އެފްޑީސީގެ ޓަވަރުތަކަށް ކަރަންޓް ގުޅައި ނިންމާލައިފި
-
ޓަވަރުތަކަށް ކަރަންޓު ދީ ޓެސްޓިންގ މަރުހަލާވަނީ ނިންމާލާފައި
-
ބައެއް ޢާއިލާތައް ވަނީ ފްލެޓްތަކަށް ބަދަލުވެފައި
ހުޅުމާލޭ ދެވަނަ ފިޔަވަހީގައި ފަހިދިރިއުޅުން ކޯޕަރޭޝަން، އެފްޑީސީން ތަރައްޤީކޮށްފައިވާ ހައުސިންގ ޔުނިޓުތަކަށް ކަރަންޓު ގުޅައި ނިންމާލައިފިއެވެ. ސްޓެލްކޯއިން ވިދާޅުވީ މިކަމާއި ގުޅޭ ޓެސްޓުތައްވެސް މިހާރު ނިމިފައިވާ ކަމާށެވެ.
ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ ފްލެޓްތަކަށް ކަރަންޓުގެ ޚިދުމަތް ފޯރުކޮށްދިނުމުގެ މަސައްކަތް ނިމިފައިވާކަން ހާމަކޮށް ސްޓެލްކޯއިން ވިދާޅުވީ އެކުންފުނިން ކުރަމުންއައި އެ މަސައްކަތް މިހާރު ނިންމާލާފައިވާ ކަމަށެވެ. މިމަަސައްކަތުގެ ދަށުން މެއިން ޕެނަލްތަކަށް ކޭބަލް އޭޅުމަށް، ކަނެކްޝަންތައް ހަދައި ޓެސްޓުކުރުމުގެ މަސައްކަތާއި ޕެނަލްތަކުން ފެށިގެން އެޕާޓްމަންޓްތަކާ ހަމައަށް ކަރަންޓު ގުޅައިދިނުމަށް ކުރަންޖެހޭ ހުރިހާ ފަންނީ މަސައްކަތްތަކެއްވެސް ފުރިހަމަ ކުރެވިފައިވާ ކަމަށް ސްޓެލްކޯއިން ވިދާޅުވެއެވެ.
އެފްޑީސީގެ 4000 ފްލެޓަށް ކަރަންޓު ދެވިފައިވާއިރު، މިއަހަރު ފެށުނުއިރު އެމްޑަބްލިއުއެސްސީން ވަނީ މި ޓަވަރުތަކަށް ފެނާއި ނަރުދަމާ ގުޅައި ނިންމާލާފައެވެ. މިއާއެކު އަސާސީ ހުރިހާ ޚިދުމަތެއް މި ފްލެޓްތަކަށް މިހާރު ގުޅައި މިވަނީ ނިންމާލާފައެވެ.
ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ 4,000 ފްލެޓަށް ކަރަންޓުގެ ޚިދުމަތް ފޯރުކޮށްދިނުމަށްޓަކައި މިކުންފުނިން ކުރިއަށްގެންދިޔަ އެންމެހާ މަސައްކަތްތައް މިހާރު ވަނީ ނިންމާލާފައި. މި މަސައްކަތުގެ ދަށުން މެއިން ޕެނަލްތަކަށް ކޭބަލް އެޅުމާއި، ކަނެކްޝަންތައް ހަދައި… pic.twitter.com/7mn9Aw1tmF
— STELCO (@STELCOMALDIVES) January 21, 2026
އެފްޑީސީން މިހާރު އަންނަނީ ފްލެޓްތަކުގެ ތަޅުދަނޑި ހަވާލުކުރުމުގެ މަސައްކަތް ކުރަމުންނެވެ. މި މަސައްކަތް މިމަހުގެ ނިޔަލަށް ނިންމުމަކީ އެ ކުންފުނީގެ އަމާޒެކެވެ. ފްލެޓުތަކުގެ ތަޅުދަނޑި މިހާރު ހަވާލުކުރަމުން އަންނައިރު ފްލެޓުތަކަށް ތަޅުދަނޑި ލިބިފައިވާ ފަރާތްތަކުން ދަނީ ފްލެޓްތަކަށް ބަދަލުވަމުންނެވެ. އަދި ބައެއް ފްލެޓްތަކަށް ބޭނުންވާ ސާމާނު ވެއްދުމާއި ރޯދައަށް ފްލެޓްތަކަށް ވަނުމަށްވެސް ބައެއް ފަރާތްތަކުން ތައްޔާރުވަމުން ދެއެވެ.
ފްލެޓްތަކުގެ އަސާސީ ޚިދުމަތްތައް ގުޅާލެވި، އާންމުން ވަންނަމުންދާއިރު މި ސަރަހައްދުގެ މަގުތަކާއި ވަށައިގެންވާ ސަރަހައްދު ތަރައްޤީކޮށް ބޭނުން ކުރެވޭ ގޮތަށް ހެދުމުގެ މަސައްކަތް ހައުސިން ޑިވެލޮޕްމެންޓް ކޯޕަރޭޝަނުން ދަނީ ކުރަމުންނެވެ. އަދި އެސަރަޙައްދަށް ބަދަލުވާ ޢާއިލާތަކަށް ފަސޭހަވާނެހެން އިތުރު ޚިދުމަތްތައް ޤާއިމުކުރުމުގެ މަސައްކަތްވެސްދަނީ ކުރަމުންނެވެ.
ހުޅުމާލޭގައި ތަރައްޤީކޮށްފައިވާ 4000 ފްލެޓުތައް ޓަވަރުތައް ދެ ނަމެއްގައި ވަނީ ތަރައްޤީކޮށްފައެވެ. އެއީ އަމާން އުދަރެސްގެ 6 ޓަވަރާއި އަމާން ދޯދީގެ 6 ޓަވަރެވެ، މި 4000 ހައުސިންގ ޔުނިޓުގެ ތެރޭގައި 2 ކޮޓަރި އަދި 3 ކޮޓަރީގެ އެޕާޓްމަންޓްތައްވަނީ ތަރައްޤީކޮށްފައެވެ.