މައިގަނޑު ޕްލޭނަކީ ޒުވާން ކުޅުންތެރިން ކުރިކެޓަށް ނެރުން: ރިޒާން

އަމާޒަކީ ކުރިކެޓް ބޯޑް އޮފް މޯލްޑިވްސް (ސީބީއެމް)ގެ ޕްލޭނާއި އެއްގޮތަށް 5000 އައު ކުޅުންތެރިން ކުރިކެޓަށް ނެރުންކަމަށް ސީބީއެމްގެ އައު ސެކްރެޓަރީ ޖެނެރަލް އިބްރާހިމް ރިޒާން ވިދާޅުވެއްޖެއެވެ.

މަގާމަށް އިންތިޚާބުވުމާއި ގުޅިގެން ޕީއެސްއެމް ނިއުސްއަށް ދެއްވި އިންޓަވިއުއެއްގައި ރިޒާން ވަނީ ކުރިކެޓް ތަރައްޤީކުރުމަށް ރާވާފައިވާ ޕްލޭންތަކާއި ގުޅޭގޮތުން ވާހަކަދައްކަވާފައެވެ. އޭނާ ވިދާޅުވީ ސީބީއެމްގެ އަމާޒާއި އެއްްގޮތަށް 2030 ގެ ކުރިން 5000 އައު ކުޅުންތެރިން ކުރިކެޓަށް ނެރުމަކީ އެންމެ ބޮޑު ސަމާލުކަމެއްދީގެން ކުރަމުންގެންދާ އެއް މަސައްކަތްކަމަށެވެ.

އެ ޕްލޭނުގެ ދަށުން "ސީޑްސް"ގެ ނަމުގައި ވައިޑީޕީ ޕްރޮގްރާމެއް ސީބީއެމްއިން ފަށާފަވާއިރު މިހާތަނަށް މާލޭގެ އިތުރުން ފުވައްމުލަކާއި ކުނަހަންދޫގައިވެސް މި ހަރަކާތްވަނީ ކާމިޔާބުކަމާއިއެކު ހިންގާފައެވެ. އެގޮތުން މި ކުޅިވަރު އަތޮޅު ތެރެއަށް ފުޅާކުރުމަށްޓަކައި ކުރަމުންދާ މަަސައްކަތުގެ ތެރެއިން ކުޅުދުއްފުށި ސިޓީގައި މިއަހަރު "ސީޑްސް" ޕްރޮގްރާމު ފެށޭނެކަމަށް އޭނާ ހާމަކުރެއްވިއެވެ.

އޭގެ އިތުރުން ތިނަދޫ ސިޓީގައިވެސް "ސީޑްސް" ޕްރޮގްރާމު ހިންގުމަށް ރާވަމުންދާއިރު އެކަމަށް އަމަލީ ސިފައެއް ގެނައުމަށް އެސިޓީގެ ކައުންސިލާއި ގުޅިގެން މަސައްކަތްތަކެއް ކުރެވެމުންދާކަމަށް ރިޒާން ފާހަގަކުރެއްވިއެވެ.

"އަޅުގަނޑުގެ ޕްލޭނަކީ ވައިޑީޕީ ޑެވެލޮޕްކުރުން، "ސީޑްސް" ޕްރޮގްރާމުގެ 2030 ގެ ޕްލޭން ފުރިހަމަކޮށްދިނުން. އެގޮތުން މިއަހަރުގެ ބޮޑު އެއްް ޕްލޭނެއްގެ ގޮތުން ފައްޓާފަ އިންނާނީ ކުޅުދުއްފުށީގަ ކުރިކެޓް ޑެވެލޮޕްކުރުމުގެ ޕްރޮގްރާމެއް. އެކަން މިއަހަރުގެ ތެރޭގައި ކުރާނަން. ދެން މިހާރު މިކަންވަނީ ތިނާދޫގަވެސް ފެށިފަ. މިކަން އިތުރަށް ޑެވެލޮޕްކުރުމަށް ކައުންސިލާއި ވާހަކަދަައްކަމުން މިދަނީ. ދަނޑެއް ނުވަތަ ޕްރެކްޓިސްކޮށްލަން ޖާގައެއް ހޯދުމަށް" ރިޒާން ވިދާޅުވިއެވެ.

