ހުޅުމާލޭގެ މަގުހަދާ ސަރަހައްދުތަކަށް ނުވަނުމަށް އިލްތިމާސްކޮށްފި

ހުޅުމާލޭގެ މަގުތައް މާރާމާތުކުރުމުގެ މަސައްކަތް ކުރުމަށް ބަންދުކޮށްފައިވާ ސަރަހައްދުތަކަށް ޢާއްމުން ނުވަނުމަށް ހައުސިން ޑިވެލޮޕްމެންޓް ކޯޕަރޭޝާން އެޗްޑީސީން އިލްތިމާސް ކުރައްވައިފިއެވެ.

މިކަމާއި ގުޅިގެން އެޗްޑީސީން ނެރުނު ނޫސްބަޔާނެއްގައި ވިދާޅުވީ، މިމަސައްކަތް ކުރިއަށް ގެންދިއުމަށް ހަމަޖެހިފައިވަނީ ފިޔަވަހިތަކަކަށް ބަހާލައިގެން ކަމަށެވެ. އަދި މި މަސައްކަތް ކުރުމަށް ނިންމާފައިވަނީ، ރައްޔިތުންގެ ދިރިއުޅުމުގެ ކަންކަމަށް ވީހާވެސް ބުރޫނާރާނެ ގޮތަކަށް ބަލައިގެން ކަމަށް އެ ކޯޕަރޭޝަނުން މައުލޫމާތު ދެއްވައެވެ.

އެޗްޑީސީން ވިދާޅުވީ، މަސައްކަތް ކުރިއަށްދާ ވަގުތުތަކުގައި އާންމުންގެ ސަލާމަތާއި ރައްކާތެރިކަމަށްޓަކައި، އަދި މަސައްކަތް އަވަހަށް ނިންމުމަށްޓަކައި ބައެއް މަގުތައް ވަގުތީ ގޮތުން ބަންދުކުރެވޭނެ ކަމަށެވެ. އެހެންކަމުން، މަސައްކަތް ކުރުމަށް ބަންދުކޮށްފައިވާ ސަރަހައްދުތަކަށް ނުވަނުމަށާއި، ބަހައްޓާފައިވާ ޓްރެފިކް ނިޝާންތަކާއި އެއްގޮތަށް އަމަލުކުރުމަށް އެޗްޑީސީން ވަނީ އިލްތިމާސް ކުރައްވާފައެވެ.

އެޗްޑީސީން ވިދާޅުވީ، މި މަސައްކަތަކީ މަގުތަކުގެ ފެންވަރު ރަނގަޅުކޮށް، ދަތުރުފަތުރު ކުރުމުގައި ދިމާވާ ދަތިތަކަށް ހައްލެއް ހޯދައިދިނުމަށް ކުރިއަށްގެންދާ މަޝްރޫއެއް ކަމަށާއި މަޝްރޫއާ ގުޅިގެން އާންމުންނަށް ދިމާވެދާނެ ދަތިތަކަށްޓަކައި މާފަށް އެދޭ ކަމަށެވެ.

ހުޅުމާލެ ފޭސް 1 އަދި ފޭސް 2 ގެ މަގުތައް މަރާމާތުކުރުމުގެ މަސައްކަތާ ގުޅޭ

އިތުރު މައުލޫމާތު: https://t.co/7WWWURVGtT#WithHDC #SeaToSilverShores #HDC25 pic.twitter.com/y2X0rKE0pk

— Housing Development Corporation (@hdcmaldives) April 26, 2026

އެޗްޑީސީން އަންނަނީ ހަލާކުވެފައިވާ މަގުތައް މަރާމާތު ކުރުމުގެ މަސައްކަތުގެ އިތުރުން ފަހި ދިރިއުޅުން ކޯޕަރޭޝަން، އެފްޑީސީން ހުޅުމާލޭގެ ދެވަނަ ފިޔަވަހީގައި ތަރައްގީކޮށްފައިވާ 4000 ފްލެޓް ހުންނަ ސަރަހައްދުގެ މަގުތައް ހެދުމުގެ މަސަތްކަތް ވެސް ކުރަމުންނެވެ. އެޗްޑީސީން ވިދާޅުވީ، އެ މަސައްކަތުގެ ބޮޑު ބައެއް މިހާރު ނިމިފައިވާ ކަމަށެވެ.

ރާއްޖޭގެ ރަށްތަކުގެ މަގުތައް ޒަމާނީ ފެންވަރަށް ތަރައްޤީ ކުރުމުގެ ސިޔާސަތުގެ ދަށުން އެކިއެކި ކުންފުނިތަކާއި ޙަވާލުކޮށްގެން މާލޭގެ މަގުތަކާއި ހުޅުމާލެ އަދި އަތޮޅުތެރޭގެ ރަށްތަކުގެ މަގުތައް ހެދުމުގެ އެތައް މަޝްރޫއެއްގެ އަމަލީ މަސައްކަތް މިހާރުވަނީ ފަށާފައެވެ.