުރަށް މަތިކުރުމަށްޓަކާ އަޅަންޖެހޭ ފިޔަވަޅުތައް ދެނެގަނެ، އެކަންކަން ތަންފީޒުކުރުމަށް މަޝްވަރާކޮށްފިއެވެ.

ރައްޔިތުންނަށް ފޯރުކޮށްދޭ ޔުޓިލިޓީ ޚިދުމަތްތަކުގެ ސިޔާސަތުތަކަށް ގެންނަންޖެހޭ ބަދަލުތަކާ ގުޅޭގޮތުން އަޅަންޖެހޭ ފިޔަވަޅުތަކާ ބެހޭގޮތުން މަޝްވަރާކުރެއްވުމަށްޓަކައި، ކަމާބެހޭ ކުންފުނިތަކުގެ މެނޭޖިންގ ޑިރެކްޓަރުންނާ ތިމާވެއްޓާ ބެހޭ ވަޒީރު ޢަލީ ޝަރީފް ވަނީ ބައްދަލުކުރައްވާފައެވެ.

މި ބައްދަލުވުމުގައި ސްޓޭޓް އިލެކްޓްރިކް ކޮމްޕެނީ (ސްޓެލްކޯ)، މާލެ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) އަދި ފެނަކަ ކޯޕަރޭޝަންގެ މެނޭޖިންގ ޑިރެކްޓަރުންގެ އިތުރުން، ތިމާވެއްޓާ ބެހޭ ވުޒާރާއާއި ކަމާގުޅުންހުރި އެކި އިދާރާތަކުގެ އިސްވެރިން ބައިވެރިވެވަޑައިގެންނެވިއެވެ.

މި ބައްދަލުވުމުގެ މައިގަނޑު މަޤްޞަދަކީ ޔުޓިލިޓީ ދާއިރާއިން ރައްޔިތުންނަށް ދެމުންގެންދާ ޚިދުމަތްތައް އިތުރަށް ހަރުދަނާކޮށް، ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތިން ޚިދުމަތްތަކުގެ ފެންވަރު މަތިކުރުމަށްޓަކައި އަޅަންޖެހޭ ފިޔަވަޅުތައް ދެނެގަނެ، އެކަންކަން ތަންފީޒުކުރުމަށް މަޝްވަރާކުރުމެވެ. މިގޮތުން ފެނާއި، ނަރުދަމާ އަދި ކަރަންޓުގެ ޚިދުމަތް ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމަށް ކުރެވިދާނެ ކަންކަމާ ގުޅޭގޮތުން ފުޅާ ދާއިރާއެއްގައި ޚިޔާލު ބަދަލުކުރެވުނެވެ.

މި ބައްދަލުވުމުގައި ވަޒީރު ޢަލީ ޝަރީފް ވަނީ، ރައްޔިތުންނަށް ލުއިފަސޭހަ އަދި އިތުބާރުހުރި ގޮތެއްގައި އަސާސީ ޚިދުމަތްތައް ފޯރުކޮށްދިނުމަށް ސަރުކާރުން ޚާއްޞަ އިސްކަމެއް ދެއްވާކަން ފާހަގަކުރައްވައި، ކަމާގުޅޭ އެންމެހައި މުއައްސަސާތައް ގުޅިގެން މަސައްކަތްކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ.

ސަރުކާރުން ވަނީ ފެނަކަ ކޯޕަރޭޝަން އުވާލާ، ފެނަކައިގެ އެންމެހާ ޚިދުމަތްތައް ސްޓެލްކޯގެ ދަށަށް ބަދަލުކުރުމަށް ނިންމާފައެވެ. މިއީ ކުންފުނީގެ ހިންގުމަށް އިތުރަށް ހަރުދަނާކޮށް، ބެލެހެއްޓުންތެރި ނިޒާމެއްގެ ދަށުން ޚިދުމަތް ދިނުމަށް ގެންނަން ނިންމި ބަދަލެކެވެ. ފެނަކައަކީ މިވަގުތު 127 ރަށެއްގައި ޚިދުމަތް ދެމުންދާ ކުންފުންޏެކެވެ.

ޔުޓިލިޓީގެ ޚިދުމަތްތައް ހަރުދަނާކުރުމަށް ރަށްރަށުގެ ކަރަންޓު ކެޕޭސިޓީ އިތުރުކުރުމާއި، ރަށްރަށުގައި އަލަށް މީހުން އާބާދުވާ ސަރަޙައްދުތަކަށް ޚިދުމަތްތައް ފޯރުކޮށްދިނުމުގެ މަސައްކަތް ދަނީ ކުރިއަށްގެންދަމުންނެވެ. އަދި ރާއްޖޭގައި ޕީކް ގަޑީގައި ބޭނުންކުރާ ހަކަތައިގެ %33 އިއާދަކުރަނިވި ހަކަތައަށް ބަދަލުކުރުމުގެ މަޝްރޫޢުއަކީ ސަރުކާރުން އެންމެ ބޮޑު އިސްކަމެއްދޭ ލަނޑުދަނޑިއެވެ. ފެނަކައާއި ސްޓެލްކޯ މެދުވެރިކޮށް މިހާރުވެސް ގިނަ ރަށްތަކެއްގައި އަވިން ހަކަތަ އުފައްދާ ނިޒާމު ޤާއިމުކޮށް، ބޮޑެތި ކުރިއެރުންތަކެއް އަންނަނީ ހޯދަމުންނެވެ.