ހުރާ ކަޓުވާލައި، ޕޮލިސް ކުލަބު ސެމީއަށް

އެފްއޭއެމް ވެޓެރެންސް ކަޕް 2026 ގައި ކ.ހުރާ ހުއްރިއްޔާ ސްޕޯޓްސް ކަޓުވަލާ ޕޮލިސް ކުލަބުން މުބާރާތުގެ ސެމީގެ ޖާގަ ޔަގީންކޮއްފިއެވެ. ގުރޫޕް ބީގެ މި ދެޓީމު ވާދަކުރި މެޗު ފުލުހުން ކާމިޔާބުކުރީ 3-0 ލަނޑުންނެވެ.

މާފަންނު އެއްނަންބަރު ޓާފް ދަނޑުގައި ކުޅުނު މެޗުފަށައިގެން ރަނގަޅަށް ކުޅެ ގިނަ ހަމަލާ އުފެއްދީ ޕޮލިސް ޓީމުންނެވެ. މެޗުގެ ފުރަތަމަ ހާފުގައި ދެޓީމުން ކުރެ ޓީމަކަށް ލަނޑެއް ނުޖެހު ނަމަވެސް ޕޮލިހުގެ ގިނަ ކުޅުންތެރިންނަށް މި ހާފުގައި ލަނޑުޖަހަން ގިނަ ފުރުސަތުތަކެއް ވަނީ ލިބިފައެވެ.

ޕޮލިސް ޓީމުން ފުރަތަމަ ލަނޑުޖަހާ ލީޑު ނެގީ މެޗުގެ 52 ވަނަ މިނިޓުގައެވެ. އަހުމަދު ޝާމް ދިން ބޯޅައަކުން މި ލަނޑު އެޓީމަށް ކާމިޔާބުކޮއްދިނީ އަލީ ރިޝްވާން އަހުމަދެވެ.

ޕޮލިސް ޓީމުން ލީޑު އިތުރަށް ފުޅާ ކުރީ 54 ވަނަ މިނިޓުގައި ހުރާގެ ހަސަން ނަދީމް އަތުން ބައިކޮޅަށް ވަތް ބޯޅައަކުންނެވެ. ޕޮލިސްގެ ތިންވަނަ ލަނޑަކީ މެޗުގެ އިތުރު ވަގުތުގެ ތެރޭގައި ރިޝްވާން ދިން ބޯޅައކުން ނިޝާދު އަލީ އަލީ ޖެހި ލަނޑެކެވެ.

މި ނަތީޖާ އެކު މި ގުރޫޕުން ސެމީއަށް ދިޔައީ 7 ޕޮއިންޓާ އެކު އެއްވަނައިގަ އޮތް ޕޮލިސް ކުލަބާއި، ހަމަ މިއަދަދަށް ޕޮއިންޓް ހޯދި ހުޅުމާލެ ވެޓެރެންސް ކުލަބެވެ. ހުރާ އޮތީ 3 ޕޮއިންޓާއެކު ތިންވަނައިގައެވެ. ޔޫވީ އާއި ބުރަށް ލިބެނީ އެންމެ ޕޮއިންޓެކެވެ.

މި ގުރޫޕުން ޕޮލިސް ކުލަބާއި. ހުރައަށް އަދި ބާކީ އެއްމެޗު އެބައޮތެވެ.