އަނެއްކާ ވެސް ގާނާގެ ކޯޗުކަން ކީރޯޒް ދޫކޮށްލައިފި

ތިން މަސް ދުވަހުގެ ތެރޭގައި ދެވަނަ ފަހަރަށް ގާނާގެ ކޯޗުކަން ކާލޮސް ކީރޯޒް ދޫކޮށްލައިފިއެވެ.

ތަޖުރިބާކާރު ކޯޗު ގާނާގެ ކޯޗުކަމަށް އެންމެ ފުރަތަމަ ގެނައީ މިދިޔަ މެއި މަހުއެވެ. ނަމަވެސް ޖުލައި މަހު ފެށި ވޯލްޑް ކަޕުގައި ކާމިޔާބު ނުހޯދުމުން އޭނާ މަގާމު ދޫކޮށްލިއެވެ. ނަމަވެސް އޭނާ އާއި ގާނާ ފުޓްބޯޅަ ފެޑަރޭޝަނާ ދެމެދު ކުރެވުނު މަޝްވަރާތަކަށް ފަހު އަލުން ކޯޗުކަމަށް އައްޔަން ކުރީ މިދިޔަ ސެޕްޓެމްބަރު މަހުއެވެ. ނަމަވެސް މަހެއްވެސް ނުވަނީސް އޭނާ ކޯޗުކަން ދޫކޮށްލީ އެފްރިކާ ކަޕް ކޮލިފައިންގައި އައިވަރީ ކޯސްޓާއި ގެންބިއާ އަތުން ބަލިވުމުންނެވެ.

"މިއީ ފަސޭހަ ނިންމުމެއް ނޫން. ގާނާގެ ކޯޗުކަން ކުރުމަކީ ޝަރަފެއް. އަހަރެން ވަރަށް އިހްތިރާމާއެކު ގާނާގެ ފުޓުބޯޅަ ފެޑަރޭޝަނަށް ޝުކުރު އަދާކުރަން. ޚާއްސަކޮށް ރައީސް އަހަރެންނާމެދު ބެހެއްޓީ ގާތްކަމާއި ދެއްވި އެއްބާރު ލުމަށް،" ގާނާގެ ފުޓުބޯޅަ އެސޯސިއޭޝަނާއި އޭނާއާ ގުޅިގެން ނެރުނު ބަޔާނުގައި ކީރޯޒް ބުނެފައިވެއެވެ.

އޭނާ ބުނީ ގާނާގެ ކޯޗުކަމާ ހަވާލުވީ ކުރިމަގަށް ވަރުގަދަ ޓީމެއް ބިނާ ކޮށްދިއުމުގެ އަޒުމުގައި ކަމަށެވެ. ނަމަވެސް އަހަރުމެން ކުރި މަޝްވަރާތާކާ އެއްގޮތަށް ކަންކަން ރަނގަޅަށް ތަރުތީބު ނުކުރެވުނު،" ކީރޯޒް ބުންޏެވެ.

ރެއާލް މެޑްރިޑާއި ޕޯޗުގަލް އަދި އިރާނުގެ ކޯޗުކަން ވެސް ކުރި ކޯޗުގެ ބެލުމުގެ ދަށުން ގާނާ ކުޅުނީ އެންމެ 7 މެޗެވެ. މޮޅުވީ އެންމެ މެޗަކުންނެވެ.

މެންޗެސްޓާ ޔުނައިޓެޑްގައި ދެ ފަހަރެއްގެ މަތީން ކޯޗު ސާ އެލެކްސް ފާގަސަންގެ އެހީތެރިއަކަށް މަސައްކަތް ކުރި ކީރޯޒް ބުނީ ގާނާގެ ފުޓުބޯޅަ ރަނގަޅު ކުރުމަށް ގިނަގުނަ ކަންކަން ބަދަލު ކުރަން ޖެހޭ ކަމަށާއި އައު ކޯޗަކާއެކު އޭނާ އުއްމީދު ކުރަނީ ކަންކަން ބަދަލު ކުރާނެ ކަމަށް ކަމަށެވެ.

ގާނާ އަކީ ކީރޯޒް ކޯޗުކޮށްދިން ނުވަ ވަނަ ގައުމެވެ. އޭނާ މީގެ ކުރިން ކޯޗު ކޮށްދިން ގައުމުތަކަކީ ދެކުނު އެފްރިކާ އާއި ޔޫއޭއީ އާއި ކޮލަމްބިއާ އާއި މިސްރާއި ގަތަރު އަދި އޮމާނެވެ.