ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގެ ވަގުތީ ނަތީޖާ މިރޭ އިޢުލާންކުރުމަށް މަސައްކަތްކުރައްވަމުން އަންނަކަމަށް އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވެއްޖެއެވެ.
އިންތިޚާބުގެ ވަގުތީ ނަތީޖާ ރޭވެސް އިޢުލާންކުރުމަށްވަނީ މަސައްކަތްކޮށްފައިވެއެވެ. ޝަރީފް ވިދާޅުވީ، ވަގުތީ ނަތީޖާ އިޢުލާންކުރުން ލަސްވެގން އުޅެނީ ރިސޯޓްތަކުން ލިބެންޖެހޭ ބައެއް ތަކެތި ނުލިބުމުގެ ސަބަބުންކަމަށެވެ.
ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި ވޯޓުލުމުގެ ޙައްގު ލިބިފައިވާ މީހުންގެ ތެރެއިން ވޯޓުލާފައިވަނީ 67 އިންސައްތަ މީހުން ކަމަށް އިލެކްޝަންސް ކޮމިޝަނުން ވަނީ ބުނެފައެވެ.
އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ ޙާލަތު ހުރިގޮތުން މިފަހަރުގެ އިންތިޚާބުގައި ވޯޓުލުމަށް ނިކުންނާނެ ކަމަށް ލަފާކުރި އަދަދަށްވުރެ އިތުރަށް މީހުން ވޯޓުލާން ނިކުމެފައިވާކަމަށެވެ. އެގޮތުން ކޯވިޑާއި ގުޅިގެން ވޯޓުލުމަށް ނުކުންނާނެ ކަމަށް އިލެކްޝަންސްއިން ކޮމިޝަނުން އަންދާޒާކޮށްފައިވަނީ، ވޯޓުލުމުގެ ޙައްގުލިބިފައިވާ މީހުންގެ ތެރެއިން 45 އިންސައްތައާއި 50 އިންސައްތައާއި ދެމެދުގެ ޢަދަދެއް ކަމަށް ޝަރީފް ވިދާޅުވިއެވެ. އެހެންނަމަވެސް ވޯޓުލުމުގެ ހައްޤު ލިބިފައިވާ 273128 މީހުންގެ ތެރެއިން މުޅި ރާއްޖެއިން 67 އިންސައްތަ މީހުން ވޯޓުލާން ނުކުމެފައިވާ ކަމަށް ޝަރީފް ވިދާޅުވިއެވެ. އަދި އޭގެތެރެއިން 22 އިންސައްތައަކީ މާލެއިން ވޯޓުލުމަށް ނިކުތް މީހުން ކަމަށްވެސް ޝަރީފް ވިދާޅުވިއެވެ.
ޝަރީފް ވިދާޅުވީ މުޅި އިންތިޚާބުގެ ކަންކަން ކުރިއަށްގެންދިޔަ ގޮތާއިމެދު ހިތްހަމަޖެހޭކަމަށެވެ. އެގޮތުން އިންތިޚާބުގެ ނަތީޖާއަށް އަސަރުކުރާވަރުގެ ޝަކުވާއެއްވެސް އިންތިޚާބުގެ ތެރޭގައި ހުށައެޅިފައިނުވާކަން ޝަރީފް ފާހަގަކުރެއްވިއެވެ. އެހެންނަމަވެސް ބަލިމަޑުކަމެއްގެ ތެރޭގައި ފިޔަވަޅުތަކެއް އަޅައިގެން އިންތިޚާބެއް ބާއްވަން ޖެހުމުން ދަތިތަކެއް ކުރިމަތިވިކަމަށް އިލެކްޝަންސްއިން ފާހަގަކުރައްވައެވެ.
ކައުންސިލް އިންތިޚާބުގެ ވަގުތީ ނަތީޖާ މިއަދު އިއުލާން ކުރުމަށް މަަސައްކަތް ކުރަމުންދާއިރު، ދާއިމީ ނަތީޖާ 14 ދުވަހުގެ ތެރޭގައި އިލެކްޝަންސް ކޮމިޝަނުން އިއުލާން ކުރާނެއެވެ.