ޖުމުލަ 11 ދުވަހުން ގައުމީ ޓީމުގެ ހަތަރު މެޗު ކުޅެން ޖެއްސުމުން ގައުމީ ކޯޗުން ދުނިޔޭގެ ފުޓްބޯޅަ ޖަމިއްޔާ ފީފާ އަށް ފާޑުކިޔައިފިއެވެ.
މި ގޮތުން އިނގިރޭސި ކޯޗު ތޯމަސް ޓުޗެލް އާއި ދުނިޔޭގެ ޗެމްޕިއަން ސްޕޭނުގެ ކޯޗު ލުއިސް ޑެލްފުއެންޓޭ އާއި ޖަރުމަނުގެ ކޯޗު ޔާގެން ކްލޮޕާއި ނެދަލޭންޑްސްގެ ކޯޗު ޒަވީ ހަނާންޑޭޒް ވެސް ވަނީ ފާޑުކިޔައިފައެވެ.
ފީފާއިން މީގެ ކުރިން ހަމަޖައްސާފައި އޮތީ 9 ދުވަހުން އެކުވެރިކަމުގެ ދެ މެޗު ކުޅޭ ގޮތަށެވެ. ނަމަވެސް ނޭޝަންސް ލީގުގެ މެޗުތައް ވެސް ހިމެނޭ ގޮތަށް މި ފަހަރު އިންޓަނޭޝަނަލް ބްރޭކް ހަމަޖެއްސީ ހަތަރު މެޗު ކުޅޭ ގޮތަށެވެ.
"މި ފޯމެޓް ކަމަކު ނުދޭ. މި ފޯމެޓް ގައުމީ ޓީމުތަކަށް ވެސް، ކުލަބުތަކަށް ވެސް ކަމަކު ނުދޭ. މިހާ ގާތްގާތުގައި މެޗުތައް ކުޅެން ޖެހުމުން ކުޅުންތެރިން އެދަނީ ޓީމު ދޫކޮށް އަނިޔާގެ މައްސަލަތައް ދިމާވެގެން. ހާއްސަކޮށް ވޯލްޑް ކަޕަށް ފަހު މިފަދަ ގޮތަކަށް މެޗުތައް ތަރުތީބު ކުރުމަކީ ވަރަށް ބޮޑު ބުރައެއް،" ޒަވީ ބުންޏެވެ.
އޭނާގެ ކުޅުންތެރިންގެ ތެރެއިން ހަތަރު ކުޅުންތެރިއަކު ވަނީ އަނިޔާގެ މައްސަލަތަކާހެދި ގައުމީ ޓީމުގެ ޒިންމާތަކުން ދުރަށް ޖެހިލައިފައެވެ.
ޒަވީ ބުނީ ޕްރެކްޓިސް ކުރުމާއި ދަތުރު ފަތުރު ކުރުމާއި މެޗުތައް ކުޅެފައި ރިކަވާވުމަކީ ފަސޭހަ ކަމެއް ނޫން ކަމަށެވެ. އަދި އޭނާ އުއްމީދު ކުރަނީ މި ޝެޑިއުލާ މެދު ފީފާއިން އިތުރަށް ވިސްނާނެ ކަމަށް ކަމަށެވެ.
"އަހަރެން ބޮޑަށް ބާރު އަޅަނީ ދެ މެޗު ކުޅެން. އެއީ އެންމެނަށް ވެސް ރަނގަޅު ގޮތަކީ. އެކަމަކު އަހަރެންނަށް އެނގިފައިވާ ގޮތުގައި މި ފަހަރުގެ ފޯމެޓް ތައްޔާރުކުރީ ވަރަށް ކުރިން،" ޒަވީ ބުންޏެވެ.
އިނގިރޭސި ކޯޗު ޓުޗެލް ބުނީ ކުޅުންތެރިންނަށް ވަރަށް ބޮޑު ބުރައަކަށް ފީފާގެ އައު ފޯމެޓް ވެފައިވާ ކަމަށެވެ. އަދި މިކަމުގައި އެންމެ ބޮޑަށް ހިތްހަމަ ނުޖެހިފައިތިބީ ކުޅުންތެރިން ނިސްބަތްވާ ކުލަބުތަކުން ކަމަށެވެ.
ސްޕޭނުގެ ކޯޗު ޑެލަފުއެންޓޭ ވެސް ބުނީ މިހާރު ޝެޑިއުލް އޮތް ގޮތުން އެންމެ ބޮޑަށް ގެއްލުންވަނީ ކުޅުންތެރިންނަށް ކަމަށެވެ.
"މިހާރު ޝެޑިއުލް އޮތް ގޮތުން ކުޅުންތެރިންނަށް ވަރަށް ބޮޑު ބުރައެއް އުފަލަން އެބަޖެހޭ. ގިނަ މެޗުތަކަށް ދަތުރު ކުރުމަކީ ފަސޭހަ ކަމެއް ނޫން. އަދި ކުޅުންތެރިން ކުލަބުގައި އެހާ ބުރަކޮށް އުޅެފައި އައިސް ގައުމީ ޓީމުގައި މިހާ ބުރަކޮށް އުޅެން ޖެހުމުން އަނިޔާގެ މައްސަލަ ވަރަށް ބޮޑުއެބަވޭ. ކުލަބުތަކުން ވެސް ހިތްހަމަ ނުޖެހިފައި އެތިބީ މިހެންވެ،" ކޯޗު ބުންޏެވެ.
މިކަމާ ގުޅޭ ގޮތުން ފީފާއިން ކުރިން ބުނެފައިވަނީ އިންޓަނޭޝަނަލް ބްރޭކްތައް މަދު ކުރަން ރާވަން ޖެހުނީ ވެސް ކުލަބުތަކުގެ ޝަކުވާ ބޮޑުވުމުން ކަމަށެވެ.