"ދަތިތަކާއެކުވެސް ރާއްޖެއިން ހޯދަމުންދަނީ ފަޚުރުވެރި ކާމިޔާބީތަކެއް"

ދަތިތަކާއެކުވެސް ފަތުރުވެރިކަމުގައި ރާއްޖެއިން ހޯދަމުންދަނީ ފަޚުރުވެރި ކާމިޔާބީތަކެއްކަމަށް ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި މެނޭޖިން ޑިރެކްޓަރ އަބްދުﷲ ޔާސިރު ވިދާޅުވެއްޖެއެވެ.

ސީއީއޯ މިހެން ވިދާޅުވީ، ޤައުމީ ފަތުރުވެރިކަމުގެ ދުވަހުގެ ޖަލްސާގައި ވާހަކަ ދައްކަވަމުންނެވެ.

މި ޖަލްސާގައި ވާހަކަ ދައްކަވަމުން ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި މެނޭޖިން ޑިރެކްޓަރ އަބްދުﷲ ޔާސިރު ވިދާޅުވީ، މި އަހަރަކީ ފަތުރުވެރިކަމަށް ގޮންޖެހުންތަކާއި ކުރިމަތިވި އަހަރެއް ކަމަށެވެ. ނަމަވެސް މިހާރު ފަތުރުވެރިކަން ރަނގަޅުވަމުންދާކަން ފާހަގަކުރެއްވިއެވެ.

މެދުއިރުމަތީގެ ހަނގުރާމައިގެ ސަބަބުން މި އަހަރު ފްލައިޓުތަކަށް ބުރުއަރާ ފަތުރުވެރިކަމަށް އެކަމުގެ ނޭދެވޭ އަސަރުކުރިކަމަށް ސީއީއޯ ޔާސިރު ވިދާޅުވިއެވެ. ޖޫން މަހާއި ހިސާބަށް އައިއިރު 1 މިލިއަން ފަތުރުވެރިން ރާއްޖެ އައިސްފައިވާއިރު މި އަހަރަކީ ފަތުރުވެރިކަމުގައި ކާމިޔާބު އަހަރަކަށްވާނެކަމުގެ އުއްމީދު ވަރަށް ބޮޑުކަމަށާއި، އެއީ ފަތުރުވެރިކަން އިއާދަކުރަން ސަރުކާރާއި، ސްޓޭކް ހޯލްޑަރުން ކުރި މަސައްކަތުގެ ނަތީޖާކަމަށް ވިދާޅުވިއެވެ.

އަދި މި އަހަރުވެސް ބައިނަލްއަޤުވާމީ ފެންވަރުގައި ރާއްޖޭގެ ފަތުރުވެރިކަމުގެ ދާއިރާއިން ރަނގަޅު ކާމިޔާބީތަކެއް ހާސިލުކޮށްފައިވާކަން ޔާސިރު ފާހަގަކުރެއްވިއެވެ.

"ފަތުރުވެރިކަމުގެ ދާއިރާގައި ބުރަކޮށް މަސައްކަތްކުރާ މީހުންގެ އަގުވަޒަންކުރަން ލިބޭ ފުރުސަތެއް. މިއީ، އިންޑީއަން އޯޝަންގެ ލީޑިން ޑެސްޓިނޭޝަން. ލީޑިން ހަނީމޫން ޑެސްޓިނޭޝަން. މިއީ، ވަރަށް ރަނގަޅު ކުރިއެރުމެއް." ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި މެނޭޖިން ޑިރެކްޓަރ އަބްދުﷲ ޔާސިރު ވިދާޅުވިއެވެ.

ޤައުމީ ފަތުރުވެރިކަމުގެ ދުވަސް ފާހަގަކުރާއިރު ރާއްޖޭގެ ފަތުރުވެރިކަމުގެ ތާރީޚަށް ބަލާލުން މުހިންމު ކަމަށާއި، ފަތުރުވެރިކަމަކީ އިޤުތިސާދުގެ މައި ލޭނާރަށްވާއިރު އެ ސިނާއަތުގައި މަސައްކަތްކުރާ މީހުންގެ އަގުވަޒަންކުރުން މުހިންމު ކަމަށްވެސް ސީއީއޯ ޔާސިރު ވިދާޅުވިއެވެ.

އަދި ފަތުރުވެރިކަމަކީ ދިވެހިންގެ ވިޔަފާރިއާއި ފުރުސަތުތަކާއި ގުޅިފައިވާ ކަމެއް ކަމަށާއި، އެއީ މުޅި ދުނިޔެއާ ރާއްޖެ ގުޅުވައިދޭ އަސްލުކަމަށް ވިދާޅުވިއެވެ. މީގެއިތުރުން ފަތުރުވެރިކަމަކީ ރާއްޖޭގެ އެންމެ ފަޚުރުވެރި ރަމްޒުކަމަށްވެސް ޔާސިރު ވިދާޅުވިއެވެ.

ރާއްޖޭގެ އެންމެ ފުރަތަމަ ރިސޯޓް ހުޅުވުނީ، 1972 ވަނަ އަހަރުގެ އޮކްޓޯބަރ މަހުގެ 3 ވަނަ ދުވަހުއެވެ. 2022 ވަނަ އަހަރުގެ ތަފާސްހިސާބުތަކަށް ބަލާއިރު، ފަތުރުވެރިކަމުގެ ސިނާއަތުގައި ޖުމްލަ 55,874 މީހުން މަސައްކަތް ކުރެއެވެ. އެހެންކަމުން، ފަތުރުވެރިކަމުގެ ސިނާއަތަކީ ރާއްޖޭގެ އިޤުތިޞާދާއި ވަޒީފާގެ ފުރުސަތުތަކަށް އިތުރު ފެހިކަމެއް ގެނެސްދިން ސިނާއަތެކެވެ.