ބަންގްލަދޭޝްގައި ފާއިތުވި ދިހަ އަހަރު ދުވަހުގެ ތެރޭގައި ކުރިމަތިވި އެންމެ ނުރައްކާތެރި ހިމަބިހީގެ ބަލިމަޑުކަން ފެތުރި، އެތައް ސަތޭކަ ކުޑަކުދިންނެއްގެ ފުރާނަ ގެއްލެމުންދާއިރު، ގިނަ ޢާއިލާތަކަށް މާލީ ގޮތުން ބޮޑެތި ގޮންޖެހުންތަކެއް ކުރިމަތިވެފައިވާ ކަމުގެ އިންޒާރު އެހީދޭ ޖަމާޢަތްތަކުން ދީފިއެވެ.
ބަންގްލަދޭޝްގެ ސިއްޙީ ވުޒާރާގެ ރަސްމީ ތަފާސްހިސާބުތަކުން ދައްކާ ގޮތުގައި، މިދިޔަ މާރިޗު މަހުގެ 15ވަނަ ދުވަހުން ފެށިގެން މިހާތަނަށް މަދުވެގެން 844 ކުޑަކުދިން މި ބަލީގައި މަރުވެފައިވާއިރު، 112,000އަށްވުރެ ގިނަ މީހުން ވަނީ ބަލިޖެހިގެން ހަސްފަތާލުތަކުން ފަރުވާ ހޯދާފައެވެ.
އިންޓަނޭޝަނަލް ފެޑެރޭޝަން އޮފް ރެޑްކުރޮސް އެންޑް ރެޑްކުރެސެންޓް ސޮސައިޓީސް (އައިއެފްއާރުސީ) އާއި ބަންގްލަދޭޝް ރެޑްކުރެސެންޓް ސޮސައިޓީން ގުޅިގެން ކުރި ދިރާސާއަކުން ދައްކާގޮތުގައި، ބަލީގެ އަސަރުކުރި ކޮންމެ 10 އާއިލާއަކުން 9 އާއިލާއަކަށް ޖެހިފައިވަނީ ބޭސްފަރުވާގެ ޚަރަދުތައް ހަމަޖެއްސުމަށްޓަކައި ދަރަންޏަށް ފައިސާ ނަގާށެވެ.
ބަންގްލަދޭޝްގެ ވެރިރަށް ޑާކާގައި ހުންނަވާ އައިއެފްއާރުސީގެ ވަފުދުގެ ވެރިޔާ އަލްބަރޓޯ ބޮކަނެގްރާ ވިދާޅުވި ގޮތުގައި، މި ސިއްޙީ ކުއްލި ނުރައްކަލުގެ އަސަރު ކޮށްފައިވަނީ ހަމައެކަނި ހަސްފަތާލުތަކަށް އެކަނި ނޫން ކަމަށާއި، މީގެ ސަބަބުން ޢާއިލާތަކަށް މާލީ ގޮތުން ބޮޑެތި ދަތިތަކާ ކުރިމަތިލާންޖެހިފައިވާ ކަމަށެވެ.
ސަރުކާރުން ހިންގާ ހަސްފަތާލުތަކުން ހިލޭ ފަރުވާ ދިން ނަމަވެސް، އިތުރު ޚަރަދުތައް އިންތިހާއަށް ބޮޑުވެފައިވާކަން ދިރާސާއިން ވަނީ ހާމަވެފައެވެ. އެގޮތުން ބަލިމީހުން އުފުލުމަށް އެމްބިއުލަންސް ކުއްޔަށް ނެގުމަށާއި، ބޭސް ގަތުމުގެ އިތުރުން ކާބޯތަކެތި ހޯދުމަށް އާއިލާތަކުން ބޮޑެތި ހޭދަތަކެއް ކުރަންޖެހެއެވެ.
ބައެއް އާއިލާތަކުން ބުނި ގޮތުގައި އެމްބިއުލަންސަކަށް އެކަނިވެސް 200 ވަރަކަށް ޑޮލަރު ޚަރަދުވާއިރު، މިއީ މަހަކު 48 އާއި 160 ޑޮލަރާ ދެމެދުގެ އާމްދަނީއެއް ލިބޭ ނިކަމެތި އާއިލާތަކަށް އުފުލޭވަރުގެ ބުރައެއް ނޫނެވެ.
މި ރޯގާ މިހާ ބޮޑަށް ފެތުރެން މެދުވެރިވި މައިގަނޑު ސަބަބެއް ކަމަށް ބެލެވެނީ، 2024ވަނަ އަހަރު ބަންގްލަދޭޝްގައި ހިނގި ސިޔާސީ ހަމަނުޖެހުންތަކާ ގުޅިގެން ވެކްސިން ދިނުމުގެ ޕްރޮގްރާމްތަކަށް ބުރޫއެރުމެވެ. މީގެ ސަބަބުން ގިނަ ޢަދަދެއްގެ ކުދިންނަށް ވެކްސިން ނުޖެހި، ބަލީގެ ނުރައްކަލަށް ހުށަހެޅިގެން ދިޔައެވެ.
ބަންގްލަދޭޝް ސަރުކާރުން މިހާރު ވަނީ މި ބަލި ކޮންޓްރޯލްކުރުމަށްޓަކައި މުޅި ޤައުމުގައި ބޮޑު ވެކްސިން ކެމްޕޭނެއް ފަށާފައެވެ. ނަމަވެސް، އަދިވެސް ބަލިޖެހޭ ކުދިންގެ ޢަދަދު މަދުނުވާކަން ފާހަގަކުރެވެއެވެ. އެގޮތުން މިދިޔަ އާދީއްތަ ދުވަހު އެކަނިވެސް ހިމަބިހި ޖެހިގެން 4 ކުޑަކުދިން މަރުވެފައިވާ ކަމަށް ރިޕޯޓުތައް ބުނެއެވެ.