ޒުވާން ގައުމީ ޓީމު ތަމްރީނުތަކަށް ސިންގަޕޫރަށް

ރާއްޖޭގެ ޒުވާން ގައުމީ ޓީމު އިތުރު ތަމްރީނުތައް ހެދުމުގެ ގޮތުން ސިންގަޕޫރުގައި ކޭމްޕު ކުރުމަށް މިއަދު ފުރައިފިއެވެ.

ޒުވާން ޓީމުން ސިންގަޕޫރަށް މިކުރާ ދަތުރުގެ ބޭނުމަކީ މިމަހުގެ 23 އިން އަންނަމަހުގެ 3 ވަނަ ދުވަހަށް ރާއްޖޭގައި ބޭއްވުމަށް ހަމަޖެހިފައިވާ 20 އަހަރުން ދަށުގެ ސާފް ޗެމްޕިއަންޝިޕަށް ތައްޔާރުވުމުގެ ގޮތުން އިތުރު ތަމްރީނުތައް ހޯދާ، އެގައުމުގެ ޒުވާން ޓީމުތަކާއި އެކު އެކުވެރިކަމުގެ މެޗުތައް ކުޅެ މެޗު ތަޖުރިބާތައް ހޯދުމެވެ.

ރާއްޖޭގެ 20 އަހަރުންދަށުގެ ޓީމު ސިންގަޕޫރަށް މިއަދު ފުރާފައިވާއިރު، ޓީމު ފުރުމުގެ ކުރިން މާފަންނު ބަސް ޓާމިނަލުން ޓީމަށް ހިތްވަރުދިނުމުގެ ގޮތުން ކުޅިވަރު ވުޒާރާގެ ސްޓޭޓް މިނިސްޓަރ ޢަބްދުއްރައްޒާޤު އިބްރާހިމް އާއި އެފްއޭއެމްގެ އިސްވެރިންވަނީ ބައިވެރިވެވަޑައިގެންފައެވެ.

މާފަންނު ބަސް ޓާމިނަލުން ޒުވާން ޓީމަށް ހިތްވަރުދެއްވަމުން ކުޅިވަރު ވުޒާރާގެ ސްޓޭޓް މިނިސްޓަރ ޢަބްދުއްރައްޒާޤު އިބްރާހިމްވަނީ ކުޅުންތެރިންނާއި މުޚާޠަބުކުރައްވާ ކާމިޔާބީއަށް ވާސިލްވުމަށް ގަދައަޅާ މަސައްކަތްކުރުމަށް އެދިވަޑައިގެންފައެވެ.

20 އަހަރުންދަށުގެ ޒުވާން ޓީމު ސާފް ޗެމްޕިއަންޝިޕަށް ތައްޔާރުވަމުންދަނީ މިއަހަރުގެ ޖެނުއަރީމަހު ގައުމީ ޓީމާއި ހަވާލުވި ހަންގޭރީގެ ކޯޗު އިސްޓަވާން އުރުބާނީގެ އިރުޝާދުގެ ދަށުންނެވެ.

ޓީމާއި އެކު ފުރުމުގެ ކުރިން މާފަންނު ބަސް ޓާމިނަލުން ޕީއެސްއެމް ނިއުސްއަށް ދިން އިންޓަވިއުއެއްގައި ކޯޗު ބުނެފައިވަނީ މިއުމުފުރައަކީ "ގިފްޓެޑް" އުމުރުފުރައެއްކަމަށާއި، މިކުދިންގެ ހުނަރުތައް ވަރަށް ފަސޭހައިން ކުރިއެރުވިދާނެކަމަށެވެ. އެހެންނަމަވެސް ރާއްޖޭގެ ޒުވާން ޓީމަށް ގިނަ މެޗުތަކެއްގައި ވާދަކޮށްލުމުގެ ފުރުސަތު ފާއިތުވެދިޔަ ދުވަސްތަކުގައި ލިބިފައިނެތުމަކީ ދިމާވާ ގޮންޖެހުމެއްކަމަށެވެ. އެހެންކަމުން ސިންގަޕޫރަށް ކުރާ ދަތުރަކީ ޓީމުގެ ފެންވަރު މަތިކުރުމަށް ލިބިގެންދާ ރަނގަޅު ފުރުސަތެއްކަމަށް އޭނާ ފާހަގަކުރިއެވެ.

"އެންމެ މުހިންމު ކަމަކީ ކުޅުންތެރިންގެ ބުންވަރު އެންމެ އެކަށީގެންވާ ލެވެލްއަށް ގެނައުން. މިއީ ވަރަށް "ގިފްޓެޑް' އުމުރުފުރާއެއް. މިކުދިންގެ ހުނަރުތައް ކުރިއެރުވޭނެ. އެކަމަކު މިކުދިންނަށް މާގިނަ މެޗުތަކެއް ކުޅުމުގެ ފުރުސަތެއް ފާއިތުވެދިޔަ އަހަރުތަކުގައި ލިބިފައެއް ނެތް. އެހެންކަމުން މިކުދިންނަށް ބިދޭސީ ގައުމަކަށް ގޮސް ޓްރޭނިންތައް ކުރިއަށްގެންދަން ލިބުމަކީ އަހަންނަށް ލިބޭ ވަރަށް ބޮޑު ހިތްހަމަޖެހުމެއް. މިފަދަ ޓްރޭނިންތަކުގެ ސަބަބުން ކުޅުންތެރިން ބޭނުންވާ ލެވެލްއަށް ގެނެވޭނެ" 2009 ވަނަ އަހަރު ސާފް ޗެންޕިއަންޝިޕުގެ ފައިނަލަށް ރާއްޖެ ގެންގޮސްދިން ކޯޗު ބުންޏެވެ.

މިމަހުގެ 7 އިން 11 އަށް ސިންގަޕޫރުގައި ކުރިއަށްދާ ޓްރޭނިން ކޭމްޕާއި ގުޅޭގޮތުން އުރުބާނީ ބުނީ މިފަދަ ކޭމްޕެއްގެ މުހިންމުކަން ބޮޑުކަމަށެވެ. މި ކޭމްޕުގެ ތެރެއިން ކޯޗިން ސްޓާފުންނާއި ކުޅުންތެރިން އެކެއް އަނެކަކަށް ފަރިތަވެ، އެކުވެރިކަން އާލާވެގެންދާނެކަމަށް އޭނާ ބުންޏެވެ.

މި ކޭމްޕަކީ ހަމައެކަނި ފީލްޑް ޓްރޭނިންތަކަށް ޚާއްސަ ކޭމްޕެއް ނޫންކަމަށާއި ވަކިވަކި ކުޅުންތެރިންނާއި ކުދި ގްރޫޕްތައް ހިމަނައިގެން ކުޅުންތެރިންގެ ކުރިއެރުމަށް ބޭނުންވާ މުހިންމު ބައްދަލުވުންތައްވެސް މި ކޭމްޕުގެ ތެރެއިން ބާއްވާނެކަމަށް އޭނާ މައުލޫމާތުދިނެވެ.

"މިއީ ވަރަށް މުހިންމު ދަތުރެއް. ސާފް ޗެންޕިއަންޝިޕު ފަދަ މުބާރާތްތަކުގައި ވާދަކުރާނަމަ އެންމެ މުހިންމު އެއް ކަމަކީ ޓީމެއްގެ ގޮތުގައި ވާދަކުރުން. އެފަދަ ގޮތަކަށް ޓީމު ބައްޓަންކުރުމަށް ޓްރޭނިން ކޭމްޕަކަށްވުރެ ވަކި ފަހި އެހެން ފުރުސަތެއް ނޯންނާނެ. މި ކޭމްޕުގެ ތެރެއިން ކޮންމެ ކުޅުންތެރިއެއްގެ ވަގުތުތައްވެސް ހޭދަކުރާނީ އަބަދުވެސް ޓީމާއި އެކު، މިކަމުގެ ސަބަބުން ކޯޗިން ސްޓާފުންނާއި ކުޅުންތެރިން އެކެއް އަނެކަކަށް ފަރިތަވެ ގުޅުން ބަދަހިވާނެ. މި ޓްރޭނިން ކޭމްޕުގައި ކުރިއަށްދާނީ ހަމައެކަނި ފީލްޑުގައި ކުރިއަށްދާ ސެޝަންތަކެއް ނޫން. މި ކޭމްޕުގެ ތެރެއިން ވަކިވަކި ކުޅުންތެރިންނަށާއި ކުދި ގްރޫޕްތަކަށް ޚާއްސަ މީޓިންތައްވެސް ކުރިއަށްދާނެ" 2012 ވަނަ އަހަރު ރާޖްޕަކްސަ އިންވިޓޭޝަނަލް މުބާރާތުގެ ޗެމްޕިއަންކަން ރާއްޖޭގެ 23 އަހަރުންދަށުގެ ގައުމީ ޓީމަށް ހޯދައިދިން ކާމިޔާބު ކޯޗު ބުންޏެވެ.

މި ޓްރޭނިން ކޭމްޕުގެ ތެރެއިން ސިންގަޕޫރުގެ 19 އަހަރުންދަށުގެ ޓީމާއި އެކު ރާއްޖޭގެ ޒުވާން ޓީމުން ދެމެޗެއް ކުޅުމަށްވަނީ ތާވަލުކޮށްފައެވެ. ފުރަތަމަ މެޗު މިމަހުގެ 8 ވަނަ ދުވަހަށް ރާވާފައިވާއިރު ދެވަނަ މެޗު ކުޅުމަށް ހަމަޖައްސާފައިވަނީ މިމަހުގެ 11 ވަނަ ދުވަހުއެވެ، މިމެޗުތަކަކީ ރާއްޖޭގެ ޓީމުގެ ފެންވަރު ވަޒަންކޮށްލުމަށް ލިބޭ ރަނގަޅު ފުރުސަތެއްކަމަށް ކޯޗު ފާހަގަކުރިއެވެ.

"ސިންގަޕޫރުގެ 19 އަހަރުންދަށުގެ ޓީމާއި އެކު އެކޮޅުގައި ދެ މެޗެއް ކުޅުމަށްވަނީ ހަމަޖެހިފައި. އެއީ ހަމަ ގާތްގަނޑަކަށް މިކުދިންގެ އުމުރުފުރާގެ ޓީމެއް. ރާއްޖޭ ޓީމުގެވެސް ގިނަ ކުޅުންތެރިންނަކީ އުމުރުގެ ގޮތުން ހަގު ކުޅުންތެރިންތަކެއް. އެހެންވީމަ ރާއްޖޭގެ ޓީމުގެ ފެންވަރު ބަލާލުމަށް މިއީ ލިބޭ ރަނގަޅު ފުރުސަތެއް. އެކޮޅުގެ ޓީމަކީވެސް ވަރުގަދަ ޓީމެއް. ފުރަތަމަ މެޗު ކުޅޭނީ 8 ވަނަ ދުވަހު، ދެވަނަ މެޗު ތާވަލުކޮށްފައިވަނީ 11 ވަނަ ދުވަހަށް. މިމެޗުތަކުގެ ކުރިން ރާއްޖޭގެ ޓީމުން ޕްރެކްޓިސްތަކެއް ކުރާނެ" އުރްބާނީ މައުލޫމާތުދިނެވެ.

ސިންގަޕޫރުގައި ކުރިއަށްދާ ތަމްރީނުތަކަށްފަހު ޒުވާން ޓީމުން އެނބުރި ރާއްޖެ އައުމަށް ހަމަޖެހިފައިވަނީ މިމަހުގެ 12 ވަނަ ދުވަހުއެވެ. ސާފް ޗެމްޕިއަންޝިޕް ކުރިއަށްދާނީ މިމަހުގެ 23 އިން އަންނަމަހުގެ 3 ވަނަ ދުވަހަށް ގަލޮޅު ރަސްމީ ދަނޑުގައެވެ. މި މުބާރާތުގައި ރާއްޖެ ހިމެނެނީ ގުރޫޕް އޭގައެވެ. މި ގުރޫޕުގައި ދެން ހިމެނެނީ ނޭޕާލް، ބޫޓާން އަދި ސްރީލަންކާއެވެ.

މިމުބާރާތުގެ ގްރޫޕް ބީގައި ވާދަކުރާނީ ބަނގްލަދޭޝް، އިންޑިއާ އަދި ޕާކިސްތާނެވެ.

20 އަހަރުން ދަށުގެ ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖެއިން އެންމެ ފުރަތަމަ ނުކުންނާނީ 23 މާޗް ވާ ހޯމަ ދުވަހުގެ 20:30 ގައި ސްރީލަންކާއާއި ވާދަކުރުމަށެވެ.

އެއަށްފަހު 25 މާޗުގައި ބޫޓާނާއި ދެކޮޅަށް ކުޅުމަށްފަހު، ތިން ވަނަ މެޗުގައި ނޭޕާލާއި ދެކޮޅަށް ނުކުންނާނީ މާޗްމަހުގެ 27 ވަނަ ދުވަހުއެވެ.

ސާފް ޗެމްޕިއަންޝިޕް ފުޓުބޯޅަ މުބާރާތުގެ ސެމީ ފައިނަލް މެޗު ތާވަލުކޮށްފައިވަނީ އަންނަ އޭޕްރިލްމަހުގެ ފުރަތަމަ ދުވަހަށެވެ. އަދި ފައިނަލް މެޗު ކުޅުމަށް ހަމަޖެހިފައިވަނީ އޭގެ ދެ ދުވަސްފަހުން އޭޕްރިލްމަހުގެ 3 ވަނަ ދުވަހުއެވެ.