ދިރާގުގެ އަހަރީ ދުވަހާ ގުޅުވައިގެން 24 ގަޑިއިރަށް ހިލޭ 38 ޖީބީ ޑޭޓާ!

ސައުވީސް ގަޑިއިރަށް ހިލޭ 38 ޖީބީ ޑާޓާ ލިބޭ ގޮތަށް، ދިރާގުގެ 38 ވަނަ އަހަރީ ދުވަހާ ގުޅުވައިގެން ކަސްޓަމަރުންނަށް ގިނަ އޮފާތަކެއް އެ ކުންފުނިން މިއަދު ތަޢާރަފުކޮށްފިއެވެ.

ދިރާގުން ބޭއްވި ނޫސްވެރިންގެ ބައްދަލުވުމުގައި މާކެޓިން އެންޑް ކޮމިއުނިކޭޝަންސް އެގްޒެކެޓިވް ސުހާ ޢަލީ ވިދާޅުވީ، އަހަރީ ދުވަހާ ގުޅިގެން އެ ކުންފުނީގެ ޕްރީޕެއިޑް އަދި ޕޯސްޓްޕެއިޑް ކަސްޓަމަރުންނަށް 38 ޖީބީ ޑާޓާގެ އޮފާ އެކްޓިވޭޓު ކުރެވޭނެ ކަމަށެވެ.

މީގެ އިތުރުން، ރާއްޖޭގައި އުޅޭ ބިދޭސީންނަށް ބޭރު ޤައުމުތަކުގައި ތިބި އާއިލާއާއި ރަހުމަތްތެރިންނަށް ގުޅުމަށް 38 އައިޑީޑީ މިނެޓް ހިލޭ ލިބޭނެ ކަމަށާއި، މި އޮފާ މެދުވެރިކޮށް އިންޑިއާ، ނޭޕާލް، ބަންގްލަދޭޝް، ޕާކިސްތާން އަދި އިންޑޮނޭޝިއާއަށް ގުޅާލެވޭނެ ކަމަށް އޭނާ ވިދާޅުވިއެވެ. މި އޮފާތައް މިއަދު އިރުއޮއްސި 18:00އާ ހަމައަށް ދިރާގު އެޕު މެދުވެރިކޮށް އެކްޓިވޭޓު ކުރެވޭނެއެވެ.

ސުހާ ވިދާޅުވީ، ދިރާގުގެ ހޯމް ބްރޯޑްބޭންޑު ކަސްޓަމަރުންގެ ތެރެއިން 2021ގެ ކުރިން ރައުޓަރުތައް ދޫކޮށްފައިވާ ފަރާތްތަކަށް އެންމެ ފަހުގެ ރައުޓަރަށް މުޅިން ހިލޭ ބަދަލުކޮށްލެވޭނެ ކަމަށާއި، މިއާއެކު އިންޓަނެޓު އިތުރަށް އަވަސްވާނެ ކަމަށެވެ.

މި މަހުގެ ނިޔަލަށް ކުރިއަށްދާ މި އޮފާވެސް ދިރާގު އެޕު މެދުވެރިކޮށް އެކްޓިވޭޓު ކުރެވޭނެއެވެ. ހަމައެއާއެކު، ދިރާގުގެ މޮބައިލް ކަސްޓަމަރުންގެ ކޯލްތައް މެނޭޖުކުރުމަށް 'އައިވް'ގެ ނަމުގައި އޭއައި ޓޫލެއްވެސް ވަނީ ތައާރަފުކޮށްފައެވެ.

މި ޓޫލް މެދުވެރިކޮށް ފޯނު ނުނެގޭ އެކި ހާލަތްތަކުގައި ފޯނު ނަގައި، ގުޅާ ފަރާތްތަކާ ވާހަކަދައްކައި ކޯލުގެ ޚުލާސާ ކޮށްދިނުމުގެ އިތުރުން ޑިޖިޓަލް ކަލަންޑަރުގައި މުހިންމު މީޓިންތައް ޝެޑިއުލްކޮށްލެވޭނެއެވެ. ސުހާ ފާހަގަކުރެއްވި ގޮތުގައި މި ޓޫލް މި މަހު ދިރާގުގެ ކަސްޓަމަރުންނަށް ހިލޭ ބޭނުންކުރެވޭނެ ކަމަށާއި، އެއަށްފަހު ބޭނުންކުރުމަށް އެޕު މެދުވެރިކޮށް ޖެހޭނީ ސަބްސްކްރައިބު ކުރާށެވެ.

އިތުރު އޮފާތަކާ ގުޅޭގޮތުން ދިރާގުގެ އެސިސްޓެންޓް މެނޭޖަރު، މާކޮމްސް އެންޑް ޕަބްލިކް ރިލޭޝަންގެ ޒީން މުހައްމަދު ވިދާޅުވީ، އެލީޓް ކުލަބު މެދުވެރިކޮށް 38 ދުވަސް ވަންދެން ދިރާގު އެޕުން ޑިސްކައުންޓު ވައުޗާތަކެއް ލިބޭނެ ކަމަށެވެ. އެގޮތުން ޝޮޕިންނާއި ތަރުކާރީ މޭވާފަދަ ސާމާނާއި ރެސްޓޯރަންޓުތަކަށް ޚާއްސަ ވައުޗާތައް ހިމެނެއެވެ.

މީގެ ތެރޭގައި ޔެލޯފިން ޑައިން، ޗައިނާ ގާޑެން، އޭސް ހާޑްވެއާ، ފްލޯރާ އިން، ކޮފީ ބީން އެންޑް ޓީ ކެފޭ، މޫޗާ ގްރާސިއާސް، މެލްޓްޒް ކެލަމަލް، އީޒެޕް، އޯވީއެސް އަދި އައިލެންޑް އުފާ ދަރަވަންދޫ ހިމެނެއެވެ. މީގެ އިތުރުން، އަންނަ ހޮނިހިރު ދުވަހު މޫ ކިޗަންއިން ވަކި އުފެއްދުންތަކަކުން 80 ޕަސެންޓާ ހަމައަށް ދިރާގުގެ ކަސްޓަމަރުންނަށް ޑިސްކައުންޓު ލިބޭނެ ކަމަށްވެސް އެކުންފުނިން މައުލޫމާތުދެއްވައެވެ.