ކުނބުރުދޫ ޕޮލިސް ސްޓޭޝަން ހުޅުވައިފި
-
ޕޮލިސް ސްޓޭޝަން ހުޅުއްވައިދެއްވީ ވަޒީރު ޢަލީ އިޙްސާން
-
154 ފުލުހުންގެ މަރުކަޒު ޤާއިމްކުރޭ
އަރިިއަތޮޅު ދެކުނުބުރީ ކުނބުރުދޫގައި އަލަށް ގާއިމްކުރި ޕޮލިސް ސްޓޭޝަން ހުޅުވައިފިއެވެ.
އދ. ކުނބުރުދޫ ޕޮލިސް ސްޓޭޝަން ހުޅުއްވައިދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު، ޢަލީ އިޙްސާން އާއި ކޮމިޝަނަރ އޮފް ޕޮލިސް އަޙްމަދު މުޙައްމަދުއެވެ.
ޕޮލިސްޓޭޝަން ހުޅުވުމަށް ބޭއްވި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ އާއި ކުނބުރުދޫ ކައުންސިލްގެ ރައީސް އާއި ފުލުހުންގެ ސީނިއަރ އޮފިސަރުންނާއި އެރަށުގައި ހުރި އިދާރާތަކުގެ އިސްވެރިން ބައިވެރިވެލެއްވިއެވެ.
ރާއްޖޭގެ އެކި ކަންކޮޅުތަކުގައި ފުލުހުންގެ ޚިދުމަތް ދިނުމަށް ޚާއްސަކޮށް ފަރުމާކުރެވިފައިވާ 154 މަރުކަޒު ގާއިމުކުރުމުގެ ބޮޑު މަޝްރޫއަކީ އަތޮޅުތަކުގައި ފުލުހުންގެ މަސައްކަތްތައް އިތުރު ހަރުފަތަކަށް ގެންގޮސް، ރައްޔިތުންނަށް ދެވޭ ޚިދުމަތުގެ ފެންވަރު މަތިކުރުމަށް އެޅޭ މުހިންމު ފިޔަވަޅެއް ކަމަށް މީގެކުރިން ސީޕީ ވަނީ ވިދާޅުވެފައެވެ. ދައުލަތުގެ ބަޖެޓުން ހަރަދުކޮށްގެން ފައްޓަވާފައިވާ 154 ޕޮލިސް ސްޓޭޝަންގެ މަސައްކަތަކީ ފުލުހުން ރަށްރަށުގައި ޤާއިމްކޮށް، ރަށްރަށުގެ އަމަންކަމާއި ސުލްޙަމަސަލަސްކަން ޤާއިމްކުރުމަށް މުހިންމު ފިޔަވަޅެއްކަމަށް ފުލުހުން ޤަބޫލުކުރައްވައެވެ.
ފުލުހުންގެ އިމާރާތްތަކުގެ މަސައްކަތް ނިންމައި ފަހުގެ ވަސީލަތްތަކާއެކު ފުލުހުންގެ ބަހާތަކުގެ މަސައްކަތް ބައްޓަންކުރުމަށް އިސްކަންދެއްވާކަމަށް ސަރުކާރުން ފާހަގަކުރައްވައެވެ.