މިއަހަރަކީ ރާއްޖޭގެ ތާރީޚުގައި އެންމެ ގިނައިން ޒަކާތް ދެއްކި އަހަރު: ވަޒީރު ޑރ. ޝަހީމް

މިއަހަރަކީ ރާއްޖޭގެ ތާރީޚުގައި އެންމެ ގިނައިން ޒަކާތް ދެއްކި އަހަރު ކަމަށާއި މިދިޔަ 2 އަހަރަކީ ރާއްޖޭގެ ޒަކާތުގެ ނިޒާމަށް ހެޔޮ ބަދަލުތަކެއް އައި އަހަރުތަކެއް ކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މި އަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް ޢަދަދު ވަނީ، 109 މިލިޔަނަށް އަރާފައެވެ. އަދި މިދިޔަ އަހަރުގެ މި މުއްދަތުގައި ޒަކާތުގެ ގޮތުގައި ލިބިފައިވަނީ، 106 މިލިޔަން ރުފިޔާއެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، ދިވެހިރާއްޖޭގެ ޒަކާތުގެ ނިޒާމަކީ ހަރުދަނާ އުޞޫލުތަކެއްގެ މައްޗަށް އާރާސްތުކުރެވިފައިވާ ޤާނޫނަކުން ރައްކާތެރިކަން ލިބިފައިވާ ނިޒާމެއް ކަމަށެވެ. އަދި ޒަކާތު ފައިސާ ބަލަހައްޓަމުންދަނީ މަރުކަޒީ ބޭންކުންކަން ފާހަގަކުރައްވާ ވަޒީރު ވިދާޅުވީ ޒަކާތުން ލިބޭ ފައިސާ ހޭދަކުރަމުން ދަނީ އިސްލާމީ ޝަރީޢަތުގައިވާ ގޮތުގެ މަތިން ޝަރީޢާ ގައިޑްލައިނެއް ޢާއްމުކޮށް އޭގައިވާ ގޮތުގެ މަތިން ކަމަށެވެ. އަދި ޚަރަދު ކުރެވެމުންދާ ގޮތް މަހުން މަހަށް ޢާއްމުކޮށް ހާމަކުރަމުންދާކަންވެސް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، މިދިޔަ 2 އަހަރަކީ އެންމެ ގިނައިން ޒަކާތް ލިބުނު 2 އަހަރު ކަމަށާއި ރާއްޖޭގެ ޒަކާތުގެ ނިޒާމަށް ވަރަށް ހެޔޮ ބަދަލުތަކެއް ގެނެވުނު 2 އަހަރު ކަމަށެވެ. އަދި މިއަހަރަކީ ދިވެހިރާއްޖޭގެ މުޅި ތާރީޚުގައިވެސް އެންމެ ގިނައިން ޒަކާތް ދެއްކި އަހަރުކަން ވަޒީރު ފާހަގަކުރެއްވިއެވެ. މީގެ އިތުރުން ޒަކާތުގެ ގޮތުގައި ލިބުނު ފައިސާއިން އެންމެ ގިނައިން ފަޤީރުންގެ ދަފުތަރުގައި ޖެހިފައިވާ ފަރާތްތަކަށް ހޭދަކުރެވުނީ މި 2 އަހަރުކަމަށްވެސް ވަޒީރު ވިދާޅުވިއެވެ.

އޭގެ ތެރޭގައި ފަޤީރުންނަށް މާލީ އެހީތެރިކަން ދިނުމުގެ އިތުރުން ފަޤީރުންގެ ތައުލީމާއި ޞިއްޙަތަށް ހޭދަކުރިކަން ވަޒީރު ފާހަގަކުރެއްވިއެވެ. ޝަރީޢާ ހުއްދަކުރާ މަގުން ޒަކާތު ފަންޑު އިތުރުކުރަން ގިނަ މަސައްކަތްތަކެއް މި ދެ އަހަރުގެ ތެރޭގައި ފެށިކަންވެސް ވަޒީރު ވިދާޅުވިއެވެ. ވަޒީރު ޝަހީމް ވަނީ ދިވެހި ރައްޔިތުން ރާއްޖޭގެ ޒަކާތުގެ ނިޒާމަށް ދެއްވަމުން ގެންދަވާ އިތުބާރަށްޓަކައި ޝުކުރު އަދާކުރައްވާ، ޤާނޫނަކުން ޒަކާތުގެ ނިޒާމު ތަރައްޤީކޮށްދެއްވި ކަމަށްޓަކައި ރައީސް ޑރ މުޙައްމަދު މުޢިއްޒަށް ޝުކުރު އަދާކުރައްވާފައެވެ.

ޒަކާތް ބަލައިގަތުމުގެ އެންމެހާ ކަންތައްތަކެއް ކުރަމުންދަނީ، ދައުލަތުގެ ޓެކްސް އިދާރާ މީރާއިންނެވެ. މީރާއިން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ އަހަރު ޒަކާތުގެ ގޮތުގައި މުޅި ޖުމްލަ 107,205,043 ރުފިޔާ ވަނީ ބަލައިގެންފައެވެ. އަދި 2024ވަނަ އަހަރު ޒަކާތުގެ ގޮތުގައި 102,281,507 ރުފިޔާ ބަލައިގެންފައިވާއިރު، 2023ވަނަ އަހަރު ބަލައިގެންފައިވަނީ 90,207,015 ރުފިޔާއެވެ. މީގެ އިތުރުން، 2022ވަނަ އަހަރު 92،696،776 ރުފިޔާ އަދި 2021ވަނަ އަހަރު 91،519،250 ރުފިޔާ ޒަކާތުގެ ގޮތުގައި މީރާއިން ވަނީ ބަލައިގެންފައެވެ.

ރާއްޖޭގައި ޒަކާތުގެ ކަންކަން ހަރުދަނާ ކުރުމުގެ ގޮތުން ޒަކާތުގެ ފުރަތަމަ ޤާނޫނެއް އެކުލަވާލާ އެއަށް އަންނަނީ، ޢަމަލު ކުރަމުންނެވެ. ޒަކާތުގެ ޤާާނޫނަކީ، އިސްލާމްދީނުގައި ޒަކާތް ޝަރުޢު ކޮށްފައިވާ މަޤުޞަދުތައް ޙާސިލު ކުރެވޭނެ ގޮތެއްގެ މަތިން ޒަކާތުގެ ކަންކަމާ ގުޅޭ ޤާނޫނީ އޮނިގަނޑެއް އެކުލަވާލުމާއި، ޤާނޫނުގެ ދަށުން ދައްކަންޖެހޭ ޒަކާތުގެ ބާވަތްތަކާއި، ޒަކާތް ދެއްކުން ލާޒިމުވާ ފަރާތްތަކާއި، ޒަކާތް ދެއްކުން ލާޒިމުވާ މުދަލުގެ ބާވަތްތައް ކަނޑައެޅުމުގެ މަޤުސަދުގައި އެކުލަވާލާފައިވާ ޤާނޫނެކެވެ. އަދި ދިރިއުޅުމުގެ ހަމަހަމަކަމާއި، އިޖުތިމާޢީ ފުދުންތެރިކަން އިތުރުކުރުމަށް ޒަކާތުގެ ގޮތުގައި ލިބޭ މުދަލާއި، ފައިސާގެ ބޭނުން ފުރިހަމަ ގޮތުގައި ހިފޭނެ ގޮތެއްގެ މަތިން ޒަކާތުގެ ގޮތުގައި ލިބޭ މުދަލާއި ފައިސާ ބެހުމާއި، އެ ފައިސާ ބޭނުންކުރުމާ ގުޅޭ ޢާންމު އުޞޫލުތައް ކަނޑައެޅުމަކީވެސް މި ޤާނޫނުގެ މަޤުޞަދެކެވެ.