އަނބިމީހާ ނުވަތަ ފިރިމީހާގެ ބޯހިޔާވަހިކަމެއް އޮތް ނަމަވެސް ގޯއްޗަށް ކުރިމަތިލެވޭގޮތް ހަދައިފި

ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތް ނަމަވެސް، ގޯއްޗަކަށް ކުރިމަތިލުމުގެ ފުރުސަތު ދޭން ބޯހިޔާވަހިކަމުގެ އައު ޕްރޮގްރާމެއް އިޢުލާންކޮށްފިއެވެ. މިކަމާގުޅޭ އުޞޫލު އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން މިހާރު ވަނީ ގެޒެޓުގައި އާންމުކޮށްފައެވެ. މި އުޞޫލުގެ ދަށުން ގޯއްޗަށް އެދި ހުށަހެޅުމުގެ ފުރުޞަތު މިމަހުގެ 8 ވަނަ ދުވަހު ހުޅުވާލާނެއެވެ.

ސަރުކާރުގެ ބޯހިޔާވަހިކަމުގެ ސިޔާސަތު "ބޯހިޔާވަހިކަން އެންމެންނަށް" ސިޔާސަތުގެ ދަށުން ފްލެޓާއި ގޯއްޗަށް އެދި ހުށަހެޅުމުގެ ފުރުޞަތު ހުޅުވާލީ ޖަނަވަރީ މަހުގެ 18 ވަނަ ދުވަހުއެވެ. މި ފުރުސަތު ހުޅުވާލިއިރު، އުސޫލުގައި ހިމެނޭ ކަންކަމުގެ ތެރޭގައި އެންމެ ބޮޑު ކަންބޮޑުވުމަކަށްވީ މީގެ ކުރީގެ އުސޫލުތަކުގައިވެސް އޮންނަ ގޮތަށް ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތްނަމަ ޝަރުތުހަމަ ނުވާ ގޮތަށް އޮތުމެވެ.

ސަރުކާރުން ހުޅުވާލާފައިވާ އެންމެންނަށް ބޯހިޔާވަހިކަމުގެ ސްކީމަށް މިހާތަނަށް ގިނަ އަދަދެއްގެ ފަރާތްތަކުން ކުރިމަތިލާފައިވާއިރު ފްލެޓަށް އޮންނަ ޑިމާންޑަށް ވުރެ ގޯއްޗަށް އޮތް ޑިމާންޑު ދަށް ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއެވެ. ރައީސުލްޖުމްހޫރިއްޔާ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ވަޒީރު ވަނީ މިކަން ތަފްސީލްކޮށްދެއްވާ ސަރުކާރުގެ ބޯހިޔާވަހިކަމުގެ ސްކީމަށް މިހާތަނަށް ކުރިމަތިލާފައިވާ ފަރާތްތަކުގެ ބައެއް ތަފާސްހިސާބުތައް ހިއްސާކޮށްދެއްވާފައެވެ.

ވަޒީރު ޑރ. މުއްޠަލިބު ވިދާޅުވީ މި ސްކީމަށް މިހާތަނަށް ކުރިމަތިލާން ހުށަހަޅާފައިވާ އަދަދުތަކަށް ބަލާއިރު އެކި ހުށަހެޅުމުގެ އެކި މަރުހަލާތަކުގައިއާއި މިހާތަނަށް ހުށަހަޅާފައިވާ ފޯމުތައް ހިމެނޭޙެން ޖުމްލަ 18،399 އެޕްލިކޭޝަނެއް އޮތް ކަމަށެވެ.

ފްލެޓް:

* ހުށަހެޅުމުގެ މަރުހަލާގައި - 8466 އެޕްލިކޭޝަން
* ހުށަހަޅާފައި - 3396 އެޕްލިކޭޝަން

ގޯތި:

* ހުށަހެޅުމުގެ މަރުހަލާގައި - 2851 އެޕްލިކޭޝަން
* ހުށަހަޅާފައި - 2513 އެޕްލިކޭޝަން

ހިޔާ ކެޓަގަރީ:

* ހުށަހެޅުމުގެ މަރުހަލާގައި - 220 އެޕްލިކޭޝަން
* ހުށަހަޅާފައި - 953 އެޕްލިކޭޝަން

މި ސްކީމަށް ގިނަ އަދަދެއް ފަރާތްތައް ކުރިމަތިލަމުންދާއިރު ވަޒީރު ވިދާޅުވީ ސްކީމަށް ހުޅުވާލިއިރުވެސް މިކަމަށް 20،000 އަށް ވުރެ ގިނަ ފަރާތްތައް ކުރިމަތިލާނެ ކަމަށް ބެލެވުނު ކަމަށެވެ. ނަމަވެސް ގޯއްޗަށް އޮތް ޑިމާންޑު ދަށްވުމާއެކު ގޯތި ހޯދުމަށް އިތުރު ފުރުސަތެއް ދިނުމަށް "ގޯތި-ގެދޮރު" ގެ ނަމުގައި އައު ޕްރޮގްރާމެއް ކުރިއަށް ގެންދަން ނިންމާފައިވާ ކަމަށެވެ.

"މީގައި މިވާގޮތުން ފިރިމީހާ ނުވަތަ އަނބިމީހާ ތަނެއް އޮތް ނަމަވެސް އެމީހަކަށް ގޯއްޗަށް ކުރިމަތިލުމުގެ ފުރުސަތު ދެވިގެން މިދަނީ. އޭރުން ފިރިމީހާ އަނބިމީހާ ފްލެޓެއް އޮތްނަމަވެސް މުސްތަޤުބަލުގައި ބިމެއް ހޯދުމުގެ ފުރުސަތު ފަހިވެގެންދޭ." ވަޒީރު ޑރ. އަބްދުﷲ މުއްޠަލިބު ވިދާޅުވިއެވެ.

މިހާރު ފުރުސަތު ހުޅުވާލާފައިވާ ބޯހިޔާވަހިކަމުގެ ސްކީމުގައި ކެޓަގަރީ 1، މާލޭ ރަށްވެހިންނަށް އަދި ޚާއްޞަ އިސްކަންދެވޭ ކެޓަގަރީތަކަށް ގޯތި ދޫކުރާނީ ގްރޭޓަރ މާލޭ ސަރަހައްދުންނާއި ރަސްމާލެ އިންނެވެ. އަދި މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރުމަށް ހަމަޖެހިފަވަނީ ރަސްމާލެއިންނެވެ.

މި އުސޫލުގެ ދަށުން 7،900 ފްލެޓް ދޫކުރެއެވެ. އެއީ މާލެއާއި ވިލިމާލެ ހިމެނޭހެންނެވެ. ފްލެޓް ދޫކުރުމުގައި މާލޭގެ ރަށްވެހިންނަށް 4,000 ފްލެޓް، މާލޭގައި ދިރިއުޅޭ އެހެން ރަށްރަށުގެ މީހުންނަށް 1,500 ފްލެޓް އަދި ޚާއްޞަ އިސްކަންދޭ ކެޓަގަރީތަކަށް 2,400 ފްލެޓް ވަނީ ކަނޑައަޅާފައެވެ.