"މާތް ﷲގެ ދަރުބާރަށް ހާޒިރުކުރާ ދުވަހަށް ތައްޔާރު ވާންޖެހޭ"

މާތް ﷲގެ ދަރުބާރަށް ހާޒިރުކުރާ ދުވަހަށް ތައްޔާރުވުމަށް ނިޢުމަތްތަކަށް ޝުކުރުވެރި ވާންޖެހޭ ކަމަށް އައްޝައިޚް އަޙްމަދު މައުމޫން ވިދާޅުވެއްޖެއެވެ.

ޝައިހް ވިދާޅުވީ، އިންސާނާއަށް ދެއްވާފައިވާ ނިޢުމަތްތަކާއިމެދު ޝުކުރުވެރިނުވާނަމަ ނަތީޖާއަކަށް ވެގެންދާނީ މާތް ﷲ އެ ނިޢުމަތްތައް އަނބުރާ ގެންދެވުން ކަމަށާއި، ނިޢުމަތްތަކަށް ޝުކުރުވެރި ނުވުމަކީ މާތް ﷲގެ ގަދަފަދަ އަޒާބުވެސް ލިބޭނެ ކަމެއް ކަމަށެވެ.

ކ.ހުރާގައި ބޭއްވި އިޙްޔާ ފޯރަމްގެ މައުޟޫއަކީ، "އިންސާނާއަށް ދެއްވާފައިވާ ނިޢުމަތްތަކާއިމެދު ސުވާލުވެވޭނެ" މި މައުޟޫއެވެ. މި މައުޟޫއަށް ތަޤުރީރު ކުރައްވަމުން އައްޝައިޚް އަޙްމަދު މައުމޫން ވިދާޅުވީ، ﷲ އެއްގޮތަށްވުރެ ގިނަ ގޮތްގޮތުން އިންސާނުންނަށް ފަސޭހަ ކޮށްދެއްވާފައިވާ ކަމަށެވެ. އެގޮތުން އެއްގޮތްތަކަށްވުރެ ގިނަ ގޮތްގޮތުން ނިޢުމަތްތައްވެސް ދެއްވާ ކަމަށެވެ.

އިންސާއަށް ދެއްވާފައިވާ 2 ނިޢުމަތަކާއިމެދު ވަރަށް ބޮޑަށް އިޙުމާލުވެފައިވާކަން ބަޔާންކުރައްވައި، ޝައިޚް ވިދާޅުވީ އެއީ ފުރިހަމަ ސިއްޙަތެއްގައި ވުމާއި އަދި ހުސްވަގުތު ކަމަށެވެ. މި 2 ނިޢުމަތާއިމެދު ވަރަށް ބޮޑަށް އިޙުމާލުވެފައިވާ ކަމަށް ޝައިޙް ވިދާޅުވިއެވެ.

ނިޢުމަތްތަކަށް ޝުކުރުވެރި ނުވެވުމުގެ ނަތީޖާއަކީ، ގަދަފަދަ އަޒާބު ލިބި، އަޅުގަނޑުމެންގެ އަތުން ނިޢުމަތްތައް ގެންދެވުން ކަމަށް ޝައިޚް ވިދާޅުވިއެވެ. ނިޢުމަތެއް ދެއްވުމަށްފަހު، އެ ނިޢުމަތް ބީވެދާނެ ފަދަ ބަޔަކަށް އަޅުގަނޑުމެން ވެގެންނުވާނެ ކަމަށް ޝައިޚް ވަނީ ޢިލްތިމާސް ކުރައްވާފައެވެ. ނިޢުމަތްތަކާއިމެދު ޝުކުރު ވީ ވަރަކަށް ނިޢުމަތް ގިނައިން ދެއްވާނެ ކަމަށްވެސް ޝައިޚް ވިދާޅުވިއެވެ.

"އިންސާނުން 2 ނިޢުމަތަކާއި މެދު އަޅާލުން ކުޑަ ކޮށްލާފައިވޭ. ފުރިހަމަ ސިއްޙަތަކީ ކިހާބޮޑު ނިޢުމަތެއްކަން އެނގޭނީ ބަލިވުމުން. ޒުވާނުންނާއި ކުޑަކުދިން މި 2 ނިޢުމަތައް ސަމާލުވުމަށް ޢިލްތިމާސްކުރަން." ޝައިޚް ވިދާޅުވިއެވެ.

މުސްކުޅިވުމުގެ ކުރިން ޒުވާންކަމުގެ ފައިދާ ހެޔޮ ގޮތުގައި ލިބިގަތުމާއި، ބަލިވުމުގެ ކުރިން ސިއްޙަތުގެ ފައިދާ ހެޔޮގޮތުގައި ހިފުމަށް އަދި ފަޤީރުވުމުގެ ކުރިން މުއްސަނދިކަމުގެ ފައިދާ ހެޔޮގޮތުގައި ހިފުމަށް ޤުރުއާނުގައިވެސް ބަޔާންކުރައްވާފައިވާ ކަމަށް ޝައިޚް ވިދާޅުވިއެވެ. މީގެއިތުރުން އިސްރާފު ކުރުމަކީ، ކޮށްގެންވާނެ ކަމެއްނޫން ކަމަށް މި ދަރުހުގައި ޝައިޚް ވަނީ ވިދާޅުވެފައެވެ.

އަރުޝީގެ ހިޔާވަހިކަން ލިބޭ މީހުންގެ ތެރޭގައި ޒުވާން އުމުރުގައި މިސްކިތައް އަހުލުވެރިވާ މީހުން ހިމެނޭ ކަމަށް ޝައިޙް ވިދާޅުވިއެވެ. އިޙްޔާ ފޯރަމްގައި އައްޝައިޚް އަޙްމަދު މައުމޫން ވިދާޅުވީ، ދުލުން ބޭރުކުރެވޭ ބަސްތަކާއި މެދު ވިސްނަން ޖެހޭ ކަމަށެވެ.

ބަސް ބޭރުވުމަށްފަހު އެއީ އަނބުރާ ގެނެވޭނެ އެއްޗެއް ނޫންކަން ފާހަގަކުރައްވައި ޝައިޚް ވިދާޅުވީ، ދެއްކި ވާހަކައަކީ ސަމާސާއަކަށް ނުވަތަ މަޖަލަކަށް ބުނި ވާހަކައެކޭ ބުނެގެން ﷲގެ ދަރުބާރުގައި ސަލާމަތެއް ނޫވެވޭނެ ކަމަށެވެ. ﷲ ގެ ދަރުބާރަށް ހާޒިރު ކުރާ ދުވަހަށް ތައްޔާރުވުމަށް ނިޢުމަތްތަކަށް ޝުކުރުވެރި ވާންޖެހޭ ކަމަށް ޝައިޚް ވަނީ ވިދާޅުވެފައެވެ.