ދުނިޔޭގެ ފުޓްބޯޅަ ކުލަބުގެ ޖަމާއަތެއް އުފެއްދުމުގެ ހިޔާލާއެކު ޕީއެސްޖީގެ ވެރިޔާ ގަތަރުގެ ނަސީރު އަލް ޚެލައިފީގެ ނުސީދާ ވަރުގަދަ ރައްދެއް ފީފާގެ ރައީސް ޖިއާނީ އިންފަންޓީނޯ އަށް ދެއްވައިފިއެވެ.
ޔޫރަޕުގެ ފުޓުބޯޅަ ކުލަބު ޖަމިއްޔާގެ ރައީސަކީ ވެސް ހެލައިފީއެވެ. އެ ޖަމާއަތުގެ ބައްދަލުވުމުގައި ވާހަކަ ދައްކަމުން އިންފަންޓީނޯގެ ނަން ވިދާޅުނުވެ ހެލައިފީވިދާޅުވީ ދުނިޔޭގެ ފުޓުބޯޅައާ ގުޅުން ހުރި ކަންކަމުގައި ކުލަބުތަކަށް ބަސް ބުނަން މިހާރަށްވުރެ ރަނގަޅު ޖާގައެއް ދޭންވާނެ ކަމަށެވެ.
ހެލައިފީ މި ގޮތަށް ވާހަކަ ދެއްކެވީ ފްރެންޗް ލީގުގެ ޓީވީ ރައިޓްސް އޭނާގެ ހިއްސާ އޮންނަ ގަތަރުގެ ބެއިން ސްޕޯޓްސް އަށް ދީފައިވާ މައްސަލަ ފްރާންސްގެ ޕްރޮސެކިއުޓަރުން މި މަހުގެ މެދުތެރޭގައި ބަލަން ފަށާފައިވަނިކޮށެވެ. ބޮޑަށް ބެލެވޭ ގޮތުގައި މިއީ އިންފަންޓީނޯ އަޑީގައި ހުންނަވައި އުފެއްދި މައްސަލައެކެވެ. ސަބަބަކީ އަންނަ މާޗު މަހު ބާއްވާ ފީފާގެ އިންތިޚާބަށް އޭނާއާ ވާދަކުރައްވަން ޔޫރަޕާއި ކޮންކާކަފް އަދި އޭޝިއާއިން ބޭނުންވާ ކެނޑިޑޭޓަކީ ހެލައިފީ ކަމަށްވުމެވެ.
ހެލައިފީ ވިދާޅުވީ ދުނިޔޭގެ ކުލަބުތަކަށް ކުޅެނީ ތަފާތު ގައުމުތަކުގެ ކުޅުންތެރިން ކަމަށާއި ކުލަބުތައް ހިންގަނީ ވެސް އެކި ގައުމުތަކުގެ މީހުން ކަމަށެވެ. އަދި ކުލަބުތައް ސްޕޮންސަރ ކުރަމުންދަނީ ވެސް ދުނިޔޭގެ އެތަން މިތަނުގެ ކުންފުނިތަކުން ކަމަށެވެ. އަދި ކުލަބުތަކުގެ ވިޔަފާރިއަކީ މުޅި ދުނޔޭގައި އޮތް އެއްޗެއް ކަމުން ސަޕޯޓަރުން ވެސް ތިބީ މުޅި ދުނިޔޭގައި ކަމަށް ހެލައިފީ ވިދާޅުވިއެވެ.
މިސާލު ދެއްކެވީ އެންމެ ފަހުގެ ވޯލްޑް ކަޕުންނެވެ. އެ މުބާރާތުގައި ކުޅުނު 48 ގައުމުގައި ޔޫރަޕުގެ ކުލަބުތަކަށް ނިސްބަތްވާ 857 ކުޅުންތެރިން ކުޅުނެވެ. ހެލައިފީ ވިދާޅުވީ މިވަރުގެ ބޮޑު ހަރަކާތެއް ކުލަބުތަކުން ހިންގާއިރު އެ މީހުންނަށް ފުޓްބޯޅައިގެ މުހިންމު ކަންކަމުގައި ބާރުގަދަ ބަހެއް ބުނެވެންވާނެ ކަމަށެވެ. އޭނާ އިޝާރާތް ކުރެއްވީ ފީފާގެ ރައީސް ކަމުގައި ހުންނަވައި އެއްވެސް ބަޔަކާ މަޝްވަރާނުކޮށް އިންފަންޓީނޯ ބޮޑެތި ނިންމެވުންތައް ނިންމަވާފައިވާތީ އޭނާ މަގާމުން ވަކި ކުރުމަށް ޔޫރަޕާއި ކޮންކާކަފް އަދި އޭޝިޔާއިން ކުރަމުންދާ މަސައްކަތަކަށް އިޝާރާތް ކޮށް ކަމަށް ބެލެވެއެވެ.
ހެލައިފީ ވިދާޅުވީ ފުޓުބޯޅައިގެ މުހިންމު ކަންކަން ނިންމަން މިހާރު ވެސް ތަފާތު ޖަމާއަތްތައް އެބަތިބި ކަމަށާއި ނަމަވެސް ކުލަބުތަކުން އަދާކުރާ ރޯލަށް ބަލާއިރު ބަސްބުނަން ނުސީދާ ޖާގައަކަށްވުރެ ބޮޑަށް ސީދާ ޖާގައެއް ބޭނުންވާ ކަމަށެވެ. ފަހަރުގައި މިއީ ދުނިޔޭގެ ގައުމުތަކާއެކު މިފަދަ ޖަމިއްޔާތަކަށް ވޯޓުލުމުގެ ފުރުސަތު ދިނުމުގެ ގޮތުން އޭނާ ވިދާޅުވި ވާހަކަފުޅެއް ކަމަށް ވުން ގާތެވެ. އިތުރަށް ވާހަކަފުޅު ދައްކަވަމުން ވިދާޅުވީ ދުނިޔޭގެ ފުޓްބޯޅައިގެ ކަންކަމުގައި ކުލަބުތަކުން އެކަތިގަނޑެއްގެ ގޮތުގައި ހާއްސަކޮށް ފުޓްބޯޅަ ޕޮލިޓިކްސްގައި ބަސް ކިޔަން ޖެހޭ ކަމަށެވެ. ހެލައިފީ ވިދާޅުވީ ފީފާއާ ގުޅުންހުރި ކަންކަމުގައި ފެނިގެންދަނީ ފުޓުބޯޅަ ކުރިއެރުވުމުގެ ބަދަލުގައި ބޮޑެތި މައްސަލަތަކާހެދި ވަގުތު ބޭކާރު ކުރަމުންދާތަން ކަމަށެވެ.
މިއާ ހިލާފަށް ފުޓުބޯޅައަކީ އެންމެންގެ ޚިޔާލުތައް އަޑުއަހައި ދެފުށްފެންނަ އަދި އިތުބާރު ހިފޭ އެއްޗަކަށް ވާންޖެހޭނެ ކަމަށެވެ. މިހެންވެ އުފައްދަން ޖެހޭ ދުނިޔޭގެ ކުލަބުތަކުގެ ޖަމިއްޔާ އަކީ މިފަދަ ދެފުށް ފެންނަ ނިޒާމަކަށް ކަންކަން ބަދަލު ކުރެވުމުގައި މުހިންމު ޖަމިއްޔާއަކަށްވެދާނެ ކަމަށެވެ.
ޔޫރަޕުގެ ކުލަބުތަކުގެ ޖަމިއްޔާއިން މިހާތަނަށް ކުރި މަސައްކަތާމެދު ހިތްހަމަޖެހުން ފާޅު ކުރައްވަމުން އިތުރު ދައުރަކަށް ޔޫރަޕުގެ ފުޓްބޯޅަ ޖަމިއްޔާ، ޔޫއޭފާގެ މިހާރުގެ ރައީސް އެލެގްޒެންޑާ ސެފެރިން ކުރިމަތިލައްވަން ޚެލައިފީ ތާއީދު ކުރެއްވިއެވެ. ސެފެރިން އަކީ އިންފަންޓީނޯގެ އިތުބާރު ނެތްކަމުގެ ވޯޓުނަގައި ނުވަތަ އޭނާ އިންތިހާބުގައި ބަލިކުރައްވަން އެންމެ ބޮޑަށް މަސައްކަތް ކުރައްވާ ފަރާތެވެ. ހެލައިފީގެ ވާހަކަފުޅަކީ އިންފަންޓީނޯ އަށް ދެއްވި ވަރުގަދަ ރައްދެއް ކަމަށް ބެލެވެނީ މިހެންވެއެވެ.