ޔަހޫދީންގެ ޙަމަލާތައް އަނެއްކާ ވެސް ޙިޒްބުاللهއަށް އަމާޒުވާނެ ކަމަށް ދުރާލައި ވިސްނާ، ލުބުނާނުގެ ޙިޒްބުاللهއިން އެ ކަމަށް ތައްޔާރުވަމުން ދިޔަ ކަމަށް މަސްދަރުތަކުން ބުނެފިއެވެ.
ޙިޒްބުاللهގެ އަސްކަރީ ޤާބިލުކަން އިތުރު ކުރުމަށް ފާއިތުވި މަސްތަކުގައި އެ ޖަމާޢަތުން ދިޔައީ އެ ޖަމާޢަތުގެ އަތުގައި ހުރި ރޮކެޓާއި ޑްރޯންގެ ޢަދަދު އިތުރުކުރަމުންނެވެ. ޔަހޫދީންނާއި ޙިޒްބުاللهއާ ދެމެދު އައު ކުރިމަތިލުމަކަށް ގޮސްފި ނަމަ ޙިޒްބުالله ނެތިދިޔުން އެކަށީގެންވާ ކަމަށް އެ ޖަމާޢަތުން ދިޔައީ ވިސްނަމުންނެވެ.
1982ވަނަ އަހަރު އީރާނުގެ އިންޤިލާބީ ފައުޖުން އުފައްދާފައިވާ ޙިޒްބުالله ހަނގުރާމައަށް ތައްޔާރު ކުރުމަށް އީރާނުން ދެމުން ދިޔި ފައިސާ ހިމެނޭ ގޮތަށް ޙިޒްބުاللهއިިން ދިޔައީ މަހަކު 50 މިލިޔަން އެމެރިކާ ޑޮލަރު ޚަރަދުކުރަމުންނެވެ. އެ ފައިސާ ބޭނުން ކުރީ ހަނގުރާމަވެރިންނަށް މުސާރަ ދިނުމަށާއި ހަތިޔާރު އިތުރު ކުރުމަށެވެ. އީރާނުގެ އެހީތެރިކަމާއެކު ޙިޒްބުاللهއިން ދިޔައީ ލުބުނާނުގައި އަމިއްލަ ރޮކެޓާއި ޑްރޯން ވެސް އުފައްދަމުންނެވެ. އަދި އެހެން ގޮތްގޮތުން ވެސް އެ ޖަމާޢަތުން ދިޔައީ ހަތިޔާރު އެއްކުރަމުންނެވެ.
ހުސްވި ފެބްރުއަރީ މަހުގެ 28ވަނަ ދުވަހު ޔަހޫދީންނާ ގުޅިގެން އެމެރިކާއިން އީރާނަށް ޙަމަލާ ދޭން ފަށައި، އެ ޙަމަލާތަކުގައި އީރާނުގެ ރޫޙީ ވެރިޔާ އާޔަތުالله ޢަލީ ޚާމަނާއީ އަވަހާރަކޮށްލުމާއެކު މާރިޗު މަހުގެ 2ވަނަ ދުވަހު އީރާނާ ގާތް ގުޅުމެއް ބާއްވާ ޙިޒްބުاللهއިން ވަނީ އެ ހަނގުރާމައަށް ވަދެ، ޔަހޫދީންނަށް ޙަމަލާ ދޭން ފަށައިފައެވެ. ޙިޒްބުاللهއިން ޤަބޫލުކުރާ ގޮތުގައި އީރާނަށް ޙަމަލާ ދިނުމަށް ފަހު ޔަހޫދީންގެ ލޯތައް ދެން އަމާޒު ވާނީ ޙިޒްބުاللهއަށެވެ. އެއީ އެ ޖަމާޢަތް ނައްތާލުމުގެ ބޭނުމުގައެވެ. ޔަހޫދީން އީރާނަށް ޙަމަލާ ދިނުމުން އެ ހަނގުރާމައިގެ ތެރެއަށް ވަދެ ޔަހޫދީންނަށް އިސްވެ ޙަމަލާ ދިނުމަށް ޙިޒްބުاللهއިން ނިންމީ އެ ބިރު އޮތުމުން ކަމަށް ބެލެވެއެވެ.
2024ވަނަ އަހަރު ޔަހޫދީންނާއި ޙިޒްބުاللهއާ ދެމެދު ކުރި ހަނގުރާމައިގައި ޙިޒްބުاللهއަށް ބޮޑެތި ގެއްލުންތައް ލިބި ބަލިކަށިވި ނަމަވެސް އެ ޖަމާޢަތުން މިހާރު ވަނީ ޤާބިލުކަން އިތުރުކޮށްފައެވެ. އެނގިފައިވާ ގޮތުގައި އެންމެ ފަހުގެ ޙަމަލާތައް ފެށިއިރު ގާތްގަނޑަކަށް 25،000 ރޮކެޓާއި މިސައިލް ޙިޒްނުاللهގެ އަތުގައި ހުއްޓެވެ. ޙިޒްބުاللهއިން ދަނީ ދުވާލެއްގެ މައްޗަށް ގިނަ ޢަދަދެއްގެ ޑްރޯންއާއި ރޮކެޓު ޙަމަލާތައް ދެމުންނެވެ. 2024ވަނަ އަހަރުގެ ހަނގުރާމައިގައި ޙިޒްބުاللهގެ 5،000 ހަނގުރާމަވެރިން މައިދާނުގައި ޝަހީދުވި ނަމަވެސް ޙިޒްބުاللهގެ ހަނގުރާމަވެރިންގެ ގޮތުގައި އަދިވެސް 95،000 ހަނގުރާމަވެރިން ތިބި ކަމަށް ޤަބޫލުކުރެވެއެވެ.