އާބާދީ އެއްފަސްކުރުމުގައި ނަމޫނާ ރަށެއްގެ ގޮތުގައި ހަނިމާދޫ

ތަރައްޤީގެ ދުވެލި މަޑުޖެހުމުގެ މައިގަނޑު އެއް ސަބަބަކީ ރަށްރަށުގެ އާބާދީއެވެ. ވޭތުވެދިޔަ އެކި ސަރުކާރުތަކުންވެސް އާބާދީ އެއްފަސްކުރުމުގެ މަޝްރޫޢުތައް އެކި އިންތިޒާމުތަކުގެ ދަށުން ކުރިއަށްގެންދިޔުމަށް މަސައްކަތްކޮށްފައިވެއެވެ. އެހެންނަމަވެސް މިއީ ގިނަ ރަށްރަށުގެ މީހުންނަށް ޤަބޫލުކުރަން ދަތި ކޮންސެޕްޓެކެވެ.

ޒަމާނާއި ވަގުތު ބަދަލުވެ، އެއް އިރެއްގައި ސަރުކާރުން ރައްޔިތުން ގާތު އާބާދީ އެއްފަސްކުރުމަށް އެދުނުނަމަވެސް މިއަދު މިވަނީ، އެކަމަށް ރައްޔިތުންގެ ފަރާތުން އިސްނަގަން ފަށާފައެވެ. މީސްކޮޅު މަދު ބައެއް ރަށްރަށުން މިހާރު އަންނަނީ އާބާދީ ބޮޑެތި ސަރަޙައްދުތަކަށް އެރައްޔިތުން ބަދަލުކޮށްދިނުމަށް އެދެމުންނެވެ. މިފަދަ އެއް ރަށަކީ ހދ. ހިރިމަރަދޫއެވެ.

ހިރިމަރަދޫ ރައްޔިތުން ބަދަލުވާން އެދިފައިވަނީ ހދ. ހަނިމާދޫއަށެވެ. ހަނިމާދޫއަށް މީގެކުރިންވެސް ބައެއް ރަށްރަށުގެ ކުދި އާބާދީތައް ވަނީ ބަދަލުކޮށްފައެވެ. މިގޮތުން އަހަރުތަކެއް ކުރިން، ހއ. ހަތިފުށި، ހދ. ހޮނޑައިދޫ އަދި ފަރިދޫގެ އިތުރުން ޅ. އަތޮޅު މާފިލާފުށީގެ ރައްޔިތުން ހަނިމާދޫއަށްވަނީ ބަދަލުކޮށްފައެވެ.

ހަނިމާދޫއަކީ ސަރުކާރުގެ އާބާދީއާއި ތަރައްޤީ އެއްފަސްކުރުމުގެ ސިޔާސަތުގައި އެންމެ މުހިއްމު އެއް ރަށެވެ. ހާހެއްހާ މީހުންގެ އާބާދީއެއް މިހާރު އޮތް ހަނިމާދޫއަކީ އެކި ރަށްރަށުން ހިޖުރަކޮށްފައިވާ ޢާއިލާތަކަށް ފާގަތި އަދި އުޖާލާ މުސްތަޤުބަލެއް އޮތް ރަށެއްކަން ކަށަވަރުކުރުމަށް ސަރުކާރާއި ގުޅިގެން ހަނިމާދޫ ކައުންސިލުންދަނީ މަސައްކަތް ކުރަމުންނެވެ.

ރައީސުލްޖުމްހޫރިއްޔާ އޮގަސްޓް މަހުގެ ތެރޭގައި ހދ. އަތޮޅަށް ކުރެއްވި ދަތުރުފުޅުގެ ތެރެއިން މުހިއްމު މަޝްރޫޢުތަކެއް ފެއްޓެވި އެއް ރަށަކީ ހަނިމާދޫއެވެ. ހަނިމާދޫގެ މުސްތަޤުބަލާއި ގުޅިފައިވާ ހަނިމާދޫ އިންޓަރނޭޝަނަލް އެއަރޕޯޓުގެ ތަރައްޤީގެ ދުވެލި އަވަސްކޮށް، އަންނަ ނޮވެމްބަރު މަހުގެ ނިޔަލަށް އެއަރޕޯޓު އޮޕަރޭޝަނަށް ގެނައުމަށް ސަރުކާރުންދަނީ މަސައްކަތް ކުރައްވަމުންނެވެ.

އަތޮޅުތަކުގެ ރަށެއްގައި ތަރައްޤީކުރާ އެންމެ ހިތްގައިމު އެއަރޕޯޓު ހަނިމާދޫގައި ތަރައްޤީކުރަމުން އަންނައިރު، މާލެ ފިޔަވާ ރާއްޖޭގައި ފުރަތަމަ ޤާއިމުކުރާ އެއިރޯ ބްރިޖްވެސް ޤާއިމުކޮށްފައިވަނީ އެއެއަރޕޯޓުގައެވެ.

އޭ320 އަދި ބޮއިންގް 737 މަރުކާގެ ފްލައިޓްތަކަށް ޚިދުމަތްދެވޭ ފެންވަރަށް ތަރައްޤީކުރާ މިއެއަރޕޯޓު ހުޅުވެންވާއިރަށް، ހަނިމާދޫގައި ޕާސްޕޯޓު އަދި އައިޑީކާޑު ޕްރިންޓުކުރެވޭނެ އިންތިޒާމު ހަމަޖެއްސުމަށްވަނީ ނިންމާފައެވެ. ހަމަމިއާއެކު ހަނިމާދޫއިން ފުރާ ފަސިންޖަރުންނަށްވެސް ޓިކެޓަށް ޑޮލަރު ލިބޭނެ އިންތިޒާމު ހަމަޖެހިގެންދާނެކަމަށް ސަރުކާރުން ވިދާޅުވެއެވެ.

އާބާދީ އެއްފަސްކުރުމުގެ ސަބަބުން އިތުރުވެގެންދާ ހަނިމާދޫގެ އާބާދީއާއި އެރަށުގެ އުފަން ރައްޔިތުންނަށް އެކަށީގެންވާ ބޯހިޔާވަހިކަމުގެ މަޝްރޫޢެއް ހިންގުމަށްވެސް ސަރުކާރުންވަނީ ނިންމަވާފައެވެ.

މިގޮތުން ފްލެޓު ކޮންސެޕްޓަށް ތަރައްޤީކުރާ އެޕާޓްމަންޓާއި، އަމިއްލަ ގޯތީގައި ގެދޮރު އެޅުމަށް ކުރިއަށްގެންދާ މަޝްރޫޢުގެ ދަށުން ހަނިމާދޫގައި 500 ހައުސިންގ ޔުނިޓުގެ މަސައްކަތް ސެޕްޓެމްބަރު މަހު ފެށުމަށް ސަރުކާރުންވަނީ ނިންމަވާފައެވެ. މީގެއިތުރުން ހިރިމަރަދޫއިން ހަނިމާދޫއަށް ހިޖުރަކުރާ ޢާއިލާތަކަށް ޚާއްސަކޮށް ކުރިއަށްގެންދާ ބޯހިޔާވަހިކަމުގެ މަޝްރޫޢުގެ އިތުރުން ހަނިމާދޫގައި ހުއްޓިފައިވާ 100 ހައުސިންގ ޔުނިޓުގެ މަސައްކަތްވެސް ނިންމުމަށްވަނީ ހަމަޖެހިފައެވެ.

އާބާދީ އިތުރުވެ، އިންޓަރނޭޝަނަލް އެއަރޕޯޓާއެކު ފަތުރުވެރިކަން ތަރައްޤީވެގެން އަންނައިރު ބޭނުންވާނެ އެންމެ މުހިއްމު އެއް އަސާސީ ޚިދުމަތަކީ ރަނގަޅު ފެންވަރުގެ ސިއްޙީ ޚިދުމަތެވެ. އެކަން ކަށަވަރުކުރުމަށް 30 އެނދުގެ މުޅިން އައު ހޮސްޕިޓަލެއް ހަނިމާދޫގައި ތަރައްޤީކުރުމަށްވަނީ ހަވާލުކޮށްފައެވެ. އަދި އަހަރު ނިމުމުގެ ކުރިން ޑަޔަލިސިސްގެ އިތުރުން މުހިއްމު ޚިދުމަތްތަކެއް އެރަށުގައި ޤާއިމުކުރުމަށްވެސް ދަނީ މަސައްކަތްކުރަމުންނެވެ.

ބޮޑެތި މަޝްރޫޢުތަކާއި އެހެނިހެން އިތުރު މަޝްރޫޢުތައްވެސް ހަނިމާދޫގެ ތަރައްޤީގެ ޕްލޭންގައިވަނީ ހިމަނާފައެވެ. މިގޮތުން ސްކޫލަށް ޖާގައިތުރުކުރުމާއި، މަގުތައް ޒަމާނީ ފެންވަރަށް ތަރައްޤީކުރުމާއި، ރައްޔިތުންގެ ދުޅަހެޔޮކަން ކަށަވަރުކުރުމަށް ފިޓްނެސް ސެންޓަރާއި، ފުލުހުންގެ ޚިދުމަތް އެރަށުގައި ފެށުމުގެ މަސައްކަތްވެސްވަނީ ޢިއުލާންކުރައްވާފައެވެ. އެކި މަޝްރޫޢުގެ މަސައްކަތް އެކި މަރުޙަލާގައި މިހާރު ކުރިއަށްއެބަދެއެވެ.

މިމަޝްރޫޢުތަކާއެކު ހަނިމާދޫ ވެގެންދާނީ އުތުރުގައި ތަރައްޤީގެ މުހިއްމު ނާރެހަކަށެވެ. އުތުރުގެ އިޤްތިޞާދު ފުޅާކުރުމަށް ހުޅުވޭ ދޮރަކަށް ހަނިމާދޫވެގެންދާއިރު މިއީ މުޅި ޤައުމުގެ އިޤްތިޞާދަށްވެސް އަންނަ ކުރިއެރުމެއްކަމަށް ސަރުކާރުން ވިދާޅުވެއެވެ.