އާސެނަލް އަށް ތަށި ހޯދިދާނެތަ؟

އެންމެ ފަހުން ކުޅުނު ތިން މެޗުން ހަތް ޕޮއިންޓް ގެއްލުވައިލުމާއެކު އާސެނަލްއަށް އިނގިރޭސި ޕްރެމިއާ ލީގު ކާމިޔާބު ކުރެވިދާނެ ކަމާމެދު ގިނަ ބަޔަކު ސުވާލު އުފައްދަން ފަށައިފިއެވެ.

ވިދިވިދިގެން ތިން ވަނަ ސީޒަނެއްގައި ދެވަނައިގައި އޮތުމަށްފަހު އާސެނަލް މި ސީޒަނަށް އިންވެސްޓް ކުރީ ތަށި ހޯދުމަށެވެ. މިހާރު ވެސް އެ ޓީމު އެއްވަނައިގައި އޮތީ ދެ ވަނައިގައިވާ މެންޗެސްޓަރ ސިޓީއަށްވުރެ ހަތަރު ޕޮއިންޓް ކުރިންނެވެ. ނަމަވެސް މެންޗެސްޓަރ ޔުނައިޓެޑް އަތުން ހޮނިހިރު ދުވަހު ބަލިވުމާއެކު އާސެނަލްއަށް ފާޑުކިއުން ވަނީ އޮހެން ފަށައިފައެވެ.

އާސެނަލްގެ ކުރީގެ ކެޕްޓަން އަދި އެ ކުލަބަށް އެންމެ ފަހުން ޕްރިމިއާ ލީގު ކާމިޔާބުކޮށްދިން މިޑްފީލްޑަރު ޕެޓްރިކް ވިއޭރާ ބުނީ ޓީމަށް ލީޑަރެއް ބޭނުންވާ ކަމަށެވެ.

"ނަފްސާނީ ގޮތުން ޓީމު ތައްޔާރުވެފައިވާ ތަނެއް ނުފެނޭ. ބަލިވުމަކީ މައްސަލައެއްނޫން. އެކަމަކު ބަލިވި ގޮތް މައްސަލަ އަކީ. 84 ވަނަ މިނިޓްގައި އެއްވަރުކޮށްފައި މެޗުން ބަލިވީމާ ނަފްސާނީ ގޮތުން ތައްޔާރުވެފައިވާ މިންވަރާ މެދު ސުވާލު އުފެދޭ. ދެ އަރިމަތިން ސަކާ އާއި ޓްރޮސާޑް އެކަށީގެންވާ ގޮތަކަށް ފުރުސަތު ނުހޯދޭ. އަހަރެން ދެކޭ ގޮތުގައި ޓީމަށް ލީޑަރެއް ބޭނުންވޭ. މުހިންމު ވަގުތުތަކުގައި ޓީމު ހަމަޔަކަށް އަޅުވައި ހިތްވަރުދީ ޖޯޝް ގެނުވާނެ ލީޑަރެއް މުހިންމު،" ފްރާންސްގެ ކެޕްޓަންކަން ވެސް ކުރި ވިއޭރާ ބުންޏެވެ.

ވިއޭރާ އާސެނަލްއަށް ކުޅުނު ދުވަސްވަރަކީ އެ ކުލަބުގެ އެންމެ ކާމިޔާބު އެއް ދުވަސްވަރެވެ. އޭރުގެ ކޯޗު އާސެން ވެންގާ ވެސް ބުނީ ޕްރިމިއާ ލީގު ކާމިޔާބު ކުރާނަމަ އާސެނަލް މިހާރަށްވުރެ ހަރުދަނާ ވާން ޖެހޭ ކަމަށެވެ. އާސެނަލްގެ މިހާރުގެ ކޯޗު މިކޭލް އާޓެޓާ އަކީ ވެސް ވެންގާގެ ކޯޗުކަމުގައި އާސެނަލްގެ ކެޕްޓަންކަން ކުރި ކުޅުންތެރިއެކެވެ. ވެންގާ ބުނީ އާޓެޓާއަކީ ލީޑަރެއް ކަމަށާއި ނަމަވެސް ތަށި ހޯދަން ފަރުވާތެރިވާން ޖެހޭ ކަމަށެވެ.

މެންޗެސްޓަރ ޔުނައިޓެޑްގެ ކުރީގެ ކެޕްޓަން ރޯއި ކީން ބުނީ އާސެނަލް ފާއިތުވެދިޔަ ސީޒަންތަކުގައި ތަށި ގެއްލުވައިލީ ސީޒަނުގެ ފަހުބައިގައި ކަމަށާއި މިއީ އަނެއްކާ ވެސް އެފަދަ ކަމެއް ހިނގާފާނެ ކަމަށް ބެލެވޭ ވަގުތެއް ކަމަށެވެ. މިހެންވެ ތަށި ހޯދުމަށް ސީޒަނުގެ އެންމެ ބުރަ ދުވަސްކޮޅު އާސެނަލް ތަފާތު ކުޅުމެއް ދައްކަން ޖެހޭ ކަމަށެވެ.

މި ސީޒަނުގައި އާސެނަލްއަށް ތަށި ނުލިބިއްޖެނަމަ ކޯޗު އާޓެޓާއަށް އިތުރަށް ޕްރެޝަރު ކުރިމަތިވާނެއެވެ. އޭނާ ބޭނުންވާ ކުޅުންތެރިން ހޯދުމަށް އާސެނަލް ވަނީ މި ސީޒަނުގައި ވަރަށް ބޮޑަށް ޚަރަދު ކޮށްފައެވެ.