އައު ޓާރމިނަލުން ޚިދުމަތް ދޭނީ ރާއްޖޭގެ ފަތުރުވެރިކަމުގެ ސިނާޢަތާއި އެކަށޭނެ މިންގަނޑަކަށް: އެމްއޭސީއެލް

ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލުން ދޭ ޚިދުމަތަކީ ދިވެހި ފަތުރުވެރިކަމުގެ ސިނަޢާތުން މިހާރު ދެމުންދާ ޚިދުމަތާއި އެކަށޭނެ ފެންވަރުގެ ޚިދުމަތަކަށްވާނެ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން ވިދާޅުވެއްޖެއެވެ.

އެމްއޭސީއެލްއިން ވަނީ އައު ޓާމިނަލާއެކު ފަތުރުވެރިކަން ފުޅާކުރަން އިތުރު ފުރުސަތު ލިބިގެންދާނެކަން ފާހަގަކުރައްވާފައެވެ.

ރާއްޖޭގެ މައި ދޮރާށި ވެލާނާ އެއަރޕޯޓު ބޭނުން ކުރާ މީހުންނަށް ބަލާއިރު، 90 އިންސައްތަ ފަސިންޖަރުންނަކީ ފަތުރުވެރިންކަމަށް އެމްއޭސީއެލްއިން ވިދާޅުވިއެއެވެ. ނަމަވެސް މިވަގުތު ޚިދުމަތް ދޭ ޓަރމިނަލަކީ މިހާރު ރާއްޖޭގެ ފަތުރުވެރިކަމުގެ ސިނާޢަތާއި އެކަށީގެންވާ ފެންވަރެއްގެ ޚިދުމަތެއްދެވޭ ތަނެއް ނޫން ކަމަށް އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް މުހައްމަދު ވިދާޅުވިއެވެ.

ހޭޔަންބޯ ޕްރޮގްރާމުގައި އައު ޓާމިނަލާއި ގުޅޭ ގޮތުން ވާހަކަދައްކަވަމުން ޝަރީފް ވަނީ އައު ޓަރމިނަލް ހުޅުވުމުން ދެވޭ ޚިދުމަތް އަވަސްވެގެންދާނެ ކަމަށް ވިދާޅުވެފައެވެ.

"އިރާދަ ކުރެއްވިއްޔާ އައު ޓަރމިނަލުގެ އަޅުގަނޑުމެންގެ އަޔާޓާ މިންގަނޑުތަކުން އެންމެ މައްޗާ ޖެހިގެން އިން ދަރަޖައިގައި ހުންނާނެ. އޭގެ މާނައަކީ އަޅުގަނޑުމެންގެ މަޑުކުރަން ޖެހޭ ވަގުތާއި، ސަލާމަތާއި ރައްކާތެރިކަން މިތަނުން ލިބެން ހުންނަ ޑިއުޓީ ފްރީއާއި، މިހުރިހާ ކަމެއްގެ ސާވިސް އެހެރީ ދުނިޔޭގެ ފެންވަރަށް ގެނެވިފައި. އަޅުގަނޑު މިދެންނެވިހެން ފަތުރުވެރިކަމުގެ ސިނާޢަތައް ޚިދުމަތް ކުރާ ތަނެއްވިއްޔާ އެ ފެންވަރަށް ޚިދުމަތް ގެންދަން އެބަޖެހޭ. " ޝަރީފް ވިދާޅުވިއެވެ.

އައު ޓަރމިނަލާއެކު ފަތުރުވެރިކަމުގެ ސިނާޢަތް ފުޅާކުރުމަށް އިތުރު ފުރުސަތުތައް ލިބޭނެކަން ޝަރީފް ފާހަގަކުރައްވައެވެ. ވެލާނާ އެއަރޕޯޓު މިވަގުތު ގިނަ ފްލައިޓުތައް ޖައްސާ އެންމެ ބާރުބޮޑުވަނީ ކޮންމެ ދުވަހަކުވެސް ހެނދުނު 6:00 އިން މެނދުރު ފަހު 3:00 އާއި ދެމެދުއެވެ. މިގަޑިތަކުގައި ގިނަ އެއަރލައިންތައް އަންނައިރު، އެއަރލައިންތަކުގެ އަދަދު އިތުރު ނުކުރެވެނީ ޖާގައިގެ ދަތިތައް ހުރުމުން ޚިދުމަތް ދިނުމަށް ހޭދަވާ ވަގުތު އިތުރު ކުރުވޭނެ ފުރުސަތު ނެތުމުންނެވެ. ޝަރީފް ވަނީ އައު ޓަރމިނަލް ހުޅުވުމުން މި ފުރުސަތުވެސް ލިބިގެންދާނެ ކަމަށް ވިދާޅުވެފައެވެ.

"85% ފަސިންޖަރުން އަންނާނީ މިގަޑީގައި. އެހެންވީމަ އަބަދުވެސް ކޮންމެ އެއަރލައިނަކުން ބޭނުންވާނެ. އިތުރު ސްލޮޓްސް. އެހެންވީމަ މި ޓަރމިނަލް ހުޅުވުމުން އިތުރަށް މި ދެންނެވި ޕްރައިމް ޓައިމްގައި އަންނަން ބޭނުންވާ އެއަރލައިންތަކަށް ފުރުސަތު ފަހިކޮށްދެވޭނެ. އަޅުގަނޑުމެންނަކީ ޓުއަރިޒަމް އިންޑަސްޓްރިއާއި އަތާއި އަތްގުޅާލައިގެން މަސައްކަތް ކުރާ ބައެއް." ޝަރީފް ވިދާޅުވިއެވެ.

ވެލާނާ އެއަރޕޯޓުގެ އައު ޓަރމިނަލަކީ އަހަރެއްގެ މައްޗަށް 7 މިލިޔަން ފަތުރުވެރިންނަށް ޚިދުމަތްދެވޭ ގޮތަށް ތަރައްޤީކޮށްފައިވާ ޓާމިނަލެކެވެ. މިނިވަން ދުވަހު އައު ޓަރމިނަލް ހުޅުވާއިރު، މިއީ ޒަމާނީ ގިނަ ޚިދުމަތްތަކާއި އެކު ހުޅުވާ ޖާގަ ތަނަވަސް ޓަރމިނަލެކެވެ. މިތަނާއެކު މިހާރު ޚިދުމަތް ފުޅާކުރުމަށް ހުރި ގޮންޖެހުންތަކަށް ހައްލު ލިބޭނެ ކަމަށް އެމްއޭސީއެލްއިން ވިދާޅުވެއެވެ.