ފުޓްބޯޅަ އަދި ފުޓްސެލް ރެފްރީ ކޯސް މިފަހަރު އައްޑޫ ސިޓީ މީދޫގައި

އައްޑޫ ސިޓީ މީދޫގައި ކުރިއަށް ގެންދިއުމަށް ހަމަޖެހިފައިވާ ފުޓްބޯޅަ އަދި ފުޓްސެލް ރެފްރީން ތަމްރީނުކުރުމަށް ހިންގާ ކޯހުގައި ބައިވެރިވުމުގެ ފުރުސަތު ހުޅުވާލައިފިއެވެ.

މިކޯހަކީ ކުޅިވަރާއި ހަށިހެޔޮކަމާއި ބެހޭ ވުޒާރާގެ ދަށުން ހިންގަމުން އަންނަ މޯލްޑިވްސް ނެޝަނަލް އިންސްޓްޓިއުޓް އޮފް ސްޕޯޓްސް (އެމްއެންއައިއެސް) އިން އިންތިޒާމުކޮށްގެން ކުރިއަށްގެންދާ ކޯހެކެވެ.

ނުވަ ދުވަހުގެ މުއްދަތަށް ކުރިއަށް ގެންދާ މި ކޯސް ބޭއްވުމަށް ހަމަޖެހިފައިވަނީ މިފެށޭ ޑިސެމްބަރުމަހުގެ 6 އިން 15 އަށެވެ. މިކޯހުގައި ބައިވެރިވުމުގެ ސުންގަޑި ޑިސެމްބަރުމަހުގެ ދެވަނަ ދުވަހާ ހަމައަށްވަނީ ހުޅުވިފައެވެ. މިކޯހަކީ 30 ބައިވެރިންގެ ޖާގައިގެ ކޯހަކަށްވާއިރު މިކޯހުގައި ބައިވެރިވުމުގެ ފުރުސަތު ރާއްޖޭގެ ހުރިހާ ހިސާބަކަށްވަނީ ހުޅުވާލާފައެވެ.

ފުޓްބޯލް އެންޑް ފުޓްސަލް ރެފްރީޒް ކޯސް ކާމިޔާބު ކަމާއެކު ނިންމާ ފަރާތްތަކަށް ސެޓްފިކެޓް ލިބިގެންދާއިރު މިފަރާތްތަކަށް ފުޓްބޯޅަ އަދި ފުޓްސަލް މުބާރާތްތަކުގައި ރެފްރީކަން ކުރުމުގެ ފުރުސަތު ލިބިގެންދާނެކަމަށް ކުޅިވަރު ވުޒާރާއިން މައުލޫމާތުދެއެވެ.

މިކޯހުގައި ކިޔަވައިދޭނީ މިކަމުގެ ތަޖުރިބާ ހުރި އެފްއޭއެމްގެ އިންސްޓްރަކްޓަރުންނެވެ.

އެމްއެންއައިއެސްއިން މިއަހަރު މިހާތަނަށް ފުޓްބޯޅަ އަދި ފުޓްސަލްގެ ސަރޓިފައިޑް 90 ރެފްރީން ވަނީ ތަމްރީނު ކޮށްފައެވެ. ކުޅިވަރު ވުޒާރާގެ އަމާޒަކީ މިދާއިރާއިން ގިނަ އަދަދަކަށް މީހުން ތަމްރީނުކޮށް ރާއްޖޭގެ ހުރިހާ ހިސާބެއްގައި ސަރޓިފައިޑް ރެފްރީންނާއި އަމްޕަޔަރުން އަދި ކޯޗުން އިތުރުކުރުމެވެ.