ޓެކުހުގެ ގޮތުގައި ދަޢުލަތަށް ލިބުނު އާމްދަނީ 23.3 ބިލިޔަން ރުފިޔާއަށް

މިދިޔަ މަހުގެ 24ވަނަ ދުވަހުގެ ނިޔަލަަށް ޓެކުހުގެ ގޮތުގައި ދަޢުލަތަށް ލިބުނު އާމްދަނީ 23.3 ބިލިޔަން ރުފިޔާއަށް އަރާފައިވާ ކަމަށް މާލީ ކަންކަމާއި ސަރުކާރު ކުންފުނިތަކާބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

މިއީ، މިދިޔަ އަހަރުގެ މި މުއްދަތާ އަޅާބަލާއިރު އިތުރު އަދަދެކެވެ.

މާލީ ވުޒާރާއިން އެންމެފަހުން އާންމުކުރި ވީކްލީ ފިސްކަލް ޑިވެލޮޕްމަންޓްސް ރިޕޯޓުން ދައްކާ ގޮތުގައި މިިދިޔަ މަހުގެ 24ވަނަ ދުވަހުގެ ނިޔަލަށް އާމްދަނީއާއި ހިލޭ އެހީގެ ގޮތުގައި ދައުލަތަށް 30.2 ބިލިޔަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި އާމްދަނީއާއި ހިލޭ އެހީގެ ގޮތުގައި ދައުލަތަށް ލިބިފައިވަނީ، 28.7 ބިލިޔަން ރުފިޔާއެވެ. އެހެންކަމުން މިއީ %5 އިތުރު އަދަދެކެވެ.

މިމުއްދަތުގެ ތެރޭގައި ދައުލަތުގެ އާމްދަނީއަށް ލިބުނު ކުރިއެރުމުގެ މައިގަނޑު ސަބަބަކީ، ޓެކުހުގެ ގޮތުގައި ލިބުނު އާމްދަނީ އިތުރުވުން ކަމަށް މާލީ ވުޒާރާއިން ވިދާޅުވެއެވެ. އެގޮތުން މިމުއްދަތުގެ ތެރޭގައި ޓެކުހުގެ އާމްދަނީގެ ގޮތުގައި ދައުލަތަށް 23.3 ބިލިޔަން ރުފިޔާ ވަނީ ލިބިފައެވެ. މިއީ، މިދިޔަ އަހަރުގެ މި މުއްދަތުގައި ޓެކުހުގެ ގޮތުގައި ލިބުނު 21.3 ބިލިޔަން ރުފިޔާގެ އާމްދަނީއާ އަޅާބަލާއިރު %9.4 އިތުރު އަދަދެކެވެ.

ޓެކުހުގެ އާމްދަނީއަށް ބަލާއިރު، ޓީޖީއެސްޓީގެ އާމްދަނީ 7.6 ބިލިޔަން ރުފިޔާއިން، 7.8 ބިލިޔަން ރުފިޔާއަށް ނުވަތަ %2.7 ވަނީ އިތުރުވެފައެވެ. އާންމު މުދަލާއި ޚިދުމަތުގެ ޓެކްސް ވަނީ، 3.6 ބިލިޔަން ރުފިޔާއިން 4.1 ބިލިޔަން ރުފިޔާއަށް ނުވަތަ %10.7 އިތުރުވެފައެވެ. އަދި އިމްޕޯޓް ޑިއުޓީގެ ގޮތުގައި ލިބުނު އާމްދަނީވެސް ވަނީ 2.1 ބިލިޔަން ރުފިޔާއިން، 2.4 ބިލިޔަން ރުފިޔާއަށް އިތުރުވެފައެވެ. މިއީ، %13ގެ ކުރިއެރުމެކެވެ.

މި މުއްދަތުގެ ތެރޭގައި ޓެކުހުގެ ގޮތުގައި ލިބުނު އާމްދަނީ އިތުރުވެފައިވީނަމަވެސް، ޓެކްސް ނޫން އާމްދަނީގެ ގޮތުގައި ލިބުނު މިންވަރު ވަނީ ދަށްވެފައެވެ. މިދިޔަ މަހުގެ 24ވަނަ ދުވަހުގެ ނިޔަލަށް ޓެކްސް ނޫން އާމްދަނީގެ ގޮތުގައި 6.3 ބިލިޔަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި ޓެކްސް ނޫން އާމްދަނީގެ ގޮތުގައި ލިބިފައިވަނީ، 7.1 ބިލިޔަން ރުފިޔާއެވެ. މިއީ، %11.5ގެ ދަށްވުމެކެވެ.

މިމުއްދަތުގެ ތެރޭގައި ދައުލަތުގެ ޖުމްލަ ޚަރަދު ހުރީ، 33.5 ބިލިޔަން ރުފިޔާގައެވެ. މިއީ، މިދިޔަ އަހަރުގެ މި މުއްދަތުގައި ޚަރަދުކުރި 28.2 ބިލިޔަން ރުފިޔާއާ އަޅާބަލާއިރު %18.8 އިތުރު އަދަދެކެވެ. ރިކަރަންޓް ޚަރަދު %18.6 އިތުރުވެ، 24.3 ބިލިޔަން ރުފިޔާއިން 28.8 ބިލިޔަން ރުފިޔާއަށް އުފުލިފައިވާއިރު، ކެޕިޓަލް ޚަރަދު ވަނީ %18.7 އިތުރުވެ 3.9 ބިލިޔަން ރުފިޔާއިން 4.6 ބިލިޔަން ރުފިޔާއަށް މަތިވެފައެވެ.