ކުރިއަށް އޮތް ސީޒަނުގައި ޔޫއެފާ ޗެމްޕިއަންސް ލީގުގެ ޖާގައެއް ކަށަވަރުނުވުމުން, އިޓަލީގެ އޭސީ މިލާނުގެ ކޯޗު މަސިމިލިއާނޯ އަލެގްރީ އެ މަގާމުން ވަކިކޮށްފި އެވެ.
އިޓާލިއަން ސެރިއާގެ ފަހު މެޗުގައި އަމިއްލަ ދަނޑުގައި ކަލިއާރީ އަތުން 2-1 ގެ ނަތީޖާއަކުން އޭސީ މިލާން ބަލިވެފައިވާއިރު އެ ޓީމު އޮތީ ތާވަލުގެ ފަސްވަނައިގަ އެވެ. އަދި އެ ޓީމު ކުޅެން ޖެހޭނީ ޔޫއެފާގެ ދެވަނަ ދަރަޖައިގެ މުބާރާތް ކަމުގައިވާ ޔޫރޮޕާ ލީގުގަ އެވެ.
ކުރިއަށް އޮތް ސީޒަނުގައި ޔުއެފާ ޗެމްޕިއަންސް ލީގުގައި އިޓަލީ ތަމްސީލު ކުރާނީ ލީގު ޗެމްޕިއަން އިންޓަރ މިލާނާއި ނަޕޮލީގެ އިތުރުން ރޯމާ އާއި ކޯމޯ އެފްސީ އެވެ. މީގެ ތެރެއިން މިއީ ކޯމޯ އެފްސީ އޫރަޕްގެ މުބާރާތެއްގައި ކުޅޭ ފުރަތަމަ ފަހަރެވެ.
އޭސީ މިލާން ހިންގަމުން އަންނަ ރެޑްބާރޑް ކެޕިޓަލް އިން ނެރެފައިވާ ބަޔާނެއްގައި ބުނެފައިވަނީ މި ސީޒަނުގައި އެ ކްލަބް އޮތީ ލީގަށް ވާދަކުރެވޭ ހިސާބުގައި ކަމަށާއި ނަމަވެސް ފަހު ވަގުތު ގަދަ ހަތަރެއްގެ ޖާގަވެސް ގެއްލިފައިވާތީ އެއީ ގަބޫލުކުރެވޭނެ ކަމެއް ނޫން ކަމަށެވެ.
އަދި އެކަން އެގޮތަށް އޮތުމުން ޓީމަށް ބަދަލުތަކެއް ގެނައުމަށް ކޯޗު އަލެގްރީގެ އިތުރުން ސީނިއާ ބައެއް އޮފިޝަލުން މަގާމުން ވަކިކުރުމަށް ނިންމާފައިވާ ކަމަށްވެސް އެ ބަޔާނުގައި ވަނީ ބުނެފަ އެވެ.
އެގޮތުން މަގާމުން ވަކިކޮށްފައިވާ ސީނިއާ އޮފިޝަލުންގެ ތެރޭގައި ޗީފް އެގްޒެކްޓިވް ޖިއޯޖިއޯ ފުރްލާނީ އާއި ސްޕޯޓިން ޑިރެކްޓަރ އިގްލީ ޓާރޭގެ އިތުރުން ޓެކްނިކަލް ޑިރެކްޓަރ ޖޮފްރޭ މޮންކާޑާ ހިމެނެ އެވެ.
އަލެގްރީ މިލާނުގެ ކޯޗު ކަމާއި ދެވަނަ ފަހަރަށް ހަވާލުވެފައިވަނީ މިދިޔަ އަހަރުގެ މެއި މަހު, އޭރު އެ މަގާމުގައި ހުރި ސާޖިއޯ ކޮންސެސާއޯ މަގާމުން ވަކިކުރުމަށްފަހުގަ އެވެ. އަލެގްރީ ވަނީ މީގެ ކުރިން 2010 އިން 2014 ގެ ނިޔަލަށްވެސް އޭސީ މިލާނަށް ކޯޗު ކޮށްދީފަ އެވެ.