ޖޮއާއޮ ޕެޑްރޯ އަކީ ހާލެންޑް، ކޭން އަދި އެމްބާޕޭއާ އެއް ފެންވަރެއްގެ ކުޅުންތެރިއެއް

އިނގިރޭސި ޕްރިމިއަރ ލީގުގެ ޗެލްސީއަށް ކުޅެމުން އަންނަ އުމުރުން 24 އަހަރުގެ ޖޮއާއޮ ޕެޑްރޯ އަކީ، ލީގުގެ ލެޖެންޑް ހެރީ ކޭންއާއި މިވަގުތު ލީގުގައި ހުރި އެންމެ މޮޅު އެއް ސްޓްރައިކަރު ކަމުގައިވާ މެންޗަސްޓަރ ސިޓީގެ އާލިންގް ހާލެންޑާ އެއް ލެވަލްއެއްގައި ހިމެނޭ ކުޅުންތެރިއެއްކަމަށް ޗެލްސީގެ ކޯޗު ލިއަމް ރޮޒީނިއާ ބުނެފިއެވެ.

ޕެޑްރޯ ވަނީ ޗެލްސީން އެންމެފަހުން ލީގުގައި އެސްޓަން ވިލާއާ ދެކޮޅަށް ކުޅެ 1-4 އިން މޮޅުވި މެޗުގައި ހެޓްރިކް ހަދާފައެވެ.

މި ސީޒަނުގައި މިހާތަނަށް ހުރިހާ މުބާރާތެއްގައި ޗެލްސީ ޖާޒީގައި ޕެޑްރޯ ޖެހި ލަނޑުތަކުގެ އަދަދު 17 އަށް އަރައެވެ. އޭގެތެރެއިން 14 ލަނޑަކީ ޕްރިމިއަރ ލީގުގައި އޭނާ ޖަހާފައިވާ ލަނޑުތަކެކެވެ. މިއިން އެއްވެސް ލަނޑެއް އޭނާ ޕެނަލްޓީގެ އެހީގައި ކާމިޔާބުކޮށްފައިނުވާއިރު، ޕެނަލްޓީ ނޫން ލަނޑުތަކުން ޕެޑްރޯއަށް ވުރެ ގިނަ ލަނޑު ޕްރިމިއަރ ލީގުގައި ކާމިޔާބުކޮށްފައިވާ ހަމައެކަނި ކުޅުންތެރިއަކީ ހާލެންޑެވެ. ޕެނަލްޓީ ނޫން ލަނޑުތަކުގެ ގޮތުގައި ހާލެންޑްގެ ލަނޑުތަކުގެ އަދަދު 19 އަށް އަރައެވެ.

ޔޫރަޕުގެ އެހެން ލީގުތަކަށް ބަލާލާއިރު ޖަރުމަނު ބުންޑަސްލީގާގައި ހެރީ ކޭން ވަނީ އެފަދަ 20 ލަނޑު ކާމިޔާބުކޮށްފައެވެ. ރެއާލް މެޑްރިޑްގެ ތަރި ކިލިއަން އެމްބާޕޭއަށް، ޕެނަލްޓީގެ އެހީއައި ނުލައި ލަލީގާގައި ކާމިޔާބުކުރެވިފައި ވަނީ 15 ލަނޑެވެ.

ދުނިޔޭގެ އެންމެ މޮޅު ސްޓްރައިކަރުންނާ އެއް ފެންވަރެއްގައި ޖޮއާއޮ ޕެޑްރޯގެ ނަން ލިއަމް ރޮޒީނިއާ ހިމެނީ މި ސަބަބަށްޓަކައެވެ.

ޕެޑްރޯ އާ ގުޅޭގޮތުން ވާހަކަދައްކަމުން ރޮޒީނިއާ ބުނީ، އޭނާގެ އިރުޝާދުގެ ދަށުން މިވީ ދެ މަހެއްހައި ދުވަހުގެ ތެރޭގައި ޕެޑްރޯ ދައްކާފައިވާ ކުޅުމާމެދު ނުހަނު ހިތްހަމަޖެހޭ ކަމަށާއި އެއީ ދުނިޔޭގެ ފެންވަރުގެ ސްޓްރައިކަރެއް ކަމަށެވެ. އަދި މިއަދު އޭނާ ގުނާލެވޭނީ އެމްބާޕޭ، ހާލެންޑް އަދި ހެރީ ކޭންއާ އެއް ފެންވަރެއްގައިކަމަށް ރޮޒީނިއާ ބުންޏެވެ.

އޭނާ އިތުރަށް ބުނީ، ޖޮއާއޮ ޕެޑްރޯގެ ބަދަލުގައި ޓީމަށް ގެންނަން ބޭނުންވާ އެއްވެސް ކުޅުންތެރިއަކު ނެތް ކަމަށެވެ. ޕެޑްރޯގެ ފަރާތުން، ކޯޗަކު އުއްމީދުކުރާނެ ހުރިހާ ކަމެއް، ސިފައެއް ފެންނަމުންދާކަމަށް ބުނެ ރޮޒީނިއާ ވަރަށް ބޮޑަށް އޭނާއަށް ތައުރީފުކުރިއެވެ.

ޕެޑްރޯ ދެން ލަނޑެއް ޖަހައިފިނަމަ އޭނާ ވެގެންދާނީ، 2016-2017 ވަނަ ސީޒަނަށްފަހު ޗެލްސީގެ އައުޓް އެންޑް އައުޓް ސްޓްރައިކަރަކު 20 ލަނޑު ހަމަކުރި ފުރަތަމަ ކުޅުންތެރިޔާ އަށެވެ. އެ ސީޒަނުގައި މި އަދަދަށް ލަނޑު ޖެހީ ޑިއޭގޯ ކޯސްޓާއެވެ.