އެކުވެރިކަމުގެ ފުޓްބޯޅަ މެޗެއްގައި މިއަދު ބްރުކިނަ ފާސޯ އާއި ދެކޮޅަށް އާޖެންޓީނާ ކުޅުނު މެޗު 7-0 ގެ ނަތީޖާއަކުން އާޖެންޓީނާ މޮޅުވެއްޖެއެވެ.
ބޮއިނެސް އައިރިސްގެ މޮނިއުމެންޓަލް ސްޓޭޑިއަމްގައި ކުޅުނު މި މެޗުގައި އާޖެންޓީނާގެ ކެޕްޓަން ލިއޮނެލް މެސީ ކުޅެފައެއް ނުވެއެވެ. އޭނާގެ ބަދަލުގައި އެ މަގާމަށް ކުޅެފައިވަނީ އިޓަލީގެ ކޯމޯއަށް ކުޅެމުންދާ 22 އަހަރުގެ ނިކޯ ޕަޒް އެވެ.
މި މެޗު ފަށައިގެން މެޗުގެ 3 ވަނަ މިނިޓުގައި އާޖެންޓީނާއަށް ވަނީ ޕެނަލްޓީއެއް ލިބިފައެވެ. ލައުޓާރޯ މާޓިނޭޒް ފޮނުވާލި ޕެނަލްޓީ ކީޕަރު އަތުގައި ޖެހިފައި ބޭރަށް ނިކުތްވަގުތު އޭނާ ވަނީ ދެވަނަ ފަހަރަށް ފޮނުވާލައިގެން މެޗުގެ ނަތީޖާ 1-0 އަށް ބަދަލުކޮށްފައެވެ.
އާޖެންޓީނާއިން މި މެޗުގައި ފަރަގު ބޮޑުކޮށްފައިވަނީ މެޗުގެ 9 ވަނަ މިނިޓުގައި ޖޫލިއަން އަލްވަރޭޒް ފޮނުވާލި ބާރު ހަމަލާ ބްރުކިނަ ފާސޯގެ ޑިފެންޑަރ މޮމޯނޫ ޑިއާލޯ އަތުން ބައިކޮޅަށް ވަން ލަނޑާއެކުގައެވެ.
އަދި އޭގެ 3 މިނިޓު ފަހުން ލައުޓާރޯ މާޓިނޭޒްގެ ދިން ޕާހަކުން ޖިއާންލޫކާ ޕްރެސްޓިއާނީ ވަނީ އިތުރު ލަނޑެއް ޖަހާ މެޗުގެ ނަތީޖާ 3-0 އަށް ބަދަލުކޮށްފައެވެ.
އާޖެންޓީނާއިން މޮޅު ކުޅުމެއް ދައްކާފައިވާ މި މެޗުގެ 35 ވަނަ މިނިޓުގައި ނިކޯ ޕަޒް ލަނޑެއް ޖަހާ އޭނާގެ ނަން ސްކޯ ޝީޓަށް އެރުވިއިރު އޭގެ މިނިޓެއް ފަހުން ޖޫލިއަން އަލްވަރޭޒް ވަނީ އިތުރު ލަނޑެއް ޖަހާ މެޗުގެ ނަތީޖާ 5-0 އަށް ބަދަލުކޮށްފައެވެ.
މި މެޗުގެ ދެވަނަ ހާފަށް އާޖެންޓީނާ ނިކުތްއިރު ކޯޗު ލިއޮނެލް ސްކެލޯނީ ވަނީ ޓީމަށް 5 ބަދަލެއް ގެނެސްފައެވެ.
އާޖެންޓީނާއިން މި މެޗުގައި ޖެހި 6 ވަނަ ލަނޑު މެޗުގެ 57 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ އަލްވަރޭޒްގެ ބަދަލުގައި ކުޅެންއެރި ފްރެންކޯ މަސްތަންޓުއޯނޯއެވެ.
މި މެޗުގެ ފަހު 20 މިނިޓަށް ދިއުމުގެ ކުރިން ސްކެލޯނީ ވަނީ ޓީމަށް އިތުރު 6 ބަދަލު ގެނެސް މުޅި ޓީމު އެއްކޮށް ބަދަލުކޮށްފައެވެ. އެ ޓީމުން މި މެޗުގައި ޖެހި 7 ވަނަ ލަނޑަކީ މެޗުގެ ފުރިހަމަ ވަގުތު ހަމަވެ އިންޖަރީ ވަގުތުގައި ޖިއުލިއާނޯ ސިމިއޯނީ ކާމިޔާބުކޮށްދީފައިވާ ލަނޑެކެވެ.
މިހާރު ކުރިއަށްދާ އިންޓަނޭޝަނަލް ބްރޭކްގައި އާޖެންޓީނާ ކުޅޭ ފަހު މެޗަކީ އަންނަ އަންގާރަ ދުވަހު ބެނިން އާއި ދެކޮޅަށް ކުޅޭ އެކުވެރިކަމުގެ މެޗެވެ. މިއީ އާޖެންޓީނާގެ ކެޕްޓަން ލިއޮނެލް މެސީ ގައުމީ ޓީމަށް ކުޅޭ އެންމެ ފަހު މެޗެވެ.