އިނގިރޭސި އެފްއޭ ކަޕްގެ ކުއާޓަރ ފައިނަލުގެ ޖާގައެއް ލިވަޕޫލް އިން ހޯދައިފި އެވެ.
ލިވަޕޫލް އިން މި މުބާރާތުގެ ކުއާޓަރ ފައިނަލުގެ ޖާގައެއް ހޯދާފައިވަނީ އެފްއޭ ކަޕްގެ ފަސްވަނަ ބުރުގައި ރޭ ވޮލްވްސް އާއި ދެކޮޅަށް ކުޅުނު މެޗު 3-1 ގެ ނަތީޖާއަކުން ކާމިޔާބުކޮށްގެންނެވެ.
ވޮލްވްސްގެ މޮލިނެކްސް ސްޓޭޑިއަމްގައި ކުޅުނު މި މެޗުގެ ގިނައިރު ލިވަޕޫލް އިން ބޯޅަ ހިފަހައްޓައިގެން ކުޅެ ގިނަ ފުރުސަތުތަކެއް ވަނީ ތަނަވަސްކޮށްފަ އެވެ. ނަމަވެސް ފުރަތަމަ ހާފުގައި ވޮލްވްސްގެ ޑިފެންސްލައިން ފޫއަޅުވާލެވޭ ގޮތް ލިވަޕޫލް އަށް ވަނީ ނުވެފަ އެވެ.
ލިވަޕޫލް އިން މި މެޗުގައި ކުރި ހޯދާފައިވަނީ މެޗުގެ ދެވަނަ ހާފުގެ ކުޅުން ފެށުނުތާ ހަވަނަ މިނިޓުގައި އެންޑީ ރޮބަޓްސަން ކާމިޔާބުކޮށްދިން ލަނޑުންނެވެ.
އަދި އޭގެ ދެ މިނިޓު ފަހުން އެންޑީ ރޮބަޓްސަން ދިން ޕާހަކުން މުހައްމަދު ސަލާ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
ލިވަޕޫލް އިން މި މެޗުގައި ޖެހި ތިންވަނަ ލަނޑަކީ މެޗުގެ 74 ވަނަ މިނިޓުގައި ކާރޓިސް ޖޯންސް ކާމިޔާބުކޮށްދީފައިވާ ލަނޑެކެވެ.
ވޮލްވްސް އިން މި މެޗުގައި ލަނޑެއް ޖެހުމަށް ކުރަމުން އައި މަސައްކަތަށް ނިމުމެއް އައިސްފައިވަނީ މެޗުގެ ފުރިހަމަ ވަގުތު ހަމަވެ އިންޖަރީ ވަގުތުގެ ކުޅުމުގައި ހްވެން ހީ ޗެންގް ކާމިޔާބުކޮށްދިން ލަނޑުންނެވެ.
ޕްރިމިއާ ލީގުގެ އެންމެ ފަހުގެ ޗެމްޕިއަން ލިވަޕޫލް އަށް މި ސީޒަނުގައި ލީގުގައި އެދެވޭ ނަތީޖާތަކެއް ހޯދިފައިނުވާއިރު އެ ޓީމުން އަންނަ އަންގާރަ ދުވަހުގެ ރޭ ނިކުންނާނީ ޔޫއެފާ ޗެމްޕިއަންސް ލީގުގެ ދެވަނަ ބުރުގައި ތުރުކީގެ ގަލަތަސަރާއީ އާއި ދެކޮޅަށެވެ.