ސީބީއެމްގެ ސެކްރެޓަރީ ޖެނެރަލްގެ މަގާމަށް ރިޒާން އައްޔަނުކޮށްފަވަނީ މިއަހަރުގެ ޖެނުވަރީ މަހުގެ ފުރަތަމަ ދުވަހުންފެށިގެން މިއަހަރުގެ ނިޔަލަށެވެ. ކުރިކެޓުގެ ތަރައްޤީއާއި ގުޅުންހުރި އެންމެހާ ކަންކަމެއްގައި އޭނާގެ އެއްބާރުލުން އެންމެ ފުރިހަމަގޮތުގައި ދެއްވާނެކަމަށް އޭނާ ހާމަކުރެއްވިއެވެ. އަދި ކުރިއަށް އޮތް ފަސް އަހަރުގެ ތެރޭގައި ސީބީއެމްއިން ބޮޑެތި ޕްލޭންތަކެއް ރާވާފަވާކަމަށާއި، އެ ޕްލޭނާއި އެއްގޮތަށް ކަންކަން ސީދާވެއްޖެނަމަ ކުރިކެޓަށް އުޖާލާ ދުވަސްތަކެއް ފެނިގެންދާނެކަމަށް އޭނާވަނީ ވިދާޅުވެފައެވެ.

"ފުދޭވަރަކަށް ބޮޑެތި ބަދަލުތައް އެބަހުރި ކުރިއަށް ހުރި ފަސް އަހަރުގެ ތެރޭގައި، އަޅުގަނޑު ބުނިހެން 2030 އަށް ދާންވާއިރަށް މިހުރިހާ ކަމެއް ކޮމްޕްލީޓްވެއްޖާމުން ވަރަށް ރަނގަޅުވާނެ" ރިޒާން ވިދާޅުވެފަވެއެވެ.

ކުރިކެޓަށް ދިމާވެފައިވާ އެންމެ ބޮޑު އެއްގޮންޖެހުމަކީ ނެޗުރަލް ޓާފެއް ރާއްޖޭގައި ނެތުންކަމަށްވާއިރު، އެކަމަށް ހައްލެއް ހޯދުމަށް ބޭރުގެ ފަރާތްތަކާ އެކު މަޝްވަރާތައް ކުރިއަށްދާކަމަށް ރިޒާން މައުލޫމާތުދެއްވިއެވެ.

އުންމީދަކީ ކައިރި މުސްތަގުބަލެއްގައި އެކަމަށްވެސް ހައްލެއް ލިބިގެން ދިޔުންކަމަށް އޭނާވަނީ ވިދާޅުވެފައެވެ.

ސީބީއެމްއިންގެ ފަރާތުން މިއަހަރަށްވެސް ވަނީ ގިނަ މުބާރާތްތަކެއް ރާވާފައެވެ. އެގޮތުން އެންމެ އަވަހަށް ފެށޭނީ ރަމަޟާން ކުރިކެޓް ކާނިވަލުގެ ނަމުގައި ކުރިއަށްދާ ތިން މުބާރާތެވެ. އެއީ ހަމައެކަނި ދިވެހިންނަށް ވާދަކުރެވޭގޮތަށް ކުރިއަށްގެންދާ އޯޕަން މުބާރާތާއި، އޮފީސްތަކަށް ޚާއްސަކޮށްގެން ކުރިއަށްގެންދާ މުބާރާތުގެ އިތުރުން ކުންފުނިތަކަށް ޚާއްސަކޮށްގެން ބާއްވާ ކޮންޕެނީ މުބާރާތެވެ.

މި ކާނިވަލުގައި ބައިވެރިވުމުގެ ސުންގަޑި އަންނަ ފެބުރުވަރީމަހުގެ 6 ވަނަ ދުވަހާއި ހަމައަށް ހުޅުވިފަވާއިރު، މިކާނިވާ ފުވައްމުލަކާއި ލ. ކުނަހަންދޫގައިވެސް ބާއްވާގޮތަށް ސީބީއެމްއިންވަނީ ނިންމާފައެވެ.