ސްރީ ލަންކާގެ އެއަރޕޯޓުގައި ތާށިވެފައި ތިބި ދިވެހިން، ހައި ކޮމިޝަންގެ ހޮޓްލައިނަށް ގުޅައިގެން އެ މަޢުލޫމާތު ޙިއްސާކުރުމަށް އެދިއްޖެއެވެ.
ސްރީ ލަންކާއަށް މިހާރު ކުރަމުންދާ ވިއްސާރައާއި ގުޅިގެން ވައިގެ ދަތުރުފަތުރަށް ބުރޫއަރާފައިވާތީ ރާއްޖެއިން ސްރީލަންކާއަށް ދަތުރުކުރާ މީހުން، ދަތުރަށް ފެށުމުގެ ކުރިން އެއަރލައިންއާއި ގުޅައިގެން އަދާހަމަ މަޢުލޫމާތު އޮޅުން ފިލުއްވުމަށް ސަމާލުކަން ދިނުމަށް ހައި ކޮމިޝަނުން ވަނީ އެދިފައެވެ.
ހައިކޮމިޝަނުން ވިދާޅުވީ، މޫސުން ގޯސްވެ، ލަންކާގައި ކުއްލި ޙާލަތު އިޢުލާނުކޮށްފައިވާތީ ވައިގެ ދަތުރުތަކަށް ވަރަށް ބޮޑަށް ބުރޫ އަރާފައިވާ ކަމަށެވެ. މިއާއި ގުޅިގެން ލަންކާއާއި ރާއްޖެއާއި ދެމެދުގެ ދަތުރުތަކާއި ދިވެހިންގެ ޓްރާންސިޓް ދަތުރުތަކަށްވެސް ވަރަށް ބޮޑަށް ބުރޫއަރާ، ގިނަ އަދަދެއްގެ ދިވެހިންވެސް އެއަރޕޯޓުތަކުގައި ތާށިވެފައިވާ ކަމަށެވެ.
ހައިކޮމިޝަނުން ވިދާޅުވީ، ކޮމިޝަންގެ ޓީމްތައް އެއަރޕޯޓަށް ގޮސްގެންވެސް ޙާލަތު ބަލާފައިވާ ކަމަށާއި، މިގޮތަށް އެއަރޕޯޓުގައި ތިބި ދިވެހިން ހައިކޮމިޝަންގެ ހޮޓްލައިން 6666 9476881 + އަށް ގުޅުމަށް އެދޭ ކަމަށެވެ.
ކޮމިޝަނުން ވިދާޅުވީ، އެއަރލައިންތަކާއެކުވެސް ވާހަކަ ދައްކަމުންދާ ކަމަށާއި، މޫސުން ތަން ދޭ މިންވަރަކުން ދަތުރުތައް ރާވަމުންދާ ކަމަށް އެއަރލައިންތަކުން މަޢުލޫމާތުދޭ ކަމަށެވެ. އެހެންކަމުން މި ދަތި ވަގުތުގައި، ހުރިހާ އެންމެންވެސް ކެތްތެރިކަމާއިއެކު އެއަރލައިންތަކުން ދޭ އިރުޝާދުތަކަށް ސަމާލުވުމަށާއި އަދި އެއްވެސް އެހީތެރި ކަމަކަށް ބޭނުންވެއްޖެ ޙާލަތެއްގައި ވީހާވެސް އަވަހަކަށް ކޮމިޝަނަށް އެކަން އެންގުމަށް ވަނީ އެދިފައެވެ.
ކޮމިޝަނުން ވިދާޅުވީ، މިހާތަނަށް ކާބޯތަކެއްޗާއި ބޯހިޔާވަހިކަން ފަދަ އަސާސީ އެއްވެސް ކަމަކަށް ނުވަތަ ޙާލުގައި ޖެހިގެން އެއްވެސް ރިޕޯޓެއް އައިސްފައިނުވާ ކަމަށެވެ. ނަމަވެސް ހޮޓެލްތަކުގެ ބުކިންތައް ވަރަށް ބޮޑަށް ފުރިފައިވާތީ، އެއަރލައިންތަކުން ދަތުރުވެރިންނަށް ހަމަޖައްސައި ދޭންޖެހޭ ކަންކަން ކުރުމުގައި ދަތިކަން ހުރިކަމަށް ފާހަގަކޮށްފައިވާ ކަމަށެވެ.
ލައްކާގައި ތިބި ދިވެހިން އެއްވެސް އެހީތެރިކަމެއް ބޭނުންވާނަމަ، އެކަން ހައިކޮމިޝަނަށް އެންގުމަށް ވަނީ ޢިލްތިމާސްކޮށްފައެވެ.