ނިއުއިން ޗެމްޕިއަން މާޒިޔާ ހިފަހައްޓައިފި

ދިރާގު ދިވެހި ޕްރިމިއަރ ލީގުގައި ނިއު ރޭޑިއަންޓް ސްޕޯޓްސް ކުލަބުން ލީގު ޗެންޕިއަން މާޒިޔާ ސްޕޯޓްސް އެންޑް ރެކްރިއޭޝަން މޮޅުވިޔަ ނުދީ ހިފަހައްޓައިފިއެވެ.

މެޗަށް ނުކުތް އިރު ލީގު ކަށަވަރުކޮއްފަވާ މާޒިޔާ އާއި ނިއު މެޗު ނިމުނީ 2-2 ލަނޑުން އެއްވަރުވެގެންނެވެ. މި ނަތީޖާ އެކު މާޒިޔާ ލީގު އެއްވަނަ ލިބެނީ 45 ޕޮއިންޓާއެކުއެވެ. މިމެޗުން ހޯދި ޕޮއިންޓާ އެކު ނިއު ވަނީ ލީގުގެ ތިންވަނަ ކަށަވަރުކޮށްފައެވެ. އެއީ 17 މެޗުން ހޯދި 34 ޕޮއިންޓާއެކުއެވެ.

ރަސްމީ ބޯޅަ ދަނޑުގައި ކުޅުނު މެޗުގަ ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މެޗުގައި ދެ ޓމުން ވެސް ވަނީ ލަނޑުޖަހާނެ ގިނަ ފުރުސަތު ތަކެއް ތަނަވަސް ކޮއްފައެވެ. މެޗުގެ ފުރަތަމަ ހަމަލާ މާޒިޔާ އިން ލިބުނު ހިލޭޖެހުމަކުން އޭރިޔާ ބޭރުން އިބްރާހިމް އައިސަމް ފޮނުވާލި ބޯޅަ ދިއައީ ދަނޑިމަތިން ބޭރަށެވެ.

މެޗުގެ 11 ވަނަ މިނުޓުގައި ނިއުގެ އަލީ ފާސިރު އޭރިއާ ތެރެއަށް ވަދެ ފޮނުވާކި ބޯޅަ މާޒިޔާގެ ކީޕަރު ވަނީ ވެއްޓިގެންފަ ދިފާއުކޮއްފައެވެ. އަނެއްކާވެސް މާޒިޔާގެ އުފެއްދި ހަމަލާއެއްގައި މެޗުގެ 21 ވަނަ މިނިޓުގައި އެޓީމުގެ ގާނާ މިޑްފީލްޑަރ ރޭގަން އޮބެންގް އޭރިއާ ތެރެއިން ބޯޅަ ފޮނުވާލުމުން ދިފާއުކޮށް ބޭރުކޮއްލީ ނިއުގެ ޑިފެންޑަރ މުހައްމަދު ނިޒާމްއެވެ.

މެޗުގެ 25 ވަނަ މިނިޓުގެ މާޒިޔާގެ ކަޒަކިސްތާން ޑފެންސިވް މިޑްފީލްޑަރ ނާޒިމް މަމަޒާދާ ބޮލުން ފޮނުވާލި ބޯޅައެއް ދިޔައީ ގޯލާ އަމާޒު ނުވެއެވެ. މެޗުގެ ދެވަނަ ހާފުގެ ފުރަތަމަ މިނިޓުގައި މާޒިޔާ އަހުމަދު އައިހަމް އޭރިއާ ތެރެއިން އަރިމަތިން ފޮނުވާލި ބޯޅަ ނިއުގެ ކީޕަރު ވަނީ ދިފާއުކޮއްފައެވެ.

މެޗުގެ މާޒިޔާ އިން ލަނޑުޖަހާ ލީޑު ނެގީ 47 ވަނަ މިނިޓުގައި ހަސަން ނަޒީމް އޭރިއާ ތެރެއިން ލިބުނު ބޯޅައެއްގައި ގޯލުގެ ދުރުކަނަށް އަމާޒުކޮށް ފޮނުވާލައިގެން ކާމިޔާބު ކުރި ލަނޑުންނެވެ. މި ލަނޑަށްފަހު މާޒިޔާގެ އައިސަމް ނަގައިދިން ކޯނަރެއްގައި ސަމޫހު އަލީ ވަނީ ބޮލުން ޖައްސާ ގޯލަށް ވައްދާލާފައެވެ. ސަމޫހު މި ލަނޑުޖެހީ 58 ވަނަ މިނިޓުގައެވެ.

މާޒިޔާ ދެލަނޑުގެ ލީޑެއް ނެގުމާއެކު ނިގެ ކުޅުން ރަނގަޅުކޮށް މާޒިޔާގެ ގޯލަށް ނުރައްކާ ކުރަމުން ދިއައެވެ. އެގޮތުން ނިއުގެ ނައިޖީރިއާ ފޯވާޑް އަލްހާޖީ ގެރޯ އޭރިއާ ތެރެއިން އެނބުރިލާފަ ފޮނުވާލި ބޯޅަ ދިފާއު ކުރީ ކީޕަރެވެ.

ނިއުގެ ފުރަތަމަ ލަނޑަކީ ލިބުނު ކޯނަރެއްގައި ހާޖީ އޭރިއާ ތެރެއިން ބޮލުން ގޯލަށް ވައްދައިލައިގެން ކާމިޔާބު ކުރި ލަނޑެކެވެ. ހާޖީ މި ލަނޑުޖެހީ މާޒިޔާ ލަނޑު ޖެހިތާ މިނިޓެއް ފަހުންނެވެ.

މެޗުގެ ފަހު 10 މިނިޓް ވަރަށް ފޯރިގަދެވެގެން ދިޔައިރު މި ވަގުތުކޮޅު ތެރޭގައި ނިއު ވަނީ ކުރިއަށް ޖެހި މާޒިޔާގެ ގޯލަށް ނުރައްކާ ކޮއްފައެވެ. މެޗުގެ 85 ވަނަ މިނިޓުގައި މާޒިޔާގެ އައިހަމް ހުސްކޮށް ހުރެ އޭރިއާ ތެރެއިން ހުސްކޮށް ހުރެ ފޮނުވާލި ބޯޅަ ކީޕަރު ދިފާއު ކުރުމުން ދެން ހަސަން ޝިފާޒް ފޮނުވާލުމުން ވަނީ ގޯލާ އަމާޒު ނުވެފައެވެ.

ނިއު އިން ނަތީޖާ ހަމަހަމަ ކުރީ އިތުރުވަގުތުގެ ފަހު މިނިޓުގައި އޭރިއާ ތެރެއިން ހާޖީ ކީޕަރު ކައިރިން ނައްޓާލަން އުޅުމުން މާޒިޔާ ކީޕަރު ހުސެއިން ޝަރީފް ކުރި ފައުލަކަށް ދިން ޕެނެލްޓީ ކާމިޔާބު ކުރި ލަނޑުންނެވެ. މި ޕެނެލްޓީ ގޯލަށް ވައްދާލީ އަލީ އަޝްފާގެވެ. އަޝްފާގު ލަނޑު ޖެހުމާއެކު ރެފްރީ ވަނީ ކުޅުން ނިންމާލައިފއެވެ.

މި ނަތީޖާ އެކު މިއީ އަދި ލީގުގަ ބަލިނުވެ އޮތް މާޒިޔާ އެއްވަރުވި ތިންވަނަ މެޗެއެވެ. ލީގުގެ ފަހު މެޗުގައި މާޒިޔާ ނުކުންނާނީ އޮޑިއާ ދެކޮޅަށެވެ.