އިރާނަށް އިޒްރޭލާއި އެމެރިކާ ގުޅިގެން ދޭން ފެށި ހަމަލާތަކުގެ ސަބަބުން ވެސްޓް އިންޑީޒްގެ ކްރިކެޓް ޓީމު އިންޑިޔާގައި ތާށި ވެއްޖެ އެވެ.
މި ޓީމު އިންޑިޔާ އަށް ދިޔައީ ޓުވެންޓީ20 ކްރިކެޓް ވޯލްޑް ކަޕުގެ ސެމީ ފައިނަލުގައި ނިއުޒީލޭންޑާ ދެކޮޅަށް ކުޅޭށެވެ. އެ މެޗުން ބަލިވެ މުބާރާތް ނިމިފައިވާއިރު އެނބުރި ގައުމަށް ނުދެވި ކަލްކަތާގައި ވެސްޓް އިންޑީޒްގެ ކުޅުންތެރިން ތިބޭތާ މިއަދަށް ވަނީ ފަސް ދުވަސް ވެފަ އެވެ.
މިކަމާ ގުޅިގެން އިންޓަނޭޝަނަލް ކްރިކެޓް ކައުންސިލުން ބުނީ ޓީމު ވެސްޓް އިންޑީޒަށް އެނބުރި ދިއުމަށް ޗާޓަރު ފްލައިޓެއް މިހާރު ހަމަޖެހިފައިވާ ކަމަށާއި މެދުއިރުމަތީގެ ވައިގެ ސަރަހައްދު ބޭނުން ކުރުމުގެ ހުއްދަ ލިބުނުހާ އަވަހަކަށް ޓީމު ފުރާނެ ކަމަށެވެ. އަދި އެކަމަށްޓަކައި ކެނޑިނޭޅި ގައުމުތަކާއެކު މަޝްވަރާތައް ކުރަމުންދާ ކަމަށެވެ.
މީގެ އިތުރުން އިންޑިޔާގައި ތިބި ދެކުނު އެފްރިކާގެ ޓީމު ވެސް ގައުމަށްދިޔަކަން މުޅިން ޔަގީނެއް ނޫނެވެ. މީގެ އިތުރުން މި ހަނގުރާމައިގެ ސަބަބުން ޒިމްބާބުވޭގެ ޓީމު ވެސް އިންޑިޔާގައި ކަނޑައަޅާފައިވާ ދުވަހަށްވުރެ ގިނައިން މަޑުކުރަން ޖެހުނެވެ.
ނަމަވެސް މިހާރު ބައެއް ކުޅުންތެރިން ވަނީ އަމިއްލަ ގޮތުން ޝެޑިއުލް ބަދަލުކޮށް، ނިއުޒީލޭންޑަށް ދާން ނިންމައިފަ އެވެ. އެއީ އެ ގައުމުގައި ކުޅެން ހަމަޖެހިފައިވާ ކުލަބު ލެވެލްގެ ބައެއް މެޗުތަކަށެވެ.
ޓުވެންޓީ 20ކްރިކެޓް ވޯލްޑް ކަޕުގެ ފައިނަލަށް ހޮވުނީ މުބާރާތުގެ އެންމެ ފަހުގެ ޗެމްޕިއަން އިންޑިޔާ އާއި ނިއުޒީލޭންޑެވެ. ފައިނަލް މެޗު އޮންނާނީ މާދަމާ އެވެ.