ސިޓީއާއި ދެކޮޅަށް ނިންމި ނިންމުންތައް އިސްތިއުނާފް ކުރަން ހުށަހަޅައިފި

އިންގްލިޝް ޕްރިމިއަރ ލީގުން ސިޓީ އާއި ދެކޮޅަށް އުފުލި ދައުވާތައް ސާބިތުވާކަމަށް މިނިވަން ކޮމިޝަނުން ނިންމި ނިންމުންތައް އިސްތިއުނާފް ކުރަން އެކްލަބުން ހުށަހަޅައިފިއެވެ.

މިމައްސަލަ ބެލި މިނިވަން ކޮމިޝަނުންވަނީ ޕްރިމިއަރ ލީގުން ސިޓީ އާއި ދެކޮޅަށް އުފުލި 115 ދައުވާގެ ތެރެއިން 114 ދައުވާ ސާބިިތުވާކަމަށް ނިންމާފައެވެ. އަދި މިކަން ޕްރިމިއަރ ލީގުން ހާމަކުރަމުން އޮތީ މިއަދުގެ ނިޔަލަށް މިމައްސަލައިގައި ސިޓީއިން އިސްތިއުނާފް ކުރަން ބޭނުންނަމަ އެކަން ކުރުމަށެވެ. އަދި ސިޓީއިން މިހާރުވަނީ ބުރާސްފަތި ދުވަހުގެ ރޭ އިސްތިއުނާފް ކުރަން ހުށަހެޅިކަން ކަށަވަރު ކޮށްދީފައެވެ.

މަޢުލޫމާތުލިބޭގޮތުގައި އިސްތިއުނާފް މަރުހަލާގެ އަޑުއެހުންތައް ކުރިއަށް ގެންދިއުމަށްޓަކައި ޕްރިމިއަރ ލީގުގެ ޤާނޫނީ ޓީމުން އާޕެނަލެއް އެކުލަވާލާނެއެވެ. އަދި ޕްރިމިއަރ ލީގުގެ ގަވައިދު ބުނާގޮތުން މިމައްސަލަ އިތުރަށް އެއްކޮށް ބެލުމުގެ ފުރުސަތު ލިބިގެން ނުދާނެކަމަށާއި އޭގެ ބަދަލުގައި އޮންނާނީ ޕްރިމިއަރ ލީގުން އެކުލަވާލި މިނިވަން ކޮމިޝަނުން ނިންމި ނިންމުން ރިވިއު ކުރުން އެކަންޏެވެ. އަދި އިސްތިއުނާފް ކުރަން ހަށަހަޅާތާ 12 ހަފްތާގެ ތެރޭގައި މިމަރުހަލާ ނިންމަން ޖެހޭނެއެވެ. އަދި އެމަރުހަލާއަށްފަހު ޕެނަލްގެ ނިންމުން 30 ދުވަހުގެ ތެރޭގައި އާންމު ކުރަން ޖެހޭނެއެވެ.

މިނިވަން ކޮމިޝަނުން ބެލިބެލުންތަކަށްފަހު އެކޮމިޝަނުންވަނީ ސިޓީއަށް ލިބުނު އާންމު ދަނީ އޮޅުވާލުމުގެ ގޮތުން ޝޭމް ކޮންޓްރެކްޓް ތަކެއް އެކްލަބްގެ ސްޕޮންސަރުންނާއި އެކު ހަދާފަވާކަމަށް ބުނެފައެވެ. އަދި އެކްލަބަށް ނުލިބޭ 800 އަށް ވުރެ ގިނަ މިލިއަން ޕައުންޑް ލިބުނު އެއްޗެއްގޮތުގައި ދައްކާފައެވެ. އެކޮމިޝަނުން ބުނާގޮތުގައި މިފައިސާ އަކީ އެކްލަބަށް ސްޕޮންސަރުން އަތުން ލިބުނު ފައިސާގެ ބަދަލުގައި ކްލަބްގެ ވެރިންގެ ފަރާތުން ކްލަބަށް ވައްދާފައިވާ ފައިސާއެވެ. ޕްރިމިއަރ ލީގުން ހަތަރު އަހަރުގެ ދިގު މުއްދަތެއް ވަންދެން ކުރި ތަހްގީގްތަކަކަށްފަހު އުފުލި ދައުވާތަށް މިނިވަން ކޮމިޝަނުން ބަލަން ފަށާ އަދި ނިންމުން އާންމު ކޮށްފައިމިވަނީ އަޑުއެހުންތައް ނިންމާލިތާ 22 މަސް ފަހުންނެވެ. އަދި މިނިވަން ކޮމިޝަންގެ ރިޕޯޓުން މިކަމުގައި ސިޓީގެ މައްޗަށް މިދައުވާތައް ސާބިތުވާކަން ވަރަށް ސާފުކޮށް ހާމަވާކަމަށް ބުނާއިރު މިކަން ހާމަކުރަން މިހާ ގިނަ ދުވަސް ނެގީ ކީއްވެތޯ ބައެއް ފަރާތްތަކުން ސުވާލުުފައްދައެވެ.

ދެން އޮތީ ސިޓީއަށް އިސްތިއުނާފް މަރުހަލާ ކާމިޔާބުވުމުގެ ފުރުސަތު އޮތީ ކިހާވަރަކަށްތޯ އުފެދޭ ސުވާލެވެ. މިކަމާއި ގުޅޭގޮތުން ކުޅިވަރުގެ ކަންތައްތަކުގައި ހަރަކާތްތެރިވާ ޤާނޫނީ ވަކީލުން ބުރަވާގޮތުގައި މިމައްސަލަ ސިޓީއަށް ކާމިޔާބު ވުމުގެ ފުރުސަތު ވަރަށް ކުޑަވާނެއެވެ. އެއީ މިނިވަން ކޮމިޝަނުން ނިންމާފައިވާ ނިންމުން ތަކަކީ ވަރަށް ބޮޑަށް ދިރާސާކޮށް އެތައްބައެއްގެ ހެކިބަސް ނެގިގެން ނިންމާފައިވާ ނިންމުން ތަކެއް ކަމުން އެއަށް ބަދަލު ގެނައުމުގެ ފުރުސަތު ވަރަށް ކުޑަވެގެންދާނެއެވެ. އަދި މިކަމުގައި ކިރިޔާވެސް ކުރިއެރުމެއް ލިބިގެންދާނީ ކޮމިޝަނުން ނިންމާފައިވާ ނިންމުމުގެ ސަބަބުން ގާނޫނީ ހިލާފުތަކެއް އުޅޭކަމަށް ފާހަގަ ކުރެވޭކަމަށްވާނަމަ އެކަންޏެވެ. އެހެން ކަމުން ގިނަ ބަޔަކު ގަބޫލްކުރާގޮތުގައި އެފުރުސަތު ސިޓީއަށް ކުޑައެވެ. މިގޮތުން އެންމެ ފަހުން ޕްރިމިއަރ ލީގުގައި އިސްތިއުނާފް މަރުހަލާ ފެނިގެންދިޔަ އެވަޓަން އާއި ނޮޓިންގހަމް ފޮރެސްޓްގެ މައްސަލައިގައިވެސް އެދެ ކްލަބަށް އެކަން ކާމިޔާބު ވާގޮތެއް ނުވިއެވެ. ނަމަވެސް ސިޓީއިން ބުނާގޮތުގައި އެކްލަބުން ގަވައިދާ ހިލާފަށް އެއްވެސް ކަމެއް ނުކުރެއެވެ. އަދި މިހާރު މަންޒަރު ފެންނަ ފެނުމުން މިމައްސަލަ ނިމެން ދެން ކުރިން ވީހާ ގިނަ ދުވަސް ވުމުގެ ފުރުސަތު ކުޑައެވެ.