ށ. އަތޮޅުން އަތޮޅު ފެންވަރުގައި ޤައުމީ ދުވަސް ފާހަގަކުރުން ބިލެތްފަހީގައި
-
މި ހަރަކާތްތައް 2 ދުވަހު ކުރިއަށްދާނެ
-
ބިލެތްފަހިވަނީ ޤައުމީ ދުވަހަށް ވަރަށް ބޮޑަށް ތައްޔާރުވެފައި
ށ. އަތޮޅުން އަތޮޅު ފެންވަރުގައި ޤައުމީ ދުވަސް މި ފަހަރު ފާހަގަކުރަނީ ށ. ބިލެތްފަހީގައެވެ.
ބިލެތްފަހީގައި ކުރިއަށްދާ ޤައުމީ ދުވަހުގެ ހަރަކާތްތަކުގައި ބައިވެރިވަޑައިގަތުމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތަކާ ބެހޭ ވަޒީރު އާދަމް ޝަރީފް އުމަރާއި ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. މަރްޔަމް މާރިޔާވަނީ ބިލެެތްފައްސަށް ވަޑައިގެންފައެވެ. ޤައުމީ ދުވަހުގެ ހަރަކާތްތަކުގައި ބައިވެރިވުމަށް ވަޑައިގެންނެވި މެހެމާނުންނަށް ބިލެތްފަހީގެ ރައްޔިތުން ވަނީ ހޫނު މަރުހަބާއެއް ކިޔާފައެވެ.
2 ދުވަހުގެ މުއްދަތައް ކުރިއަށްގެންދާ ހަރަކާތްކުގައި ށ. އަތޮޅުގެ އެކި ރަށްރަށުގެ ކައުންސިލުތަކުންވެސް ވަނީ ބައިވެރިވެފައެވެ. ޤައުމީ ދުވަހުގެ ހަރަކާތްތަކަށް ބިލެތްފަހި ވަނީ ވަރަށް ބޮޑަށް ޒީނަތްތެރިކޮށްފައެވެ.
ޕީއެސްއެމް ނިއުސްއާ ވާހަކަދައްކަމުން ށ. އަތޮޅު ކައުންސިލްގެ ރައީސް މުޙައްމަދު ޝިޔާމް ވިދާޅުވީ ކައުންސިލުން އަބަދުވެސް މިހެން ފާހަގަކުރާ ދުވަސްތައް އަތޮޅު ފެންވަރުގައި ފާހަގަކުރަމުން ދާކަމަށެވެ. އެގޮތުން މި އަހަރު އަތޮޅު ފެންވަރުގައި ފާހަގަކުރުމަށް ހަމަޖެހިފައިވަނީ ޤައުމީ ދުވަސްކަމުން އަތޮޅުގެ ރަށްތަކަށް ޕްރޮޕޯސަލް ހުށައެޅުމުގެ ފުރުސަތު ހުޅުވާލިކަމަށެވެ.
އެގޮތުން އެންމެ ރަނގަޅު ޕްރޮޕޯސަލް ހުށައަޅައިގެން ހޮވުނީ ބިލެތްފަހިކަމަށް ޝިޔާމް ވިދާޅުވިއެވެ. ޝިޔާމް ވިދާޅުވީ ބިލެެތްފަހީގައި އަތޮޅު ފެންވަރުގައި ޤައުމީ ދުވަސް ފާހަގަކުރުމަށް ގިނަ ހަރަކާތްތަކެއް ރޭވިގެން ކުރިއަށްދާކަމަށެވެ. އަދި މުޅިރަށުގެ ރައްޔިތުންނާއި އަތޮޅުގެ ރައްޔިތުން ގުޅިގެން މަސައްކަތް ކުރާކަމީ ފާހަގަކޮށްލަން ޖެހޭ ކަމެެއްކަމަށެވެ.
"ބިލެތްފަހި މިވަނީ ވަރަށް ބޮޑަށް ތައްޔާރުވެފައި. ވަރަށް ޤައުމީވަންތަކޮށް ރަށް މިފެންނަނީ. ކޮންމެ ފަހަރަކުވެސް ހަމަ ވަޒީރު ފެންވަރުގެ ބޭފުޅުން ޝަރަފުވެރިންގެ ގޮތުގައި ބައިވެރިވެވަޑައިގަންނަވާ. މި އަހަރުވެސް ވަޒީރުންނަށް ދައުވަތު ދެއްވީ. ބިލެތްފަހީ ރައްޔިތުންގެ އެއްބައިވަންތަކަން ހަމަ ފާހަގަކޮށްލަން، އަދި ހަމަ އަތޮޅުގެ އެންމެހާ ރައްޔިތުންގެ ބައިވެރިވުން." ޝިޔާމް ވިދާޅުވިއެވެ.
ބިލެތްފަހީގައި ވަނީ ޤައުމީ ދުވަހާއި ގުޅުވައިގެން ޚާއްސަ ސަގާފީ ހަވީރެއް ބާއްވާފައެވެ. މި ހަރާކުގައި ވަޒީރުންނާއި ކައުސިލަރުންނާއި ރަށުގެ ކުދި ބޮޑު އެންމެ ވަނީ ބައިވެރިވެފައެވެ. މި ހަވީރުގައި ސަގާފީ ނެށުންތަކާއި ތަމްސީލުތަކާއި ސަގާފީ އެކި ހަރަކާތްތައްވަނީ ކުރިއަށް ގެންގޮސްފައެވެ.
ބިލެތްފައްސަކީ ވަޑާމަށް މަޝްހޫރު ރަށަކަށްވުމުން ރަށުގެ އިސްރަށްވެހިންގެ ވަޑާމުގެ ހުނަރުތަކާއި މަސައްކަތްތައްވެސް ޤައުމީ ދުވަހުގެ ހަރަކާތްތަކުގެ ތެރެއިން ދައްކާލާފައިވެއެވެ.