ފީފާ ވޯލްޑް ކަޕް ކޮލިފައިންގައި ވާދަކުރަން ތައްޔާރުވާ ސްޕެއިންގެ ގައުމީ ޓީމުން ބާސެލޯނާގެ ކީޕަރު ޖޯން ގާސިއާއަށް ޖާގަ ނުދިނީ ޓީމުގައި ތިބި ކުޅުންތެރިން މޮޅުވެފައި، ވާދަވެރިކަން ބޮޑުވުމުން ކަމަށް ކޯޗު ލުއިސް ޑެ ލަ ފުއެންޓޭ ބުނެފިއެވެ.
ޖޯން ގާސިއާ އަކީ ހުސްވި ސީޒަނުގައި ސްޕެނިޝް ލީގުގެ އެންމެ މޮޅު ކީޕަރެވެ. އޭނާ ބާސެލޯނާ އަށް ބަދަލުވީ މި ސީޒަނުގަ އެވެ. އެއީ އެސްޕަނިޔޯލް އިން 25 މިލިއަން ޔޫރޯ އަށެވެ.
އޭނާ އަށް ގައުމީ ޓީމުން ޖާފަ ދޭނެ ކަމާމެދު ގިނަ ބަޔަކު އުއްމީދުގައި ތިއްބަސް ކޯޗު ޑެ ލަ ފުއެންޓޭ ބުނީ އޭނާގެ ޓީމުގައި ތިބި ކީޕަރުންގެ ތެރެއިން އެއްވެސް ކުޅުންތެރިއަކު ބާކީ ކުރުމުގެ ފުރުސަތު ނެތް ކަމަށެވެ.
"ސްޕޭނުގެ ކީޕަރުން ވަރަށް މޮޅު. ދުނިޔޭގެ އެންމެ މޮޅު 10 ކީޕަރުންނަކީ ސްޕޭނަށް ނިސްބަތްވާ ކީޕަރުން. މިވަގުތު އަހަރެންނަށް ޓީމުގައި ތިބި ކީޕަރުންގެ ތެރެއިން އެކަކު ވެސް ބާކީ ކުރެވޭކަށް ނެތް. އެމީހުން ދަނީ މޮޅަށް ކުޅެމުން،" ކޯޗު ބުންޏެވެ.
އޭނާ ބުނީ މީގެ ކުރިން ޖޯން ގާސިއާ ގައުމީ ޓީމަށް ނުނެގީ އޭނާ ކުޅެމުންދިޔައީ އެސްޕަނިޔޯލް އަށް ކަމަށްވުމުން ކަމަށެވެ. އަދި ބާސެލޯނާ އަށް ކުޅުމަކީ ގައުމީ ޓީމަށް ނަގަން ފަސޭހަވާނެ ކަމެއް ކަމަށެވެ. މިހެންވެ އަދި ޖޯން ގާސިއާ ގައުމީ ޓީމުގައި ހުންނާނެ ދުވަސް އަންނާނެ ކަމަށެވެ.
މި ވަގުތު ޓީމަށް ނަގާފައިވާ ކީޕަރުންނަކީ އެތުލެޓިކް ބިލްބާއޯއަށް ކުޅޭ އުނާއީ ސިމޮން އާއި އާސެނަލްގެ ޑޭވިޑް ރާޔާ އާއި ރެއާލް ސޮސިއެޑާޑްގެ އެލެކްސް ރެމިރޯ އެވެ.
ކޯޗު ބުނީ މި ކުޅުންތެރިން ޓީމުގައި ސީނިއާވާނެ ކަމަށާއި ޖޯން ގާސިއާ މޮޅަށް ކުޅެމުންދާނަމަ ގައުމީ ޓީމުގެ ފުރުސަތު ލިބުން ގާތްވާނެ ކަމަށެވެ.
އޭނާގެ ޓީމުގައި މި ފަހަރު ވެސް ބާސެލޯނާގެ ފަސް ކުޅުންތެރިން ވަނީ ހިމަނާފަ އެވެ. މީގެ އިތުރުން އަނިޔާގައި އަހަރެއްހާ ދުވަހު ހުރެފައި ކުޅެން ފެށި މެންޗެސްޓާ ސިޓީގެ މިޑްފީލްޑަރު ރޮޑްރީ ވަނީ ޓީމުގައި ހިމަނާފަ އެވެ.
ކޯޗު ބުނީ މިއީ ނިންމަން ވަރަށް ފަސޭހަވި ކަމެއް ކަމަށާއި ރޮޑްރީ ފަދަ އެހެން ކުޅުންތެރިއަކު ފެންނަން ނެތް ކަމަށެވެ.
އޭނާ އަކީ ހުސްވި އަހަރު ސްޕޭނަށް ޔޫރޯ ކާމިޔާބުކޮށްދިން ޓީމުގެ މުހިންމު ކުޅުންތެރިއެކެވެ. އަދި އެ މުބާރާތުގެ މޮޅު ކުޅުންތެރިޔާގެ މަގާމާއި ޔޫރަޕުގެ މޮޅު ކުޅުންތެރިޔާ އަށްދާ ބެލޮންޑީއޯ އެވޯޑް ވެސް ހާސިލްކުރި ކުޅުންތެރިޔާ އެވެ.