23 އަހަރަށްފަހު ޢިރާޤުން އެމެރިކާގެ ސިފައިން ފޭބުން އެ ޤައުމުން ފާހަގަކޮށްފިއެވެ.
2003ވަނަ އަހަރު އެމެރިކާ ސިފައިން ޢިރާޤަށް އަރާފައި ވަނީ އޭރު އެ ޤައުމުގެ ރައީސްގެ މަޤާމުގައި ހުންނެވި ސައްދާމް ޙުސައިންގެ ވެރިކަން ވައްޓައިލުމަށެވެ. އެއަށްފަހު އެމެރިކާ ސިފައިން ވަނީ 2011ވަނަ އަހަރާ ހަމައަށް އެ ޤައުމުގައި ދެމިތިބެފައެވެ.
އޭގެ ފަހުން ޢިރާޤުގެ ސަރުކާރުގެ އެދުމުގެ މަތިން އައިއެސްއާ ދެކޮޅަށް މަސައްކަތް ކުރުމަށް 2014ވަނަ އަހަރު އެމެރިކާގެ ފައުޖުތައް ވަނީ އަލުން ޢިރާޤަށް ގޮސްފައެވެ. އެއަށްފަހު ޢިރާޤުން އެމެރިކާ ދެން ބާލަން ފަށާފައި ވަނީ 2024ވަނަ އަހަރުގެ ތެރޭގައެވެ. އެ ގޮތުން އަންބަރު ޕްރޮވިންސާއި ބަޣްދާދުގައި ހުރި އަސްކަރީ މަރުކަޒުތަކުގައި ތިބި ބައެއް ސިފައިން ވަނީ ކުރުދިސްތާނު ސަރަޙައްދަށް ބަދަލުކޮށްފައެެވެ.
އެމެރިކާއިން މިހާރު ވަނީ އެ ޤައުމާއި އެ ޤައުމުގެ ބައިވެރިން ޢިރާޤުގައި ކުރިއަށް ގެންދިޔަ އޮޕަރޭޝަން އިންހެރެންޓް ރިސޯލްވް ރަސްމީކޮށް ނިމުމަކަށް ގެނެސްފައިވާ ކަމަށް އިޢުލާނުކޮށްފައެވެ. އެއީ 2024ވަނަ އަހަރު އެމެރިކާއާއި ޢިރާޤުން އެކުގައި ނެރެފައިވާ ބަޔާނަކާ އެއްގޮތްވާ ގޮތުގެ މަތިންނެވެ.
ގިނަ އަހަރުތަކަކަށް ފަހު ޢިރާޤުން އެމެރިކާގެ ސިފައިން ފޭބުމަކީ އެ ޤައުމުގެ އިސްތިޤުލާލަށް ލިބުނު މުހިންމު ކުރިއެރުމެއްގެ ގޮތުގައި ޢިރާޤުގެ އިސްވެރިން ސިފަކުރައްވައެވެ. ޢިރާޤުގެ ބޮޑުވަޒީރު ޢަލީ އަލް-ޒައިދީ ވަނީ އޮޕަރޭޝަން އިންހެރެންޓް ރިސޯލްވް ނިމުމަކަށް އައުމަކީ އައު މަރުހަލާއެއްގެ ފެށުން ކަމަށް ވިދާޅުވެފައެވެ. އެ މަރުހަލާގައި ޤައުމު ހިންގާނީ އަމިއްލަ އިސްތިޤުލާލުގެ މަތީގައި، އަދި ދައުލަތުގެ އިދާރާތަކާއި މިނިވަން ސަލާމަތީ ބާރުތަކުން ކަމަށް އޭނާ ވިދާޅުވިއެވެ. އަދި އޮކްޓޯަބަރު މަހުގެ 1ވަނަ ދުވަހަކީ ‘އިސްތިޤުލާލު ދުވަސް’ގެ ގޮތުގައި އޭނާ ވަނީ ކަނޑައަޅުއްވައިފައެވެ.