މަޖީދިއްޔާ ސްކޫލްގެ އައު އިމާރާތުގެ މަސައްކަތް ފަށަނީ

މަޖީދިއްޔާ ސްކޫލުގެ އައު އިމާރާތުގެ ކުރެހުމުގެ މަސައްކަތް ނިމިފައިވާކަމަށާއި، 2 މަހެއްހާ ދުވަހުގެ ތެރޭގައި މަސައްކަތް ފެށޭނެކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

ރާއްޖޭގެ ފުރަތަމަ ސްމާޓް ކްލާސްރޫމްތަކާއެކު މަޖީދިއްޔާ ސްކޫލުގެ އައު އިމާރާތް އެޅުމަށް ހަމަޖެހިފައިވަނީ ކުރީގެ ދަރުމަވަންތަ ސްކޫލު ހުރި ބިމުގައެވެ.

ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ މާލެ ސަރަހައްދުގައި ކުރިއަށް ގެންދިޔުމަށް ހަމަޖެހިފައިވާ އުމްރާނީ ތަރައްޤީގެ މަޝްރޫޢުތަކުގެ ތެރެއިން ސީއެޗްއެސްސީގެ އައު އިމާރާތުގެ މަސައްކަތް ބަޔަކާ ހަވާލުކުރުމުގެ މަރުހަލާގައި އޮތްކަމަށެވެ. އަދި ޣާޒީ ސްކޫލަށް 18 ކްލާސްރޫމް އިތުރުކުރުމުގެ މަސައްކަތް ކުރަމުންދާކަމަށާއި މިއަހަރުގެ ފުރަތަމަ ކުއަޓާގައި ހުޅުމާލޭގައި އައު ސްކޫލެއް އިމާރާތް ކުރުމުގެ މަސައްކަތް ފެށުމަށްވެސް މަސައްކަތް ކުރައްވާކަމަށް ވަޒީރު ވިދާޅުވިއެވެ.

މީގެ އިތުރުން ވަޒީރު ވަނީ މަޖީދިއްޔާ ސްކޫލްގެ އައު އިމާރާތުގެ މަސައްކަތް 2 މަހެއްހާ ދުވަހުގެ ތެރޭގައި ފެށޭނެކަމަށްވެސް ވިދާޅުވެފައެވެ. އަދި އެ މަސައްކަތް ފެށުމަށްޓަކައި އިންޖިނިއަރިންގެ މަސައްކަތްތަކާއި ކުރެހުމުގެ މަސައްކަތް މިހާރު ފުރިހަމަކޮށްފައިވާކަމަށް ވަޒީރު ވިދާޅުވިއެވެ. ވަޒީރު ވިދާޅުވީ މިހާރު އެ މަސައްކަތް ފެށުމަށްޓަކައި ތައްޔާރުވެފައިވާކަމަށެވެ. ދަރުމަވަންތަ ސްކޫލު ހިންގި އިމާރާތް ހުސްކުރުމުގެ މަސައްކަތް މިހާރު އަންނަނީ ކުރަމުންނެވެ.

ރާއްޖޭގެ ފުރަތަމަ ސްމާޓް ކްލާސްރޫމްތަކާއެކު މަޖީދިއްޔާ ސްކޫލުގައި 40 ކްލާސްރޫމްގެ އައު އިމާރާތެއް އަޅާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާން ކުރެއްވީ 2024 ވަނަ އަހަރު މަޖީދިއްޔާ ސްކޫލުގެ "ސައްތަވީ ބިނާ" އިފްތިތާހުކުރުމަށް ބޭއްވި ރަސްމިއްޔާތުގައެވެ. އެ ސްކޫލްގެ ދާރުލް އުލޫމަކީ ތައުލީމާ ގުޅުންހުރި ދާރުލްއާސާރަކަށް ހައްދަވައިދެއްވާނެކަމަށްވެސް ރައީސް ވިދާޅުވިއެވެ. އެގޮތުން އެ ކްލާސްރޫމްތަކުގެ ތެރެއިން ބައެއް ކްލާސްތަކަކީ ސްމާޓް ކްލާސްތައް ގޮތުގައި ރާއްޖޭގައި ފުރަތަމަ ފަހަރަށް ގާއިމްކުރެވޭ ސްމާޓް ކްލާސްތަކަށްވާނެކަމަށް ރައީސް ވަނީ ވިދާޅުވެފައެވެ.

މަޖީދިއްޔާ ސްކޫލްގެ އައު އިމާރާތުގެ މަސައްކަތް ކުރުމަށް ހަވާލުކޮށްފައިވަނީ ފެޑޯ ޕްރައިވެޓް ލިމިޓެޑް ކިޔާ ދިވެހި ކުންފުންޏަކާއެވެ.