ނޮވެންބަރު މަހު އެމެރިކާގައި ބާއްވާ ކޮންގްރެސްގެ އިންތިޚާބުގައި ޔަހޫދީންގެ ބޮޑުވަޒީރު ބެންޖަމިން ނަތަންޔާހޫގެ ސަރުކާރާ ދެކޮޅަށް ވާހަކަދައްކާ ކެންޑިޑޭޓުން ބަލިކުރުމަށް ޓަކައި އެމެރިކަން އިސްރާއީލް ޕަބްލިކް އެފެއާޒް ކޮމިޓީން (އައިޕެކް) 233 މިލިޔަން އެމެރިކާ ޑޮލަރު ޚަރަދުކުރަން ރާވާފައިވާ ކަން ސެނެޓުގެ މެންބަރެއް ކަމުގައިވާ ބަރނީ ސޭންޑަރޒް ހާމަކުރައްވައިފިއެވެ. އެކްސްގައި ކުރެއްވި ޕޯސްޓެއްގައި، ސެނެޓުގެ މިނިވަން މެންބަރެއް ކަމުގައިވާ ސޭންޑަރޒް ވިދާޅުވީ، އެމެރިކާގައި އޮތް ޔަހޫދީންނަށް ތާއީދުކުރާ އެންމެ ބޮޑު ލޮބީ ގްރޫޕު ކަމުގައިވާ އައިޕެކުން ފައިސާ ޚަރަދުކުރަނީ ނަތަންޔާހޫގެ ހައްދުފަހަނަޅާފައިވާ ސަރުކާރާ ދެކޮޅަށް އަޑުއުފުލާ ކެންޑިޑޭޓުންނާ ދެކޮޅަށް ކަމަށެވެ.
މިޝިގަން ސްޓޭޓްގެ ޕްރައިމަރީގައި ޢަބްދު އަލް-ސައްޔިދު ބަލިކުރުމަށް ވެސް އައިޕެކުން 33 މިލިޔަން ޑޮލަރު ޚަރަދުކުރި ކަމަށާއި، ނަމަވެސް އެ ގުރޫޕަށް ނާކާމިޔާބީއާ ކުރިމަތިލާން ޖެހުނު ކަމުގައި ސޭންޑަރޒް ވިދާޅުވިއެވެ. އަދި، ކުރިއަށް އޮތް ތަނުގައި ވެސް އެ ގުރޫޕު ބަލިވަމުންދާނެ ކަމުގައި އޭނާ ވިދާޅުވިއެވެ. ކުރިއަށް އޮތް ސެނެޓް އިންތިޚާބުގައި ވާދަކުރައްވާ ޑިމޮކްރެޓިކް ކެންޑިޑޭޓް ޢަބްދު އަލް-ސައްޔިދަކީ ޔަހޫދީންނަށް އެމެރިކާއިން ދޭ އަސްކަރީ އެހީއާ ދެކޮޅުހައްދަވައި، އަދި ޣައްޒާއާއި އިސްތިޢުމާރު ކޮށްފައިވާ ހުޅަނގު އައްސޭރީގައި ނަތަންޔާހޫގެ ސަރުކާރުން ހިންގާ ލާއިންސާނީ ޖަރީމާތަކަށް ވަރަށް ބޮޑަށް ފާޑުވިދާޅުވާ ބޭފުޅެކެވެ.
ޔަހޫދީންނަށް އެމެރިކާއިން އަސްކަރީ އެހީ ދިނުން ހުއްޓައިލުމަށް ވެސް ސޭންޑަރޒް ވަނީ އޭނާގެ ޕޯސްޓުގައި ގޮވައިލައްވާފައެވެ. ނޮވެންބަރު 3 ވަނަ ދުވަހު ބާއްވާ އެމެރިކާގެ ކޮންގްރެސްގެ މިޑްޓަރމް އިންތިޚާބުގައި އިދިކޮޅު ޑިމޮކްރެޓިކް ޕާޓީގެ ކެނޑިޑޭޓުން ހައުސް އޮފް ރެޕްރެޒެންޓޭޓިވްސް އަދި ސެނެޓްގެ އަޣުލަބިއްޔަތު ހޯދާނެ ކަމަށް ޚިޔާލު ހޯދުމުގެ ސާވޭތަކުގެ ނަތީޖާއިން ފެނެއެވެ. ޣައްޒާގައި ހިންގަމުންދާ ޤަތުލުޢާންމާ ގުޅިގެން ޔަހޫދީންނާމެދު އެމެރިކާގެ ވޯޓުލާ މީހުންގެ ވިސްނުން ވަނީ ވަރަށް ބޮޑަށް ގޯސްވެފައެވެ.
މި ކަމާ ގުޅިގެން މި އަހަރު ކޮންގްރެސްއާއި ސެނެޓުގެ މެންބަރުކަމަށް ވާދަކުރައްވާ ޑިމޮކްރެޓިކް ޕާޓީގެ ގިނަ ކެނޑިޑޭޓުން ގެންދަ ވަނީ ނަތަންޔާހޫގެ ސަރުކާރުގެ ސިޔާސަތުތަކާ ދެކޮޅަށް ފާޑުވިދާޅުވަމުންނެވެ. ފަލަސްޠީނު ރައްޔިތުން އެ މީހުންގެ ވަޒަނުން ބޭރުކުރުމަށާއި، މެދުއިރުމަތީގައި ޞުލްޙަ ޤާއިމުކުރުމަށް އޮތް އުންމީދުތައް ނަގައިލުމަށް ނަތަންޔާހޫގެ ސަރުކާރުން ކުރާ މަސައްކަތްތަކަށް އެމެރިކާގެ ގިނަ ބަޔަކު ދެކޮޅުހަދާ ކަން މިހާރު ދާނީ ހާމަވަމުންނެވެ.