ރާއްޖެއިން މިހާރު މަސައްކަތްކުރަމުންދަނީ އެހެން ޤައުމުތަކާ އެއް ހަމައެއްގައި ދުނިޔޭގެ ސުލްޙައާއި ހަމަޖެހުމަށް - ޝާހިދު
ގިނަ އަހަރުތަކެއްގެ މެދުކެނޑުމަކަށްފަހު ދިވެހިރާއްޖެއިން މިހާރު މަސައްކަތްކުރަމުންދަނީ ބައިނަލްއަޤްވާމީ ދުނިޔޭގައި ފައިހަމަކޮށް އެހެން ޤައުމުތަކާ އެއް ހަމައެއްގައި ދުނިޔޭގެ ސުލްޙައާއި ހަމަޖެހުމަށް މަސައްކަތްކުރުމަށްކަމަށް ދިވެހިރާއްޖޭގެ ޚާރިޖީވަޒީރު އަބްދުﷲ ޝާހިދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ އަޒަރުބައިޖާންގެ ވެރިރަށް ބާކޫގައި ކުރިއަށްދާ ނޮން-އެލައިންޑް މޫވްމަންޓް (ނާމް)ސަމިޓްގެ އިސްވެރިންގެ ބައްދަލުވުމުގައި ތަޤްރީރުކުރައްވަމުންނެވެ. ވާހަކަފުޅު ފަށްޓަވަމުން މިނިސްޓަރ ވިދާޅުވީ ބަދަލުވަމުންދާ ދުނިޔޭގައި ހަމައެކަނި ތަފާތެއްނުވާ އާދައަކީ ބަދަލުކަމަށާއި އިހުޒަމާނާ ޚިލާފަށް 21ވަނަ ޤަރުނުގައި ވަރަށް ގިނަ ކަންކަން ތަފާތުކަމަށެވެ.
އެގޮތުން، ކުރީ ޒަމާންތަކުގައި ޤައުމަށް ހުންނަ ނުރައްކާތައް ސާފުކޮށް ފެންނަން ހުންނަކަން ފާހަގަކުރައްވަމުން މިނިސްޓަރ ވިދާޅުވީ މިހާރު ކަންހިނގަނީ އެ އުސޫލުން ނޫންކަމަށެވެ.
ސަލާމަތީ ގޮންޖެހުންތައް ގިނަވެ، ކަމެއް ދިމާވާނީ ކޮންއިރަކުންކަން ނޭނގި ތިއްބާ ކަންކަން ވެގެންދާކަމަށާ، ބަވަނަވަމުންދާ ދުނިޔޭގެ ބަދަލުތަކާއި ޡަޤާފީ ގޮންޖެހުންތަކުގެ ބޭރުން، އިތުރު ކަންކަމަށާއި ސިގްނަލްތަކަށް ހޭލުންތެރިވާން މިނިސްޓަރުވަނީ ދުނިޔޭގެ ޤައުމުތަކަށް ގޮވާލައްވާފައެވެ.
މިނިސްޓަރ ވިދާޅުވީ ދުނިޔޭގެ ބާރުތަކުން ކުރަމުންދާ މަސައްކަތުގެ ހެޔޮ ނަތީޖާ ޙާޞިލްވާނީ އެކަންކަމަށް އަހުލުވެރިވެ، ހަރުދަނާ ފިޔަވަޅުތަކެއް އަޅައިގެންކަމަށެވެ.
މޫސުމަށް އަންނަމުންދާ ބަދަކުތަކާއި ޓެރަރިޒަމްގެ ނުރައްކަލަކީ މިހާރު ދުނިޔެއަށް ދިމާވެފައިވާ އެންމެ ބޮޑެތި ނުރައްކާތައް ގޮތުގައި މިނިސްޓަރ ސިފަކުރެއްވިއެވެ.
މިނިސްޓަރ އަބްދުﷲ ޝާހިދު ވިދާޅުވީ މިދިޔަ އަހަރުގެ ނޮވެމްބަރު މަހު ރައީސުލްޖުމްހޫރިއްޔާ އިބްރާހީމް މުހައްމަދު ސާލިޙް ރާއްޖޭގެ ވެރިކަމުގެ ހުވާކުރެއްވިފަހުން ދިވެހިރާއްޖެއަށް އެދެވޭ ހެޔޮބަދަލުތަކެއް އައިސްފައިވާކަމަށެވެ.
އެގޮތުން އެންމެ ފާހަގަކުރަންޖެހޭ ކަމަކީ ބައިނަލްއަޤްވާމީ ދުނިޔޭގައި ފައިހަމަކުރުމަށް ކުރަމުންދާ މަސައްކަތްތައްކަން މިނިސްޓަރ ފާހަގަކުރެއްވިއެވެ.
ދުނިޔެއަށް ދިމާވެފައިވާ މައްސަލަތައް ޙައްލުކުރަމަށް އެހެން ޤައުމުތަކާ އެއްސަފެއްގައި ދިވެހިރާއްޖެއިން މަސައްކަތްކޮށް ބައިނަލްއަޤްވާމީ މައިދާނުގައި އެއްބާރުލުންދެއްވާނެކަމަށް މިނިސްޓަރވަނީ ހާމަކުރައްވާފައެވެ.
މިނިސްޓަރގެ ތަޤްރީރު ނިންމަވާލެއްވީ ދުނިޔެއަށް ދިމާވެފައިވާ ތިމާވެށިގެ މައްސަލަ ޙައްލުކުރުމަށް ހުރިހާ ޤައުމެއް ގުޅިގެން މަސައްކަތްކުރުމަށް ގޮވާލައްވަމުންނެވެ. މިނިސްޓަރ ވިދާޅުވީ މޫސުމީ ބަދަލުތަކަކީ އަވަސް ފިޔަވަޅުތަކެއް ނާޅައިފިނަމަ ފޫނުބެއްދޭނެ ގެއްލުން ކުރިމަތިކުރުވާނެ ކަމެއްކަން މިނިސްޓަރ ފާހަގަކުރެއްވިއެވެ.