ސިފައިން ސެމީއަށް، ކަސްޓަމަށް ފުރަތަމަ މޮޅު

ކުރިކެޓް ބޯޑް އޮފް މޯލްޑިވްސް (ސީބީއެމް)އިން އިންތިޒާމުކޮށްގެން ކުރިއަށްދާ މައިލޯ ރަމަޟާން ކުރިކެޓު ކާނިވަލުގެ ދެވަނަ މުބާރާތް ކަމަށްވާ އޮފީސް ޓޭޕްބޯލް މުބާރާތުގަ ދިވެހި ސިފައިންގެ ކުލަބުން ދެވަނަ މެޗުވެސް ކާމިޔާބުކޮށް މުބާރާތުގެ ސެމީ ފައިނަލުން ޖާގަ ހޯދިއިރު ކަސްޓަމްސް ރެކްރިއޭޝަން ކުލަބުން މުބާރާތުގެ ފުރަތަމަ މޮޅު ހޯދާފިއެވެ.

މާފަންނު ކުޅިވަރު އެކުވެނީގެ އެއްނަންބަރު ކުރިކެޓް ދަނޑުގައި އިއްޔެ ކުޅުނު ފުރަތަމަ މެޗުން ކަސްޓަމްސް މޮޅުވީ، އިމިގިރޭޝަނާ ވާދަކޮށް 9 ވިކެޓުންނެވެ. މެޗުގައި ގުރުދިމާވުމުން ކަސްޓަމް ހޮވުމަށެވެ.

އެގޮތުން އިމިގިރޭޝަނުން ފުރަތަމަ ކުޅެންއަރާ 8 އޯވަރުގެ ތެރޭގައި 2 ކުޅުންތެރިން ނުބައިވެގެން ހެދުނީ 119 ލަނޑެވެ. އެޓީމުން އެންމެ ރަނގަޅަށް ކުޅުނީ 24 ބޯޅައިން 32 ލަނޑު އެއްކުރި މުހައްމަދު ޒަކީއެވެ.

ޖަވާބު ކަސްޓަމްސް އިން ކުޅެން އަރާ މެޗު ކާމިޔާބުކުރީ 7.4 އޯވަރުގެ ތެރޭގައި އެއްކުޅުންތެރިއަކު ނުބައިވެގެން 122 ލަނޑު ހަދައިގެންނެވެ. އެޓީމުން އެންމެ ރަނގަޅަށް ކުޅުނީ 14 ބޯޅައިން 32 ލަނޑުހެދި ހައިކަލްއެވެ.

އިއްޔެ ކުޅުނު ދެވަނަ މެޗު ސިފައިން ކާމިޔާބު ކުރީ ފޮރިން މިނިސްޓްރީއާ ވާދަކޮށް ހަ ވިކެޓުން މެޗު ކާމިޔާބުކޮއްގެންނެވެ.

ގުރުދިމާވުމުން ފޮރިން މިނިސްޓްރީން ކުޅެންއަރާ 8 އޯވަރުގެ ތެރޭގައި 6 ކުޅުންތެރިން ނުބައިވެގެން ހެދުނީ 89 ލަނޑެވެ. އެޓީމުން އެންމެ ރަނގަޅަށް ކުޅުނީ 19 ބޯޅައިން 35 ލަނޑުހެދި އާރިފް ރިޒާއެވެ.

ޖަވާބުގައި ސިފައިންގެ ޓީމުން ކުޅެންއަރާ 6.1 އޯވަރުގެ ތެރޭގައި ހަތަރު ކުޅުންތެރިން ނުބައިވެގެން 92 ލަނޑު ހަދައި މެޗު ކާމިޔާބުކުރިއެވެ. އެޓީމުން އެންމެ ރަނގަޅަށް ކުޅުނީ 7 ބޯޅައިން 25 ލަނޑު ހެދި އަބްދުﷲ ޝާހިދެވެ.

މި ނަތީޖާއެކު ކުޅުނު ދެމެޗުވެސް ކާމިޔާބުކޮށް 4 ޕޮއިންޓާ އެކު ގުރޫޕުގެ އެއްވަނަ ޓީމުގެ ގޮތުގައި ސިފައިން ވަނީ މުބާރާތުގެ ސެމީފައިނަލުން ޖާގަ ހޯދާފައެވެ.