ސެޕްޓެންބަރު މަހު ކިރުވި މަހަށް 27 މިލިޔަނަށްވުރެ ގިނަ ރުފިޔާ ދޫކޮށްފި

ސެޕްޓެންބަރ މަހު މިފްކޯއަށް ކިރުވި މަހަށް 27 މިލިޔަނަށްވުރެ ގިނަ ރުފިޔާ ދޫކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް، މިފްކޯއިން ވިދާޅުވެއްޖެއެވެ.

މިފްކޯއިން އާންމުކޮށްފައިވާ ތަފާސްހިސާބުތައް ދައްކާގޮތުން މިދިޔަ ސެޕްޓެންބަރު މަހު މިފްކޯއަށް 453 ދޯންޏަކުން ވަނީ 1288 ޓަނުގެ މަސް ކިރުވާފައެވެ. އަދި މިފްކޯއަށް ކިރުވާފައިވާ މަހަށް 27،323،275 ރުފިޔާ ވަނީ ދޫކޮށްފައެވެ.

މިފްކޯއަށް ކިރުވާ މަހުގެ ތެރޭގައި ކަޅުބިލަމަސް އަދި ކަންނެލި ހިމެނެއެވެ.

މިފްކޯއަށް ކިރުވާފައިވާ ކަޅުބިލަ މަހާއި ދޫކުރި ފައިސާ:

* ކިރުވިމަސް: 1281 ޓަން
* ދޫކުރި ފައިސާ: 27،226،555 ރުފިޔާ
* ދޯނީގެ އަދަދު: 451

ކަންނެލި (10 ކިލޯއިން މަތި)

* ކިރުވި މަސް: 0.5 ޓަން
* ދޫކުރި ފައިސާ: 900 ރުފިޔާ
* ދޯނީގެ އަދަދު: 1

ކަންނެލި (15 ކިލޯއިން މަތި)

* ކިރުވި މަސް: 3.8 ޓަން
* ދޫކުރި ފައިސާގެ އަދަދު: 95،825 ރުފިޔާ
* ދޯނީގެ އަދަދު: 5

ރާއްޖޭގެ މަސްވެރިކަމުގެ ސިނާޢަތް އިތުރަށް ކުރިއެރުވުމަކީ، ސަރުކާރުން ޚާއްސަ އިސްކަމެއް ދެއްވައިގެން ކުރައްވާ މަސައްކަތެކެވެ. އެގޮތުން މަސްވެރިކަމުގެ ސިނާޢަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާޢަތަކަށް މަސްވެރިކަން ހެދުމަކީ ސަރުކާރުގެ އަމާޒެކެވެ.

މަސްވެރިން ބާނާ މަހަށް 48 ގަޑިއިރުގެ ތެރޭގައި މިހާރު އަންނަނީ ފައިސާ ދޫކުރަމުންނެވެ. އަދި މަސްވެރިންނަށް ޚާއްސަ އަގެއްގައި ދަނީ ތެޔޮވެސް ދޫކުރަމުންނެވެ. މަސްވެރިންނަށް ޚާއްސަ އަގެއްގައި ދޫކުރާ ތެޔޮ މިހާރު 9 ސަރަހައްދަކުން ލިބޭނެކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން ވަނީ ވިދާޅުވެފައެވެ.