އަންހެނުންގެ ތަރައްޤީއަށް އެންމެ ބޮޑަށް މަސައްކަތް ކުރަނީ މި ސަރުކާރުން: ރައީސް

އަންހެނުންގެ ތަރައްޤީއާއި ކުރިއެރުމަށް އެންމެ ބޮޑަށް މަސައްކަތް ކުރަނީ މި ސަރުކާރުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވީ، "ދަ ގްރޭޓަރ އައްޑޫ އިވެންޓް"ގެ ނަމުގައި އާޓިފިޝަލް ބީޗުގައި ބޭއްވި ހަރަކާތުގައި ވާހަކަފުޅުދައްކަވަމުންނެވެ.

އާޓިފިޝަލް ބީޗުގައި ޕީއެންސީން ބޭއްވި ހަރަކާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްކެވި ވާހަކަފުޅުގައި ބައިނަލްއަޤްވާމީ އަންހެނުންގެ ދުވަހާ ގުޅުވައި ވިދާޅުވީ، އަންހެނުންގެ ތަރައްޤީއަށް އެންމެ ބޮޑަށް މަސައްކަތްކުރަނީ މި ސަރުކާރުން ކަމަށާއި، އެކަން ނަތީޖާއިން ދައްކުވައިދެމުންދާކަމަށެވެ.

ރައީސް ވިދާޅުވީ، އަންހެނުންގެ ތަރައްޤީއަށް މަސައްކަތްކުރާ ކޮމެޓީތައް މިއަދާ ހަމައަށް އައިއިރު ތަރައްޤީކުރުމަށްޓަކާ ކުރިކަމެއްވިއްޔާވެސް ކޮށްފައި ވަނީ މި ސަރުކާރުންކަމަށެވެ. އެގޮތުން ޤާނޫނަށް ގެނެސްދޭން ޖެހޭ ބަދަލުތައް ގެނެސްދީ، ޑަބްލިއުޑީސީތަކުގެ މެންބަރުންނަށް ރަމަޟާންމަހުގެ އިނާޔަތް ލިބޭގޮތް ހަދައިދިނީވެސް މި ސަރުކާރުންކަން ރައީސް ފާހަގަކުރެއްވިއެވެ. އަދި ޑަބްލިއުޑީސީތަކުގެ ރައީސާއަކީ ހުރިހާ ރައްޔިތުން ވޯޓުލައިގެން ހޮވާ ފުލް ޓައިމް އެގްޒެކެޓިވް މަޤާމަކަށް ބަދަލުކުރީވެސް މި ސަރުކާރުންކަމަށް ވިދާޅުވިއެވެ.

"ކޮމެޓީތަކަށް ބަޖެޓުގެ ގޮތުގައި ކުރިން ލިބެންމުންދިޔަ %5 ގެ ބަދަލުގައި %10 އަށް ޑަބަލްކޮށްދިނީވެސް މި ސަރުކާރުން. އަދި ރަމަޟާން އިނާޔަތަކީ އެފައިސާއިން ދޭންޖެހޭ އެއްޗެއްގެ ބަދަލުގައި ކައުންސިލުގެ ބަޖެޓުން ދޭންޖެހޭ ފައިސާގެ ގޮތުގައި ކަނޑައަޅައިދިނީވެސް މި ސަރުކާރުން. އެހެންވީމަ އަންހެނުންގެ ތަރައްޤީއަށް މަސައްކަތްކުރާ ކޮމެޓީ، ކޮމެޓީއަކަށް ހަދައިދިނީ މި ސަރުކާރުން." ރައީސް ވިދާޅުވިއެވެ.

ރައީސް ޑރ. މުޢިއްޒު ވިދާޅުވީ، މިދިޔަ ދުވަސްތަކުގައި އަންހެނުން ބާރުވެރިކުރުމަށްޓަކާ އެކި ކަހަލަ ލޯނުތައް ދޫކުރުމުގެ މަސައްކަތާއި، އެކި ގޮތްގޮތުން އިޤްތިޞާދީގޮތުން ބާރުވެރިކުރުވުމަށްޓަކާ ކުރެވެން ހުރި ކަންކަން ސަރުކާރުން ކޮށްފައިވާކަމަށެވެ. އަދި މިއަހަރުގެ ތެރޭގައި އެގޮތުން ކުރަންހުރި ކަންކަން ކުރުމަށްޓަކާވެސް ކަންކަން ތަރުތީބުކުރެވިފައިވާކަމަށެވެ.

ވިމެން އެމްޕަވަރމަންޓް މެއިން ސްޓްރީމްކުރުމަކީ މި ސަރުކާރުގެ މުހިއްމު ސިޔާސަތެއްކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފާހަގަކުރައްވާފައެވެ.