އިންތިޚާބީ ރައީސް ހުވާކުރައްވާ ރަސްމިއްޔާތަށް ޗައިނާގެ ރައީސްގެ ޙާއްސަ މަންދޫބެއް ރާއްޖެވަޑައިގެންފި

އިންތިޚާބީ ރައީސް ޑރ. މުޙައްމަދު މުޢިއްޒު ހުވާކުރައްވާ ރަސްމިއްޔާތުގައި ޗައިނާގެ ރައީސްގެ ޚާއްސަ މަންދޫބެއްގެ ހައިސިއްޔަތުން ބައިވެރިވެވަޑައިގަންނަވާ ސްޓޭޓް ކައުންސިލަރު ޝީއެން ވައި އައިޖިން ރާއްޖެވަޑައިގެންފިއެވެ.

ޗައިނާގެ ސްޓޭޓް ކައުންސިލަރު ރާއްޖެވަޑައިގެންފައިވަނީ އިއްޔެގެ ވަގުތެއްގައެވެ. އެކަމަނާއަށް ވެލާނާ އިންޓަރނޭޝަނަލް އެއަރޕޯޓުން މަރުޙަބާ ދެންނެވީ ކުރީގެ ޓޫރިޒަމް މިނިސްޓަރ މޫސާ ޒަމީރެވެ.

މޫސާ ޒަމީރު "އެކްސް"ގައި ކުރެއްވި ޕޯސްޓެއްގައި ވިދާޅުވީ ޗައިނާގެ ރައީސް ޝީޖިންޕިންގެ ޚާއްސަ މަންދޫބަށް މަރުޙަބާ ދެންނެވުމަކީ ލިބުނު އުފަލެއް ކަމަށެވެ. އަދި ޗައިނާއަކީ ރާއްޖޭގެ ތަރައްޤީގެ މުހިންމު ބައިވެރިއެއްގެ ގޮތުގައި ފާހަގަކުރައްވާ، ޗައިނާއާއި އެކީ އޮންނަ ގުޅުމުގެ އަގު ރާއްޖެއިން އަބަދުވެސް ވަޒަން ކުރާނެކަމަށް ޒަމީރު ވިދާޅުވިއެވެ.

An honour to receive President Xi Jinping’s Special Envoy and State Councillor Shen Yiqin on her visit to #Maldives to attend the inauguration of President-elect Dr @MMuizzu. As one of our most important development partners, we value our strong relationship with China. pic.twitter.com/AFy5D64Fpi

— Moosa Zameer (@MoosaZameer) November 15, 2023

މަޢުލޫމާތު ލިބިފައިވާގޮތުގައި އެކަމަނާގެ މި ދަތުރުފުޅު ނިންމަލާލެއްވުމަށްފަހު ފުރާވަޑައިގަތުމަށް ހަމަޖެހިފައިވަނީ އަންނަ ހޮނިހިރު ދުވަހުއެވެ. ދިވެހިރާއްޖެއިން ޗައިނާއާއެކު ޚާރިޖީ ގުޅުން ޤާއިމުކޮށްފައިވަނީ 14 އޮކްޓޯބަރު 1972 ގައެވެ.

އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި އިންތިޚާބީ ނައިބްރައީސް ހުސައިން މުޙައްމަދު ލަޠީފް ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިތުމަށްޓަކައި އަވަށްޓެރި ޤައުމުތަކަށާއި، ރާއްޖެއާ ގުޅުން އޮންނަ އެކި ޤައުމުތަކަށް ވަނީ ދައުވަތު ފޮނުވާފައެވެ.

އިންތިޚާބީ ރައީސް ޑރ. މުޙައްމަދު މުޢިއްޒު ހުވާކުރެއްވުމުގެ ޖަލްސާ އޮންނާނީ މާދަމާ ހަވީރު 16:45 ގައި ޖުމްހޫރީ މައިދާނުގައެވެ. ހުވާކުރެއްވުމުގެ ރަސްމިއްޔާތަށް ޖުމްހޫރީ މައިދާން ތައްޔާރުކުރުމުގެ މަސައްކަތް މިހާރު އަންނަނީ ކުރަމުންނެވެ.