އުމުރުފުރާތަކަށް ސަމާލުކަންދީ ކުޅުންތެރިން ކުރިއަރުވަން ޖެހޭ: އިޝްފާން

ރާއްޖޭގެ ޤައުމީ ސީނިއާ ބެޑްމިންޓަން ޓީމާއި 16 އަހަރުން ދަށުގެ އުމުރުފުރައާއި ދޭތެރޭ އޮތް 'ގެޕް' ކުޑަކުރުމަށް ރާއްޖޭގެ އެކި ކަންކޮޅުތަކުގައި ތިބި ގާބިލު ކުދިން ދެނެގަނެ އެ ކުދިން ކުރިއަރުވަން މަސައްކަތްކުރަން ޖެހޭ ކަމަށް ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ގެ ރައީސް އިޝްފާން މުޙައްމަދު (އިއްޕަ) ވިދާޅުވެއްޖެއެވެ.

ޕީއެސްއެމް ނިއުސްއަށް ދެއްވި ހާއްސަ އިންޓަވިއުއެއްގައި އިޝްފާން ވިދާޅުވީ، މި އުމުރުފުރައަށް ފޯކަސްކޮށްގެން ސަރުކާރުން ވަރަށް ބޮޑަށް އެތުލީޓުންގެ ފެންވަރު މަތިކޮށްދޭން މަސައްކަތް ކުރާކަމަށެވެ.

"ބެޑްމިންޓަން އެކަންޏެއްނޫން. މިވަގުތު ސަރުކާރުން ހުރިހާ ކުޅިވަރަކަށް ވަރަށް ބޮޑަށް ފޯކަސްކޮށްގެން، 16 އަހަރުން ދަށުގެ އަންހެން އެތުލީޓުން ވަރަށް ބޮޑަށް އިމްޕްރޫވްވެފައިވާ ތަން ފެންނަނީ" އިޝްފާން ވިދާޅުވިއެވެ.

އެގޮތުން ކުޅުންތެރިންނަށް ހޯދައިދޭ ތަމްރީނު ފުރުސަތުތަކާއި ބޭނުންވާ ވަސީލަތްތަކާއި، މެޑިކަލް އިންޝިއުރެންސާއި އިނާޔަތްތައް މިއީ ކުޅުންތެރިންގެ ކުރިއެރުމަށް މުހިންމު ދައުރެއް އަދާކުރާ ކަންކަން ކަމަށް އިޝްފާން ފާހަގަކުރެއްވިއެވެ. ބެޓްމިންޓަނާއި ގުޅޭ ގޮތުން އޭނާ ވިދާޅުވީ ހުނަރުވެރި ކުދިން ދެނެގަނެ އެކުދިން ކުރިއަރުވަން ޖެހޭ ކަމަށެވެ.

"މިވަގުތު ރާއްޖޭގެ އެތުލީޓުންނަށް ބަލާއިރު 14 އަހަރާއި 19 އަހަރާއި ދޭތެރޭގަ އެބަ ތިބި ވަރަށް ޕޮޓެންޝަލް ކުދިން. އެހެންވީމަ އެކުޅުންތެރިންނަށް ފޯކަސް ކޮށްގެން އެ ކުޅުންތެރިން އައިޑެންޓިފައިކޮށްގެން މަސައްކަތްކުރަން ޖެހޭނީ. ދެން އެ ކުޅުންތެރިންނަކީ މިހާރު އެ އުމުރުފުރައާއި ސީނިއާ ގައުމީ ޓީމާއި ދޭތެރޭގައި އޮތް ގެޕްވިޔަސް ނަތީޖާ ނެރޭއިރު، ހާއްސަކޮށް އިންޑިވިޖުއަލް ކުޅިވަރެއްވިއްޔާ މި ބޭނުންވަނީ ހަތަރު ފަސް އެތުލީޓުން ރަނގަޅު ފޯމުގައި ތިބެން" އިޝްފާން ވިދާޅުވިއެވެ.

ރާއްޖޭގެ އެކި ކުޅިވަރުތަކުން މިވަގުތު 16 އަހަރުން ދަށުގެ އަންހެން އެތުލީޓުން ވަރަށް ބޮޑަށް ކުރިއަރާފައިވާތަން ފެންނަ ކަމަށްވެސް، ކުރިން ޤައުމީ ޓީމަށް ކުޅެފައިވާ ތަޖުރިބާކާރު ކުޅުންތެރިއާ އިޝްފާން ފާހަގަ ކުރެއްވިއެވެ.

ކުޅުންތެރިންނަށް ސަރުކާރުން ހޯދައިދޭ ތަމްރީނު ފުރުސަތުތަކާއި ބޭނުންވާ ވަސީލަތްތަކާއި، މެޑިކަލް އިންޝިއުރެންސާއި އިނާޔަތްތައް މިއީ ކުޅުންތެރިންގެ ކުރިއެރުމަށް މުހިންމު ދައުރެއް އަދާކުރާ ކަންތައްތަކެއް ކަމަށްވެސް އިޝްފާން ފާހަގަ ކުރެއްވިއެވެ.

މީގެ އިތުރުން ކުރިއާއި އަޅާބަލާއިރު މިހާރު ކުޅުންތެރިން މުބާރާތްތަކަށް ތައްޔާރުކޮށްދިނުމުގައި އެންމެ ބޮޑު ދައުރެއް އަދާކުރަނީ ބެލެނިވެރިން ކަމަށާއި، ކުޅުންތެރިންނަށްވުރެ ބޮޑަށް ބެލެނިވެރިން މުބާރާތްތަކަށް ތައްޔާރުވާކަމަށްވެސް އޭނާ ފާހަގަކުރިއެވެ. އެހެންކަމުން ހަގު އުމުރުފުރާތަކުގެ އެތުލީޓުންގެ ކުރިއެރުމުގައި އެ ކުދިންގެ ބެލެނިވެރިންގެ ދައުރު ކޮންމެހެންވެސް ފާހަގަކުރާކަމަށާއި، ބެލެނިވެރިންނަށް ޝުކުރު ހައްޤުކަމަށް އޭނާ ވިދާޅުވިއެވެ.

ކުޅުންތެރިންގެ ކުރިއެރުމަށް ބީއޭއެމްއިން ކުރިޔަށް ގެންދާ ޑިވެލޮޕްމެންޓް ޕްރޮގްރާމްތައް ފާއިތުވި ދެ އަހަރުވެސް މެދު ނުކެނޑި ކުރިޔަށް ގެންދިޔައެވެ. އިދާރީ މައްސަލަތަކާއި ގުޅިގެން ޤައުމީ ހައިސިއްޔަތު ގެއްލިފައި އޮތް ދުވަސްވަރުވެސް ބެޑްމިންޓަން އެސޯސިއޭޝަނުން ގެންދިޔައީ ހަގު އުމުރުފުރާތަކުގެ ކުދިންނަށް، ޤައުމީ ޓީމުގެ ކޯޗު، ކޮރެއާގެ ޖަން ކީ ޔަންގް އާއި އިންޑިއާގެ އަބްދުއްރަހީމް ސެއިޚް މުހައްމަދު ކޯޗުގެ އެހީތެރިކަމާއެކު އެތުލީޓުން ކުރިއެރުވުމަށްޓަކައި ދިޔައީ މެދުނުކެނޑި ތަމްރީނުތައް ބާއްވަމުންނެވެ.

މީގެ އިތުރުން ރާއްޖޭގެ ޤައުމީ ޓީމުގައި ހިމެނޭ ބެޑްމިންޓަން ކުޅުންތެރިންގެ ފެންވަރު މަތިކޮށްދިނުމަށް އެކަޑަމީތަކުންވެސް މުހިންމު ދައުރެއް އަދާކުރެއެވެ. އަދި ސަރުކާރުގެ އަރުތަ ޕްރޮގްރާމް ރީ ބްރޭންޑްކޮށް އަނެއްކާވެސް އެކި ކުޅިވަރުތަކުން އެތުލީޓުންނަށް ތަމްރީނާއި ތަޖުރިބާގެ ފުރުސަތުތައް ފަހިކޮށްދިނުމުގެ މަސައްކަތް އަލުން ވަނީ ފަށައިފައެވެ.