ޖަޕާނަށް ވިއްސާރަވެ ބޯކޮށް ވާރެ ވެހުމުގެ ސަބަބުން އޭޝިއަން ގޭމްސް ކްރިކެޓް މުބާރާތުގެ ސެމީ ފައިނަލަށް މުބާރާތުގެ ގަދަ ހަތަރު ޓީމު ހޮވިއްޖެ އެވެ.
މި މުބާރާތުގެ ގަވާއިދު ބުނާ ގޮތުން މެޗެއް ނުކުޅެ ހުއްޓާލަން ޖެހޭ ފަދަ ހާލަތެއް މެދުވެރިވެއްޖެނަމަ މުބާރާތުގެ ކުރިއަށް އޮންނަ ބުރަށް ދާނީ އޭސީސީގެ ރޭންކިންގެ ކުރީގައިވާ ގައުމެވެ. މި ގޮތުގެ މަތީން ސެމީ ފައިނަލަށް އިންޑިއާ އާއި ޕާކިސްތާން އަދި ބަންގްލަދޭޝް އާއި ސްރީލަންކާ މިހާރު ވަނީ ހޮވިފަ އެވެ. ދުނިޔޭގެ ކްރިކެޓްގައި ވެސް އެންމެ ގަދަ ގައުމުތަކުގެ ތެރޭގައި ހިމެނޭ މި ހަތަރު ގައުމު މުބާރާތް ފަށަން ހަމަޖައްސާފައި އޮތީ ވެސް ކުއާޓާ ފައިނަލުންނެވެ.
ފުރަތަމަ މެޗުގައި އިއްޔެ ހެނދުނު ޕާކިސްތާނާއި ހޮންކޮން ކުޅެން އޮތް މެޗުގައި އެންމެ ބޯޅައެއް ވެސް އުކާފައިނުވެ އެވެ. މެޗު ނިންމާލީ ވާރެއާ ހެދި ކަނޑައަޅާފައިވާ ވަގުތަށް މެޗު ނުނިމޭނެ ކަމަށް ބަލައިފަ އެވެ. އޭގެ ފަހުން މެންދުރު ފަހު އިންޑޔާ އާއި އަފްޢާނިސްތާން ކުޅެން އޮތް މެޗު ހުއްޓާލީ އަފްޢާނިސްތާން ރަނގަޅު އަދަދަކަށް ލަނޑު ހަމަދަމުންދަނިކޮށް ވާރޭ ބޯކޮށްލުމުންނެވެ.
މެޗު ހުއްޓާލުމުން އަފްޢާނިސްތާން ކެޕްޓަން ބުނީ އިންޑިއާ އަކީ އެންމެ ވަރުގަދަ ޓީމު ނަމަވެސް މެޗުގައި އޭނާގެ ޓީމު ރަނގަޅު ކުޅުމެއް ދައްކަމުންދަނިކޮށް ހުއްޓާލަން ޖެހުމަކީ ނަސީބު އެހީނުވުން ކަމަށެވެ.
މުބާރާތުގެ ކުއާޓާ ފައިނަލްގެ ފަހު ދެ މެޗު ކުޅެން ހަމަޖައްސާފައިވަނީ އޮތީ މިއަދު އެވެ. ލަންކާ ވާދަ ކުރަން އޮތީ ނޭޕާލާ އެވެ. ބަނގްލަދޭޝް ކުޅެން ޖެހުނީ މެލޭޝިޔާ އެވެ. މި ދެ މެޗު ވެސް ކުޅެވޭ ވަރަށް ވާރޭ ހުއްޓާނުލަ އެވެ. މިއީ މި މުބާރާތުގައި ވާރޭގެ ސަބަބުން ނުކުޅެ ހުއްޓާލަން ޖެހުނު ފަސް ވަނަ މެޗެވެ. ނޭޕާލާއި އަފްގާނިސްތާން ގަދަ އަށަކަށް ހޮވުނީ ނޭޕާލާއި ޖަޕާން ކުޅެން މެޗު ވިއްސާރަވެގެން ހުއްޓާލަން ޖެހުމުންނެވެ.
ސެމީ ފައިނަލުގައި އިންޑިއާ އާއި ޕާކިސްތާން ވާދަކުރާ މެޗަށް މުޅި ދުނިޔޭގެ ސަމާލުކަން ހުއްޓިގެންދާނެ އެވެ. އަދި ފައިނަލުގެ ފަހު ޖާގަ ހޯދަން ލަންކާ އާއި ބަނގްލަދޭޝް ވާދަކުރާ މެޗުގެ ފޯރި ވެސް ގަދަވާނެ އެވެ.
އޭޝިއަން ގޭމްސްގެ ސްޕޯޓިން ޑައިރެކްޓަރު ޖެރަޑް ޝިއަރާ ވިދާޅުވީ ވާރޭގެ ސަބަބުން މެޗުތައް ހުއްޓާލަން ޖެހުމަކީ ދެރަކަމެއް ކަމަށާއި ނަމަވެސް މިއީ ކުޅިވަރުގެ އާއްމު އުސޫލުގެ ބައެއް ކަމަށެވެ.
"ކްރިކެޓަކީ ބޭސްބޯޅަ ކަހަލަ ކުޅިވަރެއް. ވާރޭ ވެހޭނަމަ ނުކުޅެވޭނެ. މި އަހަރު ވަރަށް ބޮޑަށް މޫސުން މިއޮތީ މިކަހަލަ ގޮތަކަށް. ވާރޭގެ ސަބަބުން ގިނަ މެޗުތަކެއް ހުއްޓާލަން ޖެހުނު،" ޝިއަރާ ވިދާޅުވި އެވެ.
އޭޝިއަން ގޭމްސްގެ އެންމެ ފަހުގެ ފިރިހެން ޗެމްޕިއަނުންނަކީ އިންޑިޔާ އެވެ. އެ ގައުމުން ވަނީ މިފަހަރުގެ ގޭމްސްގައި އަންހެން ކްރިކެޓްގެ ރަންމެޑަލް ވެސް ހާސިލް ކޮށްފަ އެވެ